Tagfangguna 11 - Fanawbuid tagsibaliwas Fakayabian

Efta

¹ Efta sik tagfawayan at maseganama siginans talun Gilyad. At mama Gilyad ay at mina sik tagfaebayad fag mangena.

² Gilyad e ngay sisian yangay sit mangena fia. Ay kanya fag ngay sisian nu nbia wan, naiyan Efta ay nalong te, “Wo e fagmagbilugun siginan em mama at ramraman, aroro saman way emu am mina.”

³ Nu katanya, Efta nalao wan siginan at ngay faduksay, ay nabanwan sis Tub, ay sanya sik ngay taw at yud matuyan at ngay fakamulun nanangalo anya.

⁴ Abandi, ngay taw Amun nafawayan ngay taw Israel.

⁵ Nu katanya, talun Gilyad at ngay fagtainan nanantaban Efta siginans Tub.

⁶ Glong te, “Gewan, fanggunai emi laman namawayan ngay taw Amun.”

⁷ Ay Efta nalong te, “Nataw katsi gina am gidapan ay fakakbangun sa angku, ay ebi ankuri wam angku ay naiyan siginan ku mama at bale?”

⁸ Ay kanya fagayu nabalus te, “Get ami am gubuk. Nu nanangalo tua ro wo emi laman namawayan ngay taw Amun, gtoglag ban mi te, o wan tagfangguna fagayu taw sis Gilyad.”

⁹ Ay Efta nalong te, “Nu nanangalo ktua ro ayu sas fagawayanan ay Yawi ro nu nafababo tua angku, o anud fia te, au ban tagfangguna ayu?”

¹⁰ Ay kanya fagayu nabalus te, “Gfadiuganan ami emu. Yawi tam tagfatuyan.”

¹¹ Nu katanya, Efta nanangalo kafag ngay fagtainan sas Gilyad ay sanya fag ngay taw nafili anya laman at tagfangguna. Sis Mispa sis Yawi at daga salubangan, Efta nafamatang at ngay fatuyanan at nalong sa sangay tagfangguna.

¹² Ay Efta nasugu ngay tagfosuk longan laman nanlong sas Amun at fun te, “Wain ay fagnamawayanun ngay taw Israel?”

¹³ Ay Amun at fun nabalus te, “Gina ngay taw Israel naduksun siginans talun Igiptu, kanya fagayu nagbilug em ngay daga siginans Liskung Arnun sitsigons Liskung Abuk, ay tagsas Liskung Urdan. Katsi, fafolii sa emi em daga.”

¹⁴ Efta nafafoli kafag ngay tagfosuk longan sas Amun at fun

¹⁵ laman nanlong te, “Ngay taw Israel wa nagbilug Muab ay Amun at daga.

¹⁶ Katatuy at kinfasludan: em ngay mangaguyang gina glao siginans talun Igiptu, nadalan sas talun at yud e taw tagsas Dagat Maraska ay andasug sas furuan Kades.

¹⁷ Ay nasugu ngay tagfosuk longan sas Edum at fun laman nanget te, ‘Aylati wan nu gdalan ami say daga,’ dewa katanya, kafag fun wa nafadiuganan. Katanya yangay Muab at fun at nafakamulun sa em ngay mangaguyang. Nu katanya, kanya fagayu si way gugat sKades.

¹⁸ Ay em ngay mangaguyang nalao sas talun at yud e taw. Ay nadalan furuan Edum ay Muab ay andasug sas Muab sfakamenitan baliwa fag tigyangan Liskung Arnun, ay sanya, kanya fagayu nawat at ngay bale ramit. Ay dewa katanya, wa nalangfe kafag datag, aroro kanya wan Muab at taba.

¹⁹ Sanya ginan, em ngay mangaguyang nasugu yangay ngay tagfosuk longan sas Sikun, Amur at fun, tagfunan sis furuan Kesbun, laman nanget te, ‘Aylati wan nu gdalan ami say daga laman manangadasug ami sa em talun.’

²⁰ Ay fun Sikun wa nafadiuganan em ngay mangaguyang, abat ngate, nafaful at ngay tagfawayan sas talun Yaas ay laman namawayan ngay taw Israel.

²¹ Ay dewa katanya, Yawi, Israel at Dius, nagubuk ay nafon famabo sa sangay taw Israel. Ay nagbilug taw Amur at ngay talun

²² siginans Arnun sitsigons Abuk fag liskung, ay siginans talun yud e taw sitsigons Liskung Urdan.

²³ Yawi, Israel at Dius, naiyan ngay taw Amur laman ngay taw Israel namanwan sanya fag talun. Ay katsi wain ay fakaylatun yay gbul kanya fag talun?

²⁴ Agbilugi wa ay fagsegan Kemus at nafon sa ayu fag talun. Ay katanya yangay anggan ami, nangagbilug yangay mi nusnge wain em Dius Yawi at nafon sa emi.

²⁵ Amasaful yap o Balak, Sipur at baguama, Muab at fun? O kanya nanamawayan ngay taw Israel ay mannga nafawayan anya?

²⁶ Tuluk sandan wa kbanwa ngay taw Israel nu gbanwan sis Kesbun, ay Aruer, ay sis ligung fag ngay furuan, ay anggan si sangay furuan daul tagsis tigyangan Liskung Arnun. Wain ebi wayam nabul tuy?

²⁷ Kwe nafakamulun mauri sa ayu, dewa katanya, mauri ay fakamulun sa angku siginan nu gfawayan am angku. Yawi nangus tagwabilug nusnga sinu at matuyan si antam.”

²⁸ Dewa katanya, Amun at fun wa nadungugan Efta at longan.

²⁹ Ay Yawi at Falad nagbilug Efta. Ay Efta nasas Gilyad ay sas Manase, ay nalangfe sas Mispa tagsis Gilyad, ay siginans Gilyad, kanya nataglayun sas talun Amun laman namawayan.

³⁰ Efta nafatuyanan sas Yawi te, “Nu nafababo tua ro wo angku sa sangay taw Amun,

³¹ nusnga sinu ro taguna gduksun siginan ku sakbawan bale laman namablang angku gina au guli manabayan siginans fagawayanan, nangirug kro anya laman ku fagirugun fag fanggalangun sa emu.”

³² Efta nafawayan ngay taw Amun, ay Yawi nafababo anya.

³³ Ay Efta nababo ngay taw Amun ay nagbilug duak safuluk furuan daul siginans Aruer tagsas ligung Minit sitsigons Abel-Keramim.

Efta at Baguina

³⁴ Ay Efta nu noli wan sat bale sis Mispa, at baguina nafablang anya ay gfalelegan at bilug kaduge gfawang at famawangan. Kanya way fag sadi Efta at baguina.

³⁵ Efta nu nalag anya, nagirat at lanbung aroro kabalu, ay glong te, “Ku baguina, nafabaluanan o angku maksvn aroro nafatuyanan au sas Yawi te, namon au sa anya nusnga sinu ban taguna gfablang angku, ay kwa mafabali ya tuy fag fatuyanan.”

³⁶ Efta at baguina gbalus te, “Mama, nu nafatuyanan way o sas Yawi, fafasludani tua, aroro siginan anya nafababo tua ayu sa ay ngay fawayan fag ngay taw Amun.

³⁷ Dewa katanya, e fagetun au sa emu: aylati yap nu gfanloan au duak magdanun sa sangay buksul gasfuan ku ngay fagadgalangan laman nanmabaluanan ami aroro nangabul kban yud nafanmangama.”

³⁸ Efta nafadiuganan at baguina. Kaduge duak magdanun, at baguina nafanloan sa sangay buksul gadgaloan at ngay fagadgalangan laman nanmabaluanan, aroro gakabulun wan ay wa mafangindugan ya.

³⁹ Ay nu nlangfe duak magdanun, kanya anfoli sat mama. Ay Efta nafafasludan at fatuyanan sas Dius. Ay at baguina anbul yud batang kae indugan. Ste ginan nu kafasigad taw Israel at faugali,

⁴⁰ galay banwa, ngay taw Israel at ngay baguina gfanloan nanmabaluanan kaduge ufatk menit tuga at fangamatang Efta fag taw Gilyad at baguina.