Sefanias 3 - Fanawbuid tagsibaliwas Fakayabian

Takafasludan ban sas Erusalem

¹ Sefanyas nalong te, “Ida ngay taw Erusalem! Aroro kanya fagayu kamabo Dius ay gfakamulun at mauri ay at ngay tagfangguna kamalingun.

² Dewa e gfoyung anya, wa kaylat gdungugan ay wa gafanud ay wa nangakbang sas Dius Yawi.

³ At ngay tagfangguna kata sik liun gsubang. Nu gakayabiun wan kanya fagayu kata sik idu talun tagrvbvy at fagnangonun, ay balabag di, we fasawadan ya.

⁴ Ay at ngay taglong nu gfakamulun gfangabanganan, ay bunwa sik fagfatigwanan. At ngay tagfon fanggalangun wa gfae masuad Dius at bale, ay wa gfaning Yawi at ngay suguan.

⁵ Dewa katanya, Yawi at fagmasineun si tua gugat at furuan. Yawi gfakamulun at matuyan, ay gfasure at fagmatuyanun kayu balabag, ay katanya tua gugat. Dewa katanya, tagfakamulun at mauri we apla ya.”

⁶ Yawi nalong te, “Nafabul kwan tibak talun at ngay taw ay narasras kwan at ngay furuan anggan at ngay alad ay at fagulitan fag ngay afud alad at mogat. We sawad ya tagbanwan sanya fag ngay furuan, nu katanya, we glao ya sat ngay dalan.

⁷ Nu glong kro nu nafakamulun ktua takatanya, ku ngay taw gsuyu tua angku, ay kaylat tua nu gatul au anya, laman at furuan di kaiklas kata ku nafalganan. Ay abat ngate mangaro, ku ngay taw kaksvn way nu gfakamulun at mauri.

⁸ Nu katanya, am fag ngay taw Erusalem, fanyai at buknga nu namauri au ngay talun. Aroro anke algan au namaful ngay talun ay ngay fagfagtainanan laman namadasug sa anya fagayu ku fandotaman at maksvn takata sik afuy nu girug fagdaul daga.

⁹ Sanya ginan, namasine au ngay taw at amatanganan laman gfaning tua ay nangasadi sa angku.

¹⁰ Ku ngay taw at nasaruayan sas dife Liskung Etiupya namuba ban sa angku at ngay fanggalangun.

¹¹ Ay ginanya ban fag menit, am fag ngay taw Erusalem di ban am gafaplan ya siginan ay ngay nafakamulun at mauri sa angku, aroro gaiyan kban siginan ayu ngay takamatungudun ay takamuag. Nu katanya, di ban e kamatungudun ya sa ku nafili fag buksul at yud e malong.

¹² Dewa katanya, ku fagfasawadun ban fag ngay taw sis Erusalem takamababaun way lang ay at yud e kwa, ay kanya ban fagayu get gubuk sa angku.

¹³ Kanya ban fag ngay taw Israel di gfakamulun at mauri, di kamuag ay di gfandaya, ay gfangon tua ban ay gtiug manabayan ay di e fakalimuun.”

Ngay Taw Israel Guseganan

¹⁴ Sefanyas glong te, “Ngay taw Israel, useganani uroi! Ay am fag ngay taw tagbanwan sis Siun, fag furuan Erusalem, alubadi ay useganani sas fagdaul ay amatanganan!

¹⁵ Yawi wa namaurianan ya ayu, ay kanya ban nangaiyan wan ay ngay fawayan. Yawi wan talun Israel at Fun, ay kanya gufud tua ayu. Nu katanya, di ban am e fakalimuun ya takadasug sa ayu.

¹⁶ Ginanya ban fag menit, e glong sa sangay taw Erusalem te, ‘Ngay taw Siun, lag am kalimu, faksvni ay ngay amatanganan,

¹⁷ aroro Yawi gufud tua ayu. Kanya kata sik maseganama fag tagfawayan at namalangfe ayu. Yawi guseganan ayu ay aroro kesug tua ayu, kanya gfon ayu sik bagu fag leleg. Kanya galubad guseganan laman sa ayu,

¹⁸ kata sik taw nu guseganan si sik fagmafulun.’ ” Yawi glong te, “Namalangfe au ayu siginans fagidapun laman diam umke fakaplaun.

¹⁹ Ginanya ban fag menit, gfaurianan kban fagayu tagfaidapan ayu. Kata am tagalbi ay at nasaruayan fag ngay tupa, dewa katanya, namalangfe au ay namaful ayu. Ay ebi, nafaplan am, dewa katanya, namauseganan au ayu, ay namasik takadungug sas fagdaul daga.

²⁰ Ginanya ban fag menit, namaful au ay namafoli ayu say ngay talun. Ay namauseganan kban ayu ay umsik takadungug ban am sas fagdaul daga. Ay gina kban gfafoli sa ayu at masine fag kayaunanan, lumag yay ban am fia takatanya. Au, Yawi, taglong tuy.”