Sefanias 2 - Fanawbuid tagsibaliwas Fakayabian

Darangin laman Gubun Asalanan

¹ Sefanyas nalong sas Uda te, “Yud e apla fag ngay taw, afuli ay ubuni ay ngay asalanan

² gina yay yud andasug Yawi at nafalganan fag menit nu nangaiyan ay namarapyag ayu kata naglayapan. Fagayu am ubuni ay ngay asalanan gina yay yud andasug sa ayu Yawi at fandotaman tagigang.

³ Ay am takamababaun ay tagfaning Yawi at suguan, akbangi sa anya. Fataglayuni nu gfakamulun am at masine ay nu kamababaun am. Bangaran ban Yawi gdiri tua ayu ginanya fag menit.

Faurianan sas Filistia

⁴ Wa ban e namanwan ya sas furuan Gasa ay Askelun. Ngay tagbanwan sis Asdud gaiyanan ban kaduge way sik wabilug menit. Katanya yangay tagbanwan sis Ekrun gaiyanan yangay ban siginan at furuan.

⁵ Ida am, ngay taw Filistia tagbanwan sis tigyangan dagat. Katatuy Yawi at longan sabaliwa ayu: Namaurianan kwan ayu fag ngay taw Filistia tagbanwan sis Kanaan; namamin kwan ayu fagayu, ay kwa namae sawad ya.

⁶ Nu katanya, ay ngay daga sis tigyangan dagat umsik fagnamafangonan way lang, ay fagubungan ngay tupa.

⁷ Ay at kinsawad ban fag ngay taw Uda nangagbilug kafag talun. Ay sanya yangay ban nu namafangonan at ngay fagbaugun. Ay nu nyabi wan, kanya fagayu nantiug wan sis Askelun fag ngay bale. Ay ginanya ban, kafag ngay taw at Dius, Yawi kafanyu ay gdog yay namae ramraman anya fagayu.”

Faurianan sas Muab ay sas Amun

^8-9 Yawi at Mabalyanan, Israel at Dius, nalong te, “Nadungug au ngay taw Muab ay ngay taw Amun nu glong mauri ay nu gfalingun ku ngay taw. Kanya fagayu kamatungudun te, ‘Makatu way mi gagbilug ngay taw Israel.’ Nu katanya, gfatuyanan au te, kafanud nu gleleg au, nanrasras kban talun Muab ay Amun kata Suduma ay Gumura. Ay kabavn ban at ngay fagbanwanan we tungkul ya, aroro tagtugbung sanya ngay makmak way lang at madugi ay e alian fakawatan barara. Ku ngay taw at sawad nangagbilug ban ay namul kafag ngay taw at ngay ramraman.”

¹⁰ Sefanyas nalong te, “Katanya ban at faurianan sa sangay takamatungudun fag ngay taw Muab ay Amun, aroro nafalingun ay nafapla Yawi at Mabalyanan at ngay taw.

¹¹ Yawi namadulo anya fagayu siginan nu grufa fagayu fagsegan sas fagdaul daga. Nu katanya, ngay taw sa tangayayu fag ngay talun sumeg yangay Yawi sit mesa talun.”

Faurianan sas Etiupya ay sas Asirya

¹² Yawi nalong te, “Ngay taw Etiupya, namabul kban ayu sas awayan.

¹³ Ay namaurianan kyangay ban taw Asirya tagbanwan sis fawalan fag alvngvdan. Ay ginanya ban, Ninibe umsik mabaluanan, ay magong kata sik talun at yud e taw.

¹⁴ Ay kanya ban fag talun umkata sik fagnamafangonan kambing ay baka ay tiba yak mangilafang. Ay ginanya ban, ngay liaw nangafun sat mayabuk fag ngay turuk ay kadungug nu guni sis fagbanawanan. Ay at ngay sakbawan at fandingding fag kayu sidru umkiklas.

¹⁵ Katanya ban takafasludan sas furuan Ninibe, aroro kanya fagayu glong te, ‘We manamawayan emi ay we mafasud emi.’ Dewa katanya, kanya fag furuan umrasras wan, ay tagbanwan ban sanya, tagfangagat way lang fag ngay mela. Ay nusnga sinu ban tagdalan sanya gfalingun ay kase kafag furuan.”