Santiagu 4 - Fanawbuid tagsibaliwas Fakayabian

Famababauni sas Dius at Daga Salubangan

¹ Daginan ay fagbadbaboanun ay ay fakadkaurianun? O nunda bunwa siginan ay ngay mesa fakaylatun tagbadbaboan si ay ngay amatanganan?

² E fakaylatun am ay wam magbilug, nu katanya, gfabul am ay iba. E fagalabianun am ay wam magbilug, nu katanya, gawayan am ay gbadbaboan. Ay wam magbilug ay fakaylatun, aroro wam get sas Dius.

³ Get oma am, ay wam mafabul aroro mauri way ay algan, gfaning way am ay sadili fakaylatun.

⁴ Wam mangaro matuyan sas Dius. O nunda wam nasaful te, nu gfagadgalangan wayam ste swa daga, gfawayan wayam Dius? Nusnga sinu tagfagadgalangan fagdaul daga, kanya gfawayan Dius.

⁵ Lag am gamatangan te, we masuad at marirukan sis Dius at Longan te, at nafabanwan si antam fag Falad wa kaylat nu e fagoan sat fakesugun.

⁶ Ay Dius at nafon sa antam at gubuk kasakan wan. Nu katanya, anriruk sis Dius at Longan te, “Dius wa gfadiuganan takamatungudun fag ngay taw, dewa katanya, kafanyu tua nusnga sinu takamababaun.”

⁷ Nu katanya, faningi Dius. Ay fawayani Satanas, ay kanya lumagyu ayu.

⁸ Akbangi sas Dius, ay Dius nangakbang yangay ayu. Am fag ngay tagasalanan, fegusi ay daluap. Ay anggan am fag ngay tagawabilugan, fasinei ay amatanganan.

⁹ Abalui ay waywayi. Abat ngate am kase, abalui way. Ay abat ngate am guseganan, afanawai way.

¹⁰ Famababauni sa tam Fun at daga salubangan ay kanya namabat ban ayu ke fagusegananun.

¹¹ Ku ngay faduksay, galay am at sadi, lag am glong at mauri sa ay iba. Aroro taglong mauri ay tagfauri at faduksay, gfauri Muisis at Faugali. Ay nu gfauri way o kafag Faugali, bunwo sik tagfaning ya, nu bunway sik tagfili way o te, o mauri ay mannga duan.

¹² At nafon kafag Faugali sadi way. Ay sadi way tagfili te, sinu at ke mauri ay at yud e mauri. Kanya e fagmabalyananun gfalangfe ay gfaurianan. Nu katanya, sinu o, laman namauri o am iba?

Famararang sabaliwas Fakamatungudunun

¹³ Dungugani, nusnga sinu am taglong te, “Katsi ay mannga balabag, glo ami sa sik furuan, ay sik banwa ban nu sanya ami, ay namalao ban mi nusnge wain, ay ngayu ban em bulan.”

¹⁴ At matuyan, wam nasaful te, o gleleg yay ban am balabag. Aroro ay leleg wa ngaduge kata way sik sungo, at masakit kalyam.

¹⁵ Nu katanya, katatuy yakman ay longan: “Tam Fun nu kaylat, ay nu gleleg yay ban tam, sanya ban tam, laman namakamulun.”

¹⁶ At matuyan, kamanagsag way am ay kamatungudun. Nu katanya, mauri way am.

¹⁷ Nusnga sinu fag taw at nasaful at matuyan ay nu dway gfaning, kanya e asalanan.