Santiagu 3 - Fanawbuid tagsibaliwas Fakayabian

Tam Leplep

¹ Ku ngay faduksay, lag am ngayu takaylat nangasik takamoyung aroro nasaful wam te, Dius ban nu ginsaful emi fag ngay takamoyung, aksvn yap tua nu ginsaful tibak taw at asalanan.

² Fagayu tam, ngayu tam nasalan. Sik taw nu ddi e nasalan sit longan, kanya sik yud e malong, aroro kanya gfaragang tua at sadili.

³ Nu nautkut tam sik karabaw at dungus, gfaning tua antam nusnga nday tam fakaylatun.

⁴ Katanya yangay sik sakayan lino, dewa gbia daul, ay dewa sik maksvn fag tagmara gtulud, ay dewa alay at famaturunan, tagfalao mafaturunan way nusnga nday at fakaylatun.

⁵ Katanya yangay tam leplep. Dewa alay way kafag afud si tam bilug, kanya kamatungudun. Amatangani, dewa sik singsing afuy sirut mafamin way fagdaul araw.

⁶ Tam leplep kata sik afuy. Sanya ginan wan ngayuk mauri. Kanya sik afud tam bilug tagfae fagmauriun sas fagdaul tam bilug ay tam ugali. Ay kanya sik afuy siginans Afuy Daul ay gfaurianan antam.

⁷ Taw mafagup way nusnge wain fag mangilafang, taglayug, ay tagalafang, ay tagleleg sis mamam.

⁸ Ay dewa katanya, we taw mafaragang at leplep. Kanya mapnu fagmauriun ay fangganga takamabul.

⁹ Siginan tam leplep glong tam at masine sa tam Fun. Ay sanya ginan yangay glong tam sabaliwa tam ngay iba te, “Dius faurii anya,” kanya dewa ankawat kata Dius.

¹⁰ Siginan tam leplep gduksun at masine ay at mauri. Ku ngay faduksay, wa masine takatanya.

¹¹ O siginan sik bulbug gduksun at masine ay at mayat fag mamam?

¹² Ku ngay faduksay, sik dingin wa marawvg sik talise, ay sik ulyat wa marawvg sik altimu. Ay siginan at mayat fag mamam we kafanagub at masine fag mamam.

Fagsafulun tagsiginans Dius

¹³ Sinu si ayu at ke fagsafulun ay at mamatanganan? Kanya, falagi sat ngay iba at fagsafulun siginan at matuyan fag fakamulun ay fakamababaunun.

¹⁴ Ay nu e masuksukan way si ay amatanganan, kata fagfangalabianun, ay fagfangadotamaun, ay fakamasadiliunun, lag am kamatungudun te, e fagsafulun wam, aroro nu katanya way, gfafamuag am at matuyan.

¹⁵ Takatanya fag fagsafulun bunwa siginans banwa. Siginan ways fagdaul daga, siginans taw at amatanganan ay siginans Satanas.

¹⁶ Ay nu inda fagfangalabianun ay fakamasadiliunun, sanya ginan wan tagfayud e fagmanabayanun, ay nusnga setaw fag fakamulun at mauri.

¹⁷ Fagsafulun tagsiginans Dius: taguna, di e malong, ay manabayan tua, ay malukme, ay mafamaning, ay mafangafanyu ay masine, ay di e fagfili, ay di kamuag.

¹⁸ Ay sik taw takaylat gfae fagmanabayanun sat ngay iba, umke fagmasineun.