Santiagu 2 - Fanawbuid tagsibaliwas Fakayabian

Lag e Fagfili Taw

¹ Ku ngay faduksay, nu gafanud tuam sa tam Fun Isus at mabalyanan, lag am e fagfili taw.

² Kata nangus sik taw at maramraman at ke fanumyu at mawatan gintu ay ke lanbung mafanud nasakbo sa ay bale fakafulan. Ay sik taw at yud e kwa nasakbo yangay sanya.

³ Ay ay fakamulun sat maramraman masine tua; nalong am sa anya te, “Malunggungi ste sit masine fag faglunggungan,” ay nalong am sat yud e kwa te, “Malindugi way sna,” ay mannga, “Malunggungi sis salug.”

⁴ Nu katanya way ay fakamulun, e fagfili way am, ay ay fagfaningun ay ngay algan way at mauri.

⁵ Ku fakesugun ku ngay faduksay, dungugani. Tam Dius nafili at yud e kwa ste swa daga, laman maramraman sas fagafanudun, ay laman kanya gfagtainan anya fagayu. Katanya at fatuyanan sas nusnga sinu takesug anya.

⁶ Dewa katanya, gfaidapan am at yud e kwa. O nunda bunwa at maramraman tagfaidapan ay tagtaban ayu sas tagwabilug at daga salubangan?

⁷ O nunda bunwa kanya fagayu tagfalingun tam Fun Isus at ngayan at mauseganan? Ay siginan kafag ngayan ngay taw toglag ayu.

⁸ Masine tua ay fakamulun, nu gfaning tuam tam Fun at suguan at marirukan sit Longan te, “Esugi am iba kaksvn nu kesug o emu.”

⁹ Dewa katanya, nu e fagfili way am, e asalanan am ay e faurianan ban sa ayu, kata Dius at longan.

¹⁰ Nusnga sinu tagfaning Muisis at Faugali ay wa nafaning sanya fag ngay suguan sadi, anke asalanan, ay kata yay nu yud nafaning fagayu suguan.

¹¹ Dius nalong te, “Lag gfanugtug,” ay nalong yangay te, “Lag gfabul.” Deyud o gfanugtug ya, sik tagasalanan yay o nu kamabul way o.

¹² Nu katanya, dirii tua ay ngay longan ay ay ngay ugali aroro nasaful am te, Dius at Longan at nanginsaful ban ayu ay kanya yangay ban at namalfas ayu.

¹³ Aroro sik taw at yud kafanyu at iba, Dius ban we afanyu gfaurianan anya. Ay dewa katanya, takafanyu at iba wa kalimu dewa andasug nu gfaurianan fag buknga.

Fagafanudun ay Ugali

¹⁴ Ku ngay faduksay, we tungkul sik taw nu glong te, “E fagafanudun au,” ay kanya way e masine fag fakamulun. O takatanya at fagafanudun mafalangfe anya?

¹⁵ Kata nangus sik faduksay at yud e lanbung ay takalunus,

¹⁶ ay am at sadi nalong am anya te, “Loi wan ay manabayan tua ro wo. Di ro wo nangus karios ay kalunus.” Nu katanya way am longan, we masuad nu dway o nafon at fagayudanun.

¹⁷ Nu katanya, takatanya fag fagafanudun nu dway e fakamulun, mabulan way.

¹⁸ Ay nu e glong te, “E fagafanudun o, ay au, e masine au fag fakamulun,” gbalus au te, “Falagi angku am fagafanudun deyud e kalag sim fakamulun, ay siginan ku fakamulun gfalag au sa emu te, e fagafanudun au.”

¹⁹ Gafanud o te, sadi way tam Dius. Matuyan. Anggan ngay bara gafanud yangay ay maksvn nu gtadtaruyan kalimu.

²⁰ Wo mamatanganan! O wo saful te, we tungkul fagafanudun nu dway e masine fag fakamulun?

²¹ Tam mangaguyang Abrayam antap kata sik taw at yud e asalanan, siginan at fakamulun, gina nafasas tungud fagirugan fanggalangun at baguama Isak.

²² Amatangani te, kanya e fakamulun tua at masine gasfuan at fagafanudun. At fagafanudun kasakan wan aroro kalag sit fakamulun.

²³ Ay anfasludan wan Dius at Longan te, “Abrayam gafanud sas Dius at longan ay Dius natap anya kata nu yud e asalanan.”

²⁴ Nu katanya, mayamag te, sik taw antap kata nu yud e asalanan siginan at fakamulun, ay bundi lang siginan at fagafanudun.

²⁵ Ay katanya yangay Rakab fag takamatugtug, kanya antap yangay kata sik taw at yud e asalanan, siginan nu gfasuksuan at nananginsaful fag duama ay nu gfoyung tibak dalan laman di galagan.

²⁶ Sik taw at yud e falad ya, mabulan wan, ay katanya yangay fagafanudun nu dway e fakamulun mabulan way.