Sakaryas 9 - Fanawbuid tagsibaliwas Fakayabian

Yawi Namaurianan Israel at ngay Fawayan

¹ Kata tuy Yawi at longan: “Namaurianan au furuan Kadrak ay Damasku. Aroro ngay taw nusnga nday, kaugat wan Israel at ngay kasugfunanan sa tua anya nu gdama.

² Namaurianan kyangay furuan Kamat munakbang si sangay furuan Kadrak ay Damasku, anggan Tiru ay Sidun fag ngay furuan, dewa at ngay tagbanwan e fagsafulun.

³ Ngay taw Tiru nawat sik alad daul at mogat, ay nafungsu ngayuk salapi ay gintu, kata nu nafabungsud daga.

⁴ Dewa katanya, namul kwan at ngay fagagbilugun, ay nangukas kwan at ngay ramraman sas dagat. Ay at furuan daul, umkirug wan.

⁵ Ay ngay taw Askelun lumag takatanya ay umlimu. Ay ngay taw Gasa ay taw Ekrun umke fakabaluun, aroro wa ban e fagsegun ya. Gasa at fun umbul ay wa ban e gbanwan ya sis Askelun.

⁶ Ay ngayu bank gaban taw at namanwan sas talun Asdud, ay namamin kban ngay taw Filistia at fakamanagsagun fag ngay ramraman.

⁷ Kanya fagayu wa masine ya kon yamas at ke taguk ay nusnga setaw fag fakonun ku nalong te, masuya. Ay at sawad ban fag ngay taw gtuyan au te, ku ngay taw, kata sik gaban kasugfunanan tagsiginans Uda. Ngay taw Ekrun umtap yangay te, Yawi at ngay taw, kata ngay taw Ebus.

⁸ Namanwan au si ku bale laman we namauri. We mafadog ya namauri ku ngay taw aroro gdiri ktua ban gugat anya fagayu.”

Takadasug fag Fun laman sas Erusalem

⁹ Yawi nalong te, “Ngay taw Siun useganani tua, ay am fag ngay taw Erusalem uroi sik fagusegananun, aroro ay fun kadasug wan. Kanya gfakamulun at matuyan ay Dius ggubuk tua anya. Kanya kamababaun tua, ay kadasug gsakayan sis riangan asnu.

¹⁰ Ay namalyam kwan awayan. Ay nangiklas kyangay Israel ay Uda at ngay faguyudan ay namul kwan at ngay kabayu at fagagbilugun gina gfawayan, ay nanlifung kyangay at famawayan fag ngay godun. Takadasug fag fun namae fagmanabayanun sa sangay furuan ayu daul. Kanya namagtainan sas dua fungfung dagat at wabilug, ay siginans Liskung Eufrates sitsigons fungfung daga.”

Yawi Namalfas at Natabanan fag ngay Taw Israel

¹¹ Yawi nadog yay nalong te, “Ay am fag ngay taw Israel, namalfas au at ngay natabanan si ayu. Kanya fagayu kata sik ngay taw at nafatong sa sik bubun at yud e mamam. Namalfas au anya fagayu aroro sa ku nasadian ku nawat sa ayu, ku nafaksvn siginans taguk.

¹² Am fag ngay natabanan at ke fagsegun yay kalfas, afolii wan sa ay ngay talun nu inda yud e gfauri ayu. Katsi glong au ayu te, nusnga seyu at nalyam si ayu, namafoli au duak kayu kanya.

¹³ Nangagbilug au Uda kata sik godun ay Israel kata sik fangurus. Ay Siun kata sik tagfawayan at fiso tagsumbalian at uyup laman namawayan ngay taw Gresya.”

Yawi Nanggubuk ngay Taw Israel

¹⁴ Yawi namasure at fagmabalyananun sat ngay taw, ay at banyas ban gdamlag kata limbad. Ay kanya ban namawang budyung ay kadasug gadgaloan fulug siginans fasiunan fag alvngvdan.

¹⁵ Yawi at Mabalyanan gdiri ban at ngay taw. Ay kanya ban fagayu nansiad at ngay fawayan at famana fag ngay gang. Nu katanya, kanya ban fagayu nanfangon ay nanginum laman nanguseganan aroro nababo. Kanya ban fagayu gudguroan kata sik ngay tagalangu, ay kapsug siginan at nainum fag ngay fanlangu kata nu ginum si sik mabyat fag taya at ke bilug taguk laman famaramsig sas fagirugan at ngay fugungan.

^16-17 Ginanya ban, Yawi namalangfe anya fagayu kata at fagagbilugun fag ngay tupa. At kasine glag anya fagayu nu sit talun. Kanya fagayu kata at mafanud fag gang taganyang famasine sangbo, at masine nu kalag maksvn nu kabayad. Umkayu at ngay wat ubas at rawvg ay tiba ya at ngay fananumun, laman famabitsug at ngay baguama ay at ngay baguina.