Sakaryas 7 - Fanawbuid tagsibaliwas Fakayabian

Fagmatuyanun Amasine yap sik Taw nu Yud Gfangon laman Gdarangin

¹ Yawi e nalong sas Sakaryas gina sis faufatk menit sis Kisleb fag magdanun (at fasiamk magdanun), gina sis faufatk banwa fun Daryu nu gfunan.

^2-3 Ginanya, ngay taw Betel nasugu Sareser ay Regem-Melek ay at ngay fagsuguan laman namainsaful sa sangay tagfon fanggalangun sas Yawi at Mabalyanan at bale, ay sa sangay taglong, laman nanginto sas Yawi te, “O nangabalu yaymi ay e buknga nu yud gfangon laman gdarangin galay falimak magdanun kata ebi em fakamulun?”

⁴ Ay katatuy Yawi at Mabalyanan at longan sas Sakaryas:

⁵ “Nanlong o sas fagayu taw Israel ay anggan sa sangay tagfon fanggalangun te, ‘Kaduge fituk safuluk banwa galay sis falima ay fafituk magdanun, kabalu am ay wam gfangon laman gdarangin, dewa katanya, bunwa laman sa angku.

⁶ Kaduge am gfangon ay ginum, ay fakamulun sa way ay ngay fakaylatun.

⁷ Katanya yangay ku longan ebi sa sangay taglong, gina Erusalem manabayan ay ngayuk taw gbanwan sanya ay gina yangay e ngay furuan sit ligung, talun Negeb ay anggan ngay buksul sas fakayabian baliwa.’ ”

⁸ Ay Yawi nalong yay fia sas Sakaryas te,

⁹ “Katatuy ku longan sa ku ngay taw, ‘Matuyani tua nu ginsaful am. E fagmasineuni tua ay e fakafanyuni sas galay am at sadi.

¹⁰ Lag am gfaidapan ngay fagbubayun, ngay taw tagsiginan tibak talun, ngay tagidapan ay at yud e fagtainan ya. Lag am gamatangan at mauri sas galay at sadi.’

¹¹ “Ay kanya fagayu wa nadungugan ku longan. Kanya fagayu natalyuyan angku ay wa nafaning.

¹² Kanya fagayu nafatugasun at amatanganan kata gang, ay wa nafaning ku ngay suguan, ay ku ngay longan ku fagmabalyananun at nalong sa sangay taglong. Nu katanya, au Yawi at Mabalyanan, matuyan kadotama au anya fagayu.

¹³ Aroro kanya fagayu wa gdungugan ku ngay suguan, nu katanya, kwa yangay gdungugan nu guro angku.

¹⁴ Kata au sik maksvn fag tagmara namarapyagan au anya fagayu sas nusnga nday fag talun. Kanya fagayu naubun at ngay talun at masine nu katanya, we masuad ya ay we manamanwan ya.”