Sakaryas 6 - Fanawbuid tagsibaliwas Fakayabian

Taginfan sabaliwas Ufatk Faguyudan

¹ E nalag kyangay ufatk faguyudan naduksun siginans wabilug duak buksul tansu.

² Tagguyudan taguna fag faguyudan, at maraska fag ngay kabayu, ay tagguyudan at faduak faguyudan, at malayung fag ngay kabayu,

³ ay tagguyudan at fatuluk faguyudan, at malaksi fag ngay kabayu, ay tagguyudan at faufatk faguyudan, at mariruk fag ngay kabayu. Kanya fagayu tanan wa magaras.

⁴ Nainto au sa tagfakamatoan angku fag tagbarita te, “Nataw manga kanya fag ngay faguyudan at masuad?”

⁵ Kanya nabalus angku te, “Kanya fagayu ufatk tagmara taguyup sas kiwang siginans fagdaul daga at Fun Dius.

⁶ At malayung fag ngay kabayu at faguyudanun fag faguyudan glao sa sik talun sabaliwas wala fag alvngvdan, ay at malaksi fag ngay kabayu at faguyudanun fag faguyudan glao sa sik talun sabaliwa fakayabian, ay at mariruk fag ngay kabayu at faguyudanun fag faguyudan glao sa sik talun sabaliwas siun fag alvngvdan.”

⁷ Ay kafag ngay kabayu at mabitsug nu nalo wan, kanya fagayu masakit nangafagdaul sas fagdaul daga. Ay tagbarita glong sa anya fagayu te, “Kin, nangafagdaul am sas fagdaul daga.” Ay kanya fagayu nanangafagdaul.

⁸ Ay Yawi nalong te, “Damai ngay kabayu tagsabaliwas wala fag alvngvdan, kanya fagayu tagfafiangalay ku Falad tagsanya fag afud talun.”

Sik Sangbo laman sas Uswe

⁹ Yawi nalong sa angku te,

¹⁰ “Buli Kelday, Tubya, ay Edaya at famonun fag ngay salapi ay fag ngay gintu. Ay loi sas Usyas, Sefanyas at baguama, at bale. Kanya fag ufat anfoli siginans at fagatabananan fag talun Babilunya.

¹¹ Namawat o sik sangbo siginan ngay salapi ay gintu, ay namasulun o kafag sangbo sas Uswe fag tagfon fanggalangun at alfuyu, Eusadak at baguama.

^12-13 Nanlong o sas Uswe te, au Yawi at Mabalyanan glong au te, ‘Kafag taw at ngayan te, Sanga, gtugbung ay namadog ban namawat Yawi at bale. Kanya ban umsik fun ay e gfauseganan ban anya. Ay e tagfon fanggalangun nanmalindug sit day faglunggungan ay kanya fag dua masadi.’

¹⁴ Ay fasakboi sas Yawi at bale am nafawat fag sangbo, laman ban Kelday, Tubya, Edaya ay Usyas, Sefanyas at baguama, kamatang tua.

¹⁵ “Ngay taw kadasug siginan tangayayu fag talun laman nanggubuk nangawat Yawi at bale. Umfasludan takatanya ay sumaful am te, Yawi at Mabalyanan at nasugu angku stae sa ayu. Matuyan umfasludan takatanya fagayu, nu gfaning tua ban am ay Dius Yawi.”