Sakaryas 4 - Fanawbuid tagsibaliwas Fakayabian

Taginfan sabaliwa Fagfatungkudan Salung ay Duak Fun Kayu Ulibu

¹ At nafakamatoan angku fag tagbarita anfoli ay nafulo angku aroro kata nu natiug au.

² Kanya nainto angku te, “Nataw am lagan?” Ay nabalus au te, “Sik fagfatungkudan salung at mawatan siginans gintu, ay sit tungud e taya at mabyat fagsuadan langis. Ay sis ligung taya e fituk fabilu ay galay at sadi e sanbung mabilug famaturunan langis.

³ Ay sit tigyangan fagdua e duak fun kayu ulibu.”

⁴ Ay nainto au sa tagfakamatoan gugat angku fag tagbarita te, “Nataw ro manga at masuad kanya fag fituk salung?” Kanya nabalus angku te,

⁵ “O nunda yo nasaful kanya at masuad?” Nalong au te, “Dia.”

⁶ Kanya glong sa angku te, “Katatuy Yawi at longan am fagnanlongun sas Serubabel: ‘Serubabel, bunwa ban siginan am fagmabitsugun ay am fagmabalyananun nu gfawat o ku bale, nu bunway siginan tua ban ku Falad.’

⁷ “Am fagsalubangun dewa kabat sik buksul, makatu way o gfadatag. Gdog yay ban kawat Yawi at bale, ay gina ban gfoli taguyan fag gang, ngay taw guro te, ‘Dius fae fagmasineuni tuy fag bale.’ ”

⁸ Sanya ginan, Yawi nalong sa angku te,

⁹ “Siginans Serubabel nu gfangguna, Yawi at bale umtabu, ay kanya yangay ban at nafangguna gfoli fagfatungkudan turuk. Ay nu nfasludan ban takatanya, sumaful am te, Yawi at Mabalyanan at nasugu angku stae sa ayu.

¹⁰ “Lag gfalingun dewa alay way at kinfakamulun, aroro Yawi guseganan glag nu nfasigad tua kafag fakamulun, ay guseganan yangay nu gdama Serubabel nu gbitbitan at fagaloan fag lubyang. (Kafag fituk salung at masuad te, Yawi at ngay mata tagdama sas fagdaul daga.)”

¹¹ Nainto au sas tagbarita te, “Nataw at masuad kanya fag duak fun kayu ulibu tagsis fagfatungkudan salung at dua tigyangan?

¹² Ay nataw at masuad kanya fag duak sanga ulibu sit tigyangan fag duak famaturunan langis at mawatan siginans gintu?”

¹³ Kanya nainto angku te, “O nunda yo nasaful kanya at masuad?” Ay nabalus au te, “Dia.”

¹⁴ Nu katanya, kanya nalong angku te, “Kafag duak fun kayu ulibu at sanga at masuad duak taw at kinfili laman at namakamulun sas Dius, fagdaul daga at Fun.”