Sakaryas 2 - Fanawbuid tagsibaliwas Fakayabian

Taginfan sabaliwa sik Mangama at ke ba Famasudsudan

¹ Nu katanya, nabanawan au, ay nalag au sik mangama gbitbitan sik famasudsudan.

² Ay nainto au anya te, “Dada o?” Ay kanya nabalus angku te, “Nanginsaful au te, seaba ay sedaul furuan Erusalem.”

³ Sanya ginan, tagbarita tagfakamatoan angku nalao wan ay sadi yak tagbarita nafablang anya.

⁴ Ay kanya nalong sa tagfakamatoan angku fag tagbarita te, “Sakiti tua ay nanlong o sanya fag mangama at ke buba famasudsudan te, Erusalem umsik furuan at yud ya e dingding alad aroro ngayu wan ngay taw tagbanwan sanya ay at ngay fagbaugun.

⁵ Yawi nalong te, ‘Au ban sik dingding alad afuy sas furuan Erusalem, ay au yangay ban tagfae fagmasuloun kafag furuan.’ ”

Yawi Gfafoli at ngay Taw sat Talun

^6-7 Yawi nalong sa sangay taw Israel te, “Nafarapyag au ayu sas fagdaul daga. Dewa katanya, katsi, lagyui wan am tagsis fawalan fag alvngvdan fag talun. Ay am at natabanan sas talun Babilunya, lagyui yangay, ay afolii wan sas Siun.”

⁸ Nu nalag au kanya fag taginfan, Yawi at Mabalyanan nasugu angku laman nanlong au at mauri sa sangay talun at taw at nafauri Erusalem ay at nafangkamul at ngay ramraman. Aroro nusnga sinu at nafakamulun at mauri sas Yawi at furuan, nafakamulun at mauri sat fakesugun fag ngay taw. Nu katanya, Yawi at Mabalyanan glong te,

⁹ “Namaurianan au anya fagayu, ay at ngay fagsuguan namawayan anya fagayu ay namul at ngay fagagbilugun. Ay nu nfasludan ban takatanya, sumaful am te, Yawi at Mabalyanan at nasugu angku.”

^10-11 Yawi nalong te, “Fagayu am tagsis Siun, uroi useganani, aroro kadasug au ay namanwan gfagamutan ayu. Ay ginanya ban fag buknga ngayuk talun at namababaun ay at namauseganan angku. Ay kanya ban fagayu ku ngay taw yangay.” Nu nfasludan ban takatanya, sumaful am te, Yawi at Mabalyanan at nasugu angku stae sa ayu.

¹² “Ay Yawi gdog yay nangagbilug talun Uda laman at afud sit yud e malong fag talun. Ay gdog yay ban gfili Erusalem laman at furuan.

¹³ “Fagayu am maragangani sis Yawi at daga salubangan, aroro kanya kadasug siginan at fagbanwanan at yud e malong.”