Sakaryas 14 - Fanawbuid tagsibaliwas Fakayabian

Yawi Kadasug laman Namagtainan

¹ Umdasug ban sik menit laman Yawi nanginsaful. Gina ngay taw gdama, at ngay fawayan nu gafudan at naago fag ngay ramraman siginans taw Erusalem.

² Aroro ginanya ban Yawi namaful fagayu talun at ngay taw laman namawayan Erusalem. Ay kanya ban fagayu nangagbilug Erusalem, ay nangago fagayu nusnge wain sit ngay bale, ay namakamulun at mauri sa sangay mangena. Kanya fagayu nantaban sik wabilug ngay taw Erusalem sa tangayayu fag talun. Dewa katanya, at kinsawad ban gbanwan yay gugat sit furuan.

³ Nu katanya, Yawi namawayan tibak talun kata ebi at nafakamulun.

⁴ Ginanya ban fag menit, kanya nanmalindug sas Buksul Ulibu, sas Erusalem at fakamenitan baliwa. Kafag buksul umkafud dua siginans fakamenitan sitsigons fakayabian. At taguna fag afud umdugdug sabaliwas fawalan fag alvngvdan ay at faduak afud umdugdug sas fasiunan fag alvngvdan. Ay sit wabilug umke datag daul.

⁵ Ngay taw Erusalem nu glagyu am, sanya fag datag ay dalan, aroro kafag dalan gdasug sas Asel. Nanlagyu am kata ay mangaguyang at nafakamulun ebi gina guig, gina Usya at fun sis talun Uda. Yawi ku Dius kadasug gadgaloan at ngay tagbarita.

⁶ Ginanya ban fag menit, di maroy ay di marios.

⁷ Ginanya ban fag menit saman tua tibak menit, aroro wa ban kayabi, menit way lang. Yawi way lang tagsaful te, ginanya ban fag menit nu kadasug.

⁸ Ginanya ban fag menit, siginans Erusalem e sik mamam malyo gfamilugan. Ay sik afud mamam nanfamilugan sas Dagat at Mabulan ay sik afud nanfamilugan sas Mediteranyu fag Dagat. Ay gfamilugan tua gugat dewa mangune ay abagat.

⁹ Yawi namagtainan sas fagdaul daga. Kanya way lang at fagtoglagun fag Dius, ay at ngayan way lang ban takadungug.

^10-11 Ginanya ban namadatag wan fagdaul talun Geba sas fawalan fag alvngvdan sitsigons Rimun ay sas fasiunan fag alvngvdan Erusalem. Dewa katanya, Erusalem ban wa kabali, siginan Benamin at Sakbawan ay gtaglayun sa Taguna fag Sakbawan, sitsigons Sakbawan tagsis Fugungan, ay siginans Kananel fag bale ngabat fagulitan sitsigon fun at fagturisan rawvg ubas. Wa ban e gdog ya nanrasras Erusalem, ay at ngay tagbanwan ban gbanwan tua manabayan.

¹² Yawi ban namadasug at maksvn fag faurianan sa sangay talun at nanamawayan Erusalem: Ginanya ban fag menit, kanya fagayu at bilug, ay at mata, ay anggan at leplep kadan dewa yay gleleg.

^13-15 Ay katanya yangay ban at kumdasug sat ngay fagbaugun sit fagmafulan: sat ngay kabayu, mola, kamelyu, ay asnu. Yawi ban gfalakayan kanya fag ngay taw, ay galay ban at sadi gfawayan at kaiban, ay kanya yay ban fagayu tagawayan. Ay anggan ban tibak taw Uda namawayan yangay Erusalem. Ay kanya ban fagayu namul at kinfamato fag ngay ramraman: gintu, sanbung salapi ay at ngay lanbung.

¹⁶ Sanya ginan, at kinsawad ban fag ngay taw sas fagayu talun at nanamawayan Erusalem nangadasug sanya fag furuan laman nanseg Yawi ay nangasadi nangaful sabaliwa nu Kawat ngay Fayag.

¹⁷ Dewa katanya, tam Fun, Yawi at Mabalyanan, wa gfadasug ya arak sas fagayu at yud nalo sas Erusalem laman nanseg anya.

¹⁸ Ay anggan ngay taw Igiptu at yud nalo sas Erusalem, dumalan yangay Yawi at fagnamadasugun fag faurianan kata at kumfasludan sa sangay talun at yud nangalo sas Erusalem laman nangaful sabaliwa nu Kawat ngay Fayag.

¹⁹ Kata kanya at faurianan sa sangay taw Igiptu ay sas fagayu talun at yud nalo sas Erusalem laman nangaful sabaliwa nu Kawat ngay Fayag.

²⁰ Ginanya ban fag menit ngay talun nu nanseg Yawi, riruki sa sangay kabayu at ngay fadkalingan sik longan te, “Mafasamanan Laman Sas Yawi.” Ngay bisu tagsis Yawi at bale umsik mafasamanan yangay kata ngay taya tagsis fagirugan.

²¹ Ay fagayu bisu sis Erusalem ay sis Uda umyud e malong laman at mafasamanan sas Yawi at Mabalyanan. Aroro fagayu taw takadasug laman namon at fanggalangun namul kafag ngay bisu tiba laman at fagseudan. Ay ginanya ban fag menit, we gfalao ya sis Yawi at Mabalyanan at bale.