Sakaryas 12 - Fanawbuid tagsibaliwas Fakayabian

Erusalem at ngay Fawayan Umkamin

¹ Katatuy Yawi at longan sabaliwas Israel: Au, Yawi, at nawat banwa ay daga. Ay au wan tagfon leleg sa sangay taw.

² Ay Erusalem ban umkata sik fanlangu laman ban sit ligung fag ngay talun umsigung. Ay kanya ban fagayu nu nanamaurianan Erusalem, namaurianan yangay tibak furuan sis Uda.

³ Ginanya ban, namakata au sik gang mabyat furuan Erusalem, ay nusnga sinu ban fag talun at nated kafag gang, umfaurianan. Ay fagayu ban talun sas fagdaul daga nangaful laman namawayan Erusalem.

⁴ Dewa katanya, namalimu au kafag ngay talun at ngay kabayu ay namalakayan at ngay tagsakay. Au, Yawi, glong au te, nangulit au ngay taw Uda, ay namadarafun au at fawayan at ngay kabayu.

⁵ Taw Uda at ngay tagfangguna gamatangan te, “Ngay taw Erusalem mabitsug aroro at Dius, Yawi tua at Mabalyanan.”

⁶ “Ginanya ban fag menit, taw Uda at ngay tagfangguna namakata au singsing afuy tagigang sis tungud famaygang ay mannga kata sik tagigang fag sarab at nafasalung mafutusan fag fare. Ay namaurianan ngay furuan sit ligung, dewa katanya, ngay taw Erusalem di gafaurianan.

⁷ Ku fagnamababoun taguna, tibak furuan sis talun Uda, laman Dabid at kasugfunanan ay ngay taw Erusalem at fagmasineun wa nantungud talun Uda.

⁸ Ginanya ban fag menit, Yawi galaga ngay taw Erusalem, dewa at mamomuy umbitsug kata Dabid. Dabid at ngay kasugfunanan umke fagmabalyananun kata Dius, ay umkata Yawi at tagbarita tagfangguna anya fagayu.

⁹ Ay ginanya yangay ban, namamin kwan fagayu talun at namawayan Erusalem.

¹⁰ “Namon au sas Dabid at kasugfunanan ay sa sangay taw Erusalem sik mafangesug ay at mafandarangin fag falad. Kanya fagayu gdama angku at naurus, ay kata sik fagtainan gwayway at sisian tagsesadi nu nbul.

¹¹ Ginanya ban fag menit, sis Erusalem gwayway kata at kinfasludan sas Adad-Rimun sis datag Megidu.

^12-14 Fagayu ban talanan sas Israel gwayway: Dabid, Natan, Lebi ay Simei at ngay kasugfunanan ay tiba yak talananan. Ngay mangama ay ngay mangena mesa gwayway.”