Sakaryas 1 - Fanawbuid tagsibaliwas Fakayabian

Uroan laman Nangafoli sas Yawi

¹ Gina sis fawaluk magdanun sis faduak banwa, fun Daryu nu gfunan sis talun Persya, Yawi e nalong sas Sakaryas fag taglong. Sakaryas, Berekya at baguama, ay Berekya, Iddu at baguama.

^2-3 Yawi at Mabalyanan nasugu sas Sakaryas te, “Nanlong o sa sangay taw Israel te, “Maksvn nu kadotama au ay ngay mangaguyang. Nu katanya, afolii wan sa angku ay kafoli kwan sa ayu.

⁴ Lag am gfaning ay ngay mangaguyang at fakamulun. Nasugu koma sik ngay taglong laman nanlong sa anya fagayu te, ubuni wan at ngay fakamulun at mauri. Dewa katanya, wa nafanud ay wa nafaning angku.

⁵ Ay ngay mangaguyang ay kafag ngay taglong anbul wan.

⁶ Dewa katanya, anfasludan say ngay mangaguyang ku ngay nalong ay ku ngay famararang siginan ku ngay fagsuguan fag ngay taglong. Ay ay ngay mangaguyang namatangan ay nalong te, ‘Yawi at Mabalyanan nafaurianan antam kata tam nasalan ay at algan sa antam.’ ”

Taginfan sabaliwa ngay Kabayu

^7-8 Yawi e nalong sas Sakaryas fag taglong siginan sik taginfan sisad yabi gina sis faduak safulu e ufatk menit sis Sebat fag magdanun (at falabi sadik magdanun) gina sis faduak banwa fun Daryu nu gfunan. Katatuy at taginfan: Nalag au sik taw gsakay sis kabayu maraska. Ay kanya anragang sit madatag fag talun sit ke ngay fun kayu mirtu. Ay e gguyan anya ngay kabayu maraska, mafaraskan, ay malaksi.

⁹ Ay nainto au sat tagfakamatoan angku fag tagbarita te, “Ku Fun, nataw manga tuy fagayu at masuad?” Ay kanya gbalus angku te, “Namayamag au sa emu at masuad.”

¹⁰ Ay kafag taw at malindug sis wabilug ngay kayu mirtu, kanya wan at nafoyung sa angku te, “Yawi nasugu kanya fag ngay tagakabayuan laman matunglu sas fagdaul daga.”

¹¹ Ngay tagakabayuan nalong sas Yawi at tagbarita at malindug sis wabilug ngay kayu mirtu te, “Antunglu wami sas fagdaul daga ay manabayan tua.”

¹² Yawi at tagbarita ginto te, “Yawi at Mabalyanan, seduge tua ban nu yud o kafanyu Erusalem ay tiba yak furuan sis Uda? Nu kadotama o anya fagayu fitu wak safuluk banwa.”

¹³ Yawi nu gbalus at nafakamatoan angku fag tagbarita, malukme tua ay masun.

¹⁴ Ay tagbarita naringang sa angku te, “Foyungi te, ‘Katatuy Yawi at Mabalyanan at longan: maksvn nu kesug au Erusalem, at ngayan yangay te, Siun.

¹⁵ Dewa katanya, maksvn nu kadotama au ngay talun ayu daul takaylat way gfauseganan at leleg. Ay ya oma fia son maksvn nu kadotama au anya, ay kanya yay fagayu at nafaksvn.’

¹⁶ “Nu katanya, Yawi nalong te, ‘Kafoli kban e fakafanyun sas Erusalem, ay gdog kban namawat ku bale. Ay Erusalem ban katanya tua gugat.’ Au, Yawi at Mabalyanan, taglong tuy.”

¹⁷ Ay tagbarita nalong yangay sa angku te, “Katatuy Yawi at Mabalyanan at longan: ‘Gdog kyay namae ramraman ku ngay furuan tagsis Uda. Ay gdog kyay namasun Siun, ku nafili fag furuan Erusalem.’ ”

Taginfan sabaliwas Ufatk Sunge ay Ufatk Takawat

¹⁸ Sanya ginan, nabanawan au ay e nalag au ufatk sunge.

¹⁹ Ay nainto au sa tagfakamatoan angku fag tagbarita te, “Nataw kafag ngay sunge at masuad?” Kanya gbalus angku te, “Kanya fag ngay sunge at nafarapyag ngay taw Israel ay Uda, anggan ngay taw Erusalem.”

²⁰ Sanya ginan, Yawi nafalag angku ufatk takawat nusnge wain.

²¹ Nainto au te, “Nataw ro kafag ngay takawat at fagnamakamulunun?” Ay kanya gbalus te, “Kanya fagayu namalimu ay nanlifung kanya fag ngay sunge. Aroro kafag ngay sunge at masuad, ngay talun at narasras Uda ay at nafarapyagan at ngay taw.”