Rut 4 - Fanawbuid tagsibaliwas Fakayabian

Buas Andadwa sas Rut

¹ Ay Buas nasas sakbawan furuan ay namalunggung sanya. Ay Elimelek at kalongan fag mangama nu nadalan, Buas nalong sa anya te, “Sama, gewan, malunggungi ste.” Ay kafag mangama namalunggung.

² Sanya ginan, Buas nafaful safuluk fagtainan sis furuan ay nafalunggung yangay.

³ Ay Buas nalong sat kalongan te, “Nuemi anfoli wan siginans Muab, ay kaylat gfalo Elimelek at daga.

⁴ Ay namatangan au te, namasaful kyap sa emu. Nu kaylat tuo, bayadi wan kanya fag daga sis salubangan ngay fagtainan ay sat ngay malunggung ste. Ay nu dway o kaylat, longi angku laman sumaful au. Aroro o tua fia at masine gbul kafag daga; au at fadua kway.” Ay kafag mangama nabalus te, “Kin, gbul kwan.”

⁵ Ay Buas nalong yay fia te, “Ay nu nabayad ro wo sas Nuemi kafag daga, at masine, aylati yangay anggan Rut fag fagbubayun tagsiginans Muab laman am bubay ban. Laman ban nu nke sisian am, tam kalongan tua gugat tagagbilug kafag daga.”

⁶ Ay kafag mangama nu nadungug katanya, nalong te, “Nu katanya way ngaro, kwa mabayad kanya fag daga aroro manke mamalong kban sa ku sadili daga aroro nu nke sisian ban mi siginan kafag mangena, em ngay sisian kae afud yangay siginan ku daga. Oi wan tagbul, aroro kwa kaylat takatanya.”

⁷ Ebi katatuy at faugali sis Israel: sik taw nu gbayad sik daga mannga nu gfalin sat iba at fagagbilugun fag daga, at fakamulun, tagfalao gbul at sadi at lapak ay gfon sat fagfaloan. Katanya at fakamulun laman gfamafanud at nasadian.

⁸ Ay kanya fag mangama fagnalong di te, “Oi wan tagbayad kanya fag daga,” nabul at sadi at lapak ay nafon sas Buas.

⁹ Ay Buas nalong sa sangay fagtainan sis furuan ay sa sangay taw te, “Am wan ku ngay tagfatuyan katsi fag menit nu gbayad au Elimelek at daga, Kilyun ay Maklun at fagagbilugun.

¹⁰ Ay saman kanya, nangadadwa au sas Rut tagsiginans Muab fag fagbubayun, laman ban nu nke sisian ami, Maklun at lutuk si tua gugat at talanan.” Sanya ginan, Buas nalong sa sangay taw te, “Siginan katsi fag menit, am wan tagfatuyan em nasadian.”

¹¹ Ngay fagtainan sis furuan ay fagayu taw at malindug sis sakbawan furuan gbalus te, “Kin, ami wan tagfatuyan. Nangus ban am bubay umke ngay sisian kata Yawi at nafakamulun sas Rakel ay Lia at kin-ke ngay sisian, ngay taw Israel at fagsigadan. Ay o Buas, nangus umsik maramraman o sis Efrata ay umsik takadungug sis Betleem.

¹² Yawi ban nangus gfae ngay sisian ayu, ay siginan kafag mangena gfasik takadungug am talanan kata nu gfasik takadungug Peres at talanan, Uda at baguama sis Tamar.”

Dabid at ngay Mangaguyang

¹³ Nu katanya, Buas andadwa sas Rut, ay Yawi nafamanyun ay Rut nafafion ay nafasalug sik munama.

¹⁴ Ngay mangena nalong sas Nuemi te, “Fauseganani Yawi! Aroro Yawi nafon emu am fufu laman nangalaga ban emu. Ay kanya ban umsik takadungug sas Israel.

¹⁵ Ay at namabitsug ban am amatanganan ay at nangalaga emu gina o anfufuina, aroro am nugang nu kesug emu gtungud yap tua fituk sisian nu mafangesug.”

¹⁶ Nuemi nangurug way gugat kanya fag ngenge ay sia wan takamato.

¹⁷ Ay Nuemi at ngay fasabale mangena glong te, Nuemi e fufu sik munama! Ay nafangayan kafag munama te, Ubed. Ay Ubed nu nbia wan, nafamubay ay anke sisian ay nafangayan te, Ese. Ay Ese nu nbia wan, nafamubay yangay ay anke sisian ay nafangayan te, Dabid.

¹⁸ Peres at ngay kasugfunanan sitsigons Dabid: Peres, Kesrun at mama,

¹⁹ ay Kesrun, Ram at mama, ay Ram, Aminadab at mama,

²⁰ ay Aminadab, Naksun at mama, ay Naksun, Salmun at mama,

²¹ ay Salmun, Buas at mama, ay Buas, Ubed at mama,

²² ay Ubed, Ese at mama, ay Ese, Dabid at mama.