Rut 3 - Fanawbuid tagsibaliwas Fakayabian

Rut at Fagetun sas Buas

¹ Sik menit, Nuemi nalong sas Rut te, “Nugang, ku fakaylatun te, fanmangamai wan laman ban sam fagmabayanun.

² O gamatang o Buas tam kalongan, am fadgaloan fag ngay mangena at tagfayafun? Katsi ro fag yabi, kanya nanlayap at barli.

³ Nu katanya, nangigus o, ay rarusi sa am bilug at mabebanglu, ay suluni am lanbung at masine fia ay loi sas fagruyusan. Dewa katanya, lag yap ro wo galagan yakmay nafangon ay nainum.

⁴ Kanya ro nu nantiug wan, uliti nu inda ro at fagnantiugan. Ay nu glag o te, kanya gtiug wan, akbangi anya ay urugi at umut si baliwa at darafa, ay tiugi yangay sanya, ay nu nfulo ro, kanya ro glong sa emu am fagnamakamulunun.”

⁵ Ay Rut nabalus te, “Kin, namakamulun kro fagayu am nalong sa angku.”

⁶ Nu katanya, Rut nu nafalganan wan, kanya nalao sas fagruyusan laman namakamulun at nugangina at ngay nalong anya.

⁷ Buas nu nafangon wan ay nainum, mabayan wan at amatanganan. Ay nataygilidan sis tigyangan fafulan barli ay natiug. Ay Rut garimanan nangakbang sas Buas ay naurug at umut si baliwa at darafa ay natiug yangay sanya.

⁸ Ay nu gakawabilug yabiun wan, Buas anfulo, ay anlipsik aroro e sik mangena gtaygilidan sit day darafa.

⁹ Ay Buas nainto te, “Sinu o?” Rut nabalus te, “Rut au, munakbang kyangay am kalongan. Umuti angku am umut laman gfalag o te, galaga ban angku ay am bubay ban.”

¹⁰ Ay Buas nalong te, “Baguina, Yawi nangus gfamanyun emu. Aroro am nafalag sam talanan fag fagmatuyanun gtungud yap tua ebi, ay di o narvbvy at mabaguama, ay at maramraman ay at yud e kwa.

¹¹ Baguina, lag o gafanawa. Namakamulun kban fagayu am fagetun, aroro fagayu ku fasabale saful te, sik matuyan tuo fag mangena.

¹² At matuyan, au am kalongan kyangay, ay e fagmabalyananun kyangay ggubuk emu, dewa katanya, e munakbang yay o kalongan saman angku.

¹³ Stei yap tuy fagngabak yabi, ay balabag ban sbalabag sumaful ta ku kalongan at algan laman sa emu. Ay kanya ban nu kaylat tua, masine, ay nu dway ban kaylat, gfatuyanan au sas Yawi, tagleleg fag Dius te, namafasludan kban ku fanambagun sa emu. Ay katsi fag yabi, stei yap nu gtiug o.”

¹⁴ Ay Rut natiug wan sis Buas at day darafa. Ay nu gakamenitun wan, Rut anfulo, aroro Buas wa kaylat nu e nasaful te, Rut siginans fagruyusan.

¹⁵ Ay Buas nalong sas Rut te, “Rafadi am fangumutan fag lanbung,” ay nu narafad wan, Buas nasuad unumk fabudbungguan barli, ay nafafasanan wan sas Rut ay noli wan.

¹⁶ Rut nu ndasug wan sat nugangina, Nuemi nainto anya te, “Nugang, tain am nasanyan?” Ay Rut nafansulit Buas at ngay nafakamulun sa anya.

¹⁷ Ay Rut gfataglayun glong te, “Buas wa kaylat nu guli au kway e buba, kanya nafon sa angku unumk fabudbungguan barli.”

¹⁸ Nuemi nalong te, “Fanyai way gugat, yakmay o nasaful at kafungfungan, aroro Buas ro wa gfaragang yakmay nafasine katsi fag menit am ngay fagetun sa anya.”