Rut 2 - Fanawbuid tagsibaliwas Fakayabian

Rut Natoglag Buas

^1-3 Sik menit, Rut nalong sas Nuemi te, “Kaylat au nangalo sa sangay faggutluan laman nanfamuyutan ngay taggutlu at nagfatongan, tagbilug ro nu ddi gaiyan angku.” Ay Nuemi nabalus te, “Agvd.” Nu katanya, Rut nalao wan, ay nu kamuyutan antunggu sis Buas at gamasun, Elimelek at kalongan. Buas sik taw at maramraman ay maseganama.

⁴ Ginanya fag buknga, Buas siginans Betleem ay nasat gamasun, ay kanya nalong sat ngay taggutlu te, “Yawi nangus sumawa fia ayu.” Ay at ngay taggutlu gbalus te, “Suma yangay nangus fia emu.”

⁵ Ay Buas nainto sat fagfatigwanan tagfangguna ngay taggutlu te, “Sinu atsi fag mangena?”

⁶ At fagsuguan nabalus te, “Kanya fag mangena siginans talun Muab, ay nanangalo Nuemi gina kafoli stae.

⁷ Ay kanya nafainfanyuan sa angku te, ‘Nanfamuyutan kma ngay taggutlu at ngay nagfatongan.’ Siginans balabag kanya ste wan ay kamuyutan wa gugat. Ay katsi gfiangalay yay sis bale famoy.”

⁸ Nu katanya, Buas nanangakbang Rut ay nalong te, “Nu nanfamuyutan ban o, lag sa ya tibak gamasun, stie way o gugat, adgaloani ku ngay fagsuguan fag mangena.

⁹ Nu inda ban ku ngay tagfakamulun nu ggutlu, aloi ban gugat anya fagayu. Nalong kwan sa anya fagayu te, lag gaiyan emu. Ay galay ban o kadanum, nanginum o sa ku ngay fagsuguan at ba mamam sit ngay baringan.”

¹⁰ Rut narungan sas Buas at daga salubangan laman gsuyu ay glong te, “Wain am fagmalukmeun sa angku ay sik betaw kway ste fag talun?”

¹¹ Ay Buas nabalus te, “E nafansulitan sa angku sabaliwa am ngay nafakamulun sam nugangina, siginan am indugan nu kabul. Ay e nalong yangay angku te, naubun wo am mama ay am mina ay fagayu am kalongan laman namanwan sam fagyudun toglag fag ngay taw.

¹² Nu katanya, Yawi ban nangus gfon emu nusnge wain aroro sam ngay nafakamulun. Yawi, Israel at Dius, am fakakbangan gfamut yay ban at ngay fon emu.”

¹³ Rut nalong te, “At kalukme o sa angku. Nafabitsug o ku amatanganan ay masine tua am ngay nalong, dewa au yud am fagsuguan.”

¹⁴ Nu fanfangonan wan, Buas nalong sas Rut te, “Gewan, nanfangon watam. Buli sik fakonun ay fasurungi sas famaenamnam.” Ay Rut namalunggung gasfuan ngay taggutlu. Ay Buas nafon sas Rut sanglayan trigu ay kon yakmay napsug ay e fasawadan yay.

¹⁵ Ay Rut anlindug laman gdog nanfamuyutan. Ay Buas nalong sat ngay fagsuguan te, “Lag am gfapla anya, dewa at fagfuyutun munakbang si ay ngay futusan.

¹⁶ Ay buli tiba siginan ay futusan ay famatoi, ay lag am gsalag anya.”

¹⁷ Rut kamuyutan yay gugat yakmay menit anfalyu, ay nu naruyus wan, at kayuan gwabilug saku.

¹⁸ Ay Rut nabuba at nafamuyutan sat bale ay nafalag sat nugangina. Ay nafon yangay aro taw at matawan at sawad.

¹⁹ Ay Nuemi nainto anya te, “Dada nu nanfamuyutan o? Sinu ke gamasun? Dius nangus gfamanyun kanya fag taw at namalukme sa emu.” Ay Rut nabalus te, “At ke gamasun Buas.”

²⁰ Ay Nuemi nalong sas Rut te, “Yawi ban nangus gfon tua gugat sas Buas, aroro nafalag at fagmasineun sas fagayu taw tagleleg ay dewa sat kinbul wan.” Ay nalong yangay te, “Kanya fag taw ta kalongan ay e fanambagun yangay ggubuk anta.”

²¹ Rut nalong sas Nuemi te, “Buas nalong yangay sa angku te, galay kban nanfamuyutan galo kway gugat at ngay fagsuguan fag ngay mangena, yakmay ban antabu nu ggutlu.”

²² Ay Nuemi nalong yay fia sas Rut te, “Nugang, nangalo way ban o gugat at ngay fagsuguan fag ngay mangena, aroro nu sa way ban o tibak gamasun, mauri way ban manga at kumdasug sa emu.”

²³ Nu katanya, kaduge e faggutluun, Rut galo way gugat Buas at ngay fagsuguan fag ngay mangena laman kamuyutan barli ay trigu at ngay raug. Ay Rut gbanwan tua gugat sit bale gufud at nugangina.