Ruma 8 - Fanawbuid tagsibaliwas Fakayabian

Gfaning at Masine fag Falad

¹ Nu katanya, at kinsadi sa tam Fun Isus, kanya ban di gafaurianan.

² Siginan at Masine fag Falad at fagmabalyananun, kanya wan tagfaleleg angku sa tam fagmasadiun sa tam Fun Isus, kanya nafalfas angku siginans asalanan ay fakabulun at fagmabalyananun.

³ Dius nafakamulun Muisis at Faugali at fagyudun makatu, aroro kafag faugali anmomuy siginans asalanan at fagmabalyananun, ay wa nakatu gfalfas antam. Dius nasugu at Baguama kata sik taw tagasalanan, laman sik fanggalangun aroro sa tam asalanan, ay nu katanya, Dius nafatabu wan asalanan at fagmabalyananun. Ay at fagnafasteun swa daga laman gfoyung te, asalanan we fagmabalyananun ya.

⁴ Dius nafakamulun katanya laman namafasludan tam Muisis at Faugali, itam at yud ya gfaning tam bilug at fakaylatun, nu bunway tagfaning tua at Masine fag Falad.

⁵ Nusnga sinu tagfaning at bilug at fakaylatun, kanya at amatanganan sa way gugat at bilug at fakaylatun. Ay nusnga sinu tagfaning at Masine fag Falad, kanya gamatangan tua gugat sat Masine fag Falad at fakaylatun.

⁶ Tagamatangan gugat sabaliwa at bilug at fakaylatun, at fakadasugan ban sa ways fakabulun. Ay tagamatangan tua gugat sabaliwa at Masine fag Falad, kanya ban e leleg tua ay e fagmanabayanun.

⁷ Tagamatangan gugat sabaliwa at bilug at fakaylatun, gfawayan Dius. Wa kaylat gfaning at Faugali, ay wa makatu gfaning.

⁸ Ay nusnga sinu tagfaning at bilug at fakaylatun wa mafauseganan Dius.

⁹ Ay dewa katanya am, diam gfaning ya ay bilug at fakaylatun, nu bunway gfaning tuam at Masine fag Falad, Dius at Masine fag Falad nu gbanwan tua si ayu. Ay tam Fun Isus at Masine fag Falad nu dway gbanwan sas nusnga sinu fag taw, kanya bunwa tam Fun Isus at taw.

¹⁰ Ay dewa katanya, tam Fun Isus nu si tua ayu, ay bilug dewa nbul aroro sa ay asalanan, at Masine fag Falad gfaleleg ayu aroro antap am kata nu yud am e asalanan.

¹¹ At Masine fag Falad nafaleleg Isus tam Fun siginan at fagmabulanan. Ay kanya gfaleleg yangay ban ay ngay bilug takabul, aroro kanya gbanwan tua si ayu.

¹² Nu katanya, ku ngay faduksay, tam fakamulun at masinei tua, lag tam gfakamulun ya tam bilug at fakaylatun.

¹³ Aroro nu gfaning way am ay bilug at fakaylatun, kabul ban am. Ay dewa katanya, nu gfabul tuam ay bilug at fakaylatun siginan at Masine fag Falad at fagmabalyananun, gleleg tua ban am.

¹⁴ At Masine fag Falad at nataban fag ngay taw, kanya wan Dius at ngay sisian.

¹⁵ Aroro Dius at nafon ayu fag Falad, wa namagsuguanan ayu sas fakalimuun, nu bunway nafon antam at fagmasineun guro sas Dius te, “Ku Mama.”

¹⁶ At Masine fag Falad gfadiuganan tagsi antam fag falad te, itam wan Dius at ngay sisian.

¹⁷ Ay aroro Dius tua tam at ngay sisian, nangagbilug yangay ban tam Dius at nafalganan sat ngay taw gasfuan tam Fun Isus. At masine nu gagwantan yangay tam kata anya ebi, laman nangagbilug ban tam at fagmasineun.

Tam Fagmanabayanun Ban

¹⁸ Nu gamatangan au, tam ngay fagidapun katsi wa mafaladlabian sa takasure ban sa antam fag fagmasineun.

¹⁹ Fagayu at awatan maksvn nu gfanya Dius nu gfasure at ngay sisian.

²⁰ Dius at ngay awatan wa nadasug sas Dius at algan laman sa anya fagayu. Anfasludan takatanya bunwa aroro katanya ngay awatan at fakaylatun, nu bunway Dius wan at ke fakaylatun takatanya. Dewa katanya, at ngay awatan e fagsegun yay,

²¹ aroro Dius namalfas yay anya fagayu siginans fakadanun. Nu katanya, Dius at awatan umkalfas yay ay umke fagmanabayanun yangay kata at fagnamonun ban sat ngay sisian.

²² Ay saful tam te, Dius at awatan gfandeng gidapan dasug katsi, kata sik mangena nu gfasalug.

²³ Ay bundi lang kanya fagayu tagfandeng gidapan nu bunway anggan tua itam at nabul at Masine fag Falad. Kanya Dius at nafon sa antam taguna, kaduge tam gfanya Dius nu gfalangfe tam ngay bilug ay gfasure fagdaul at fagmatuyanun te, Dius watam at ngay sisian.

²⁴ Anlangfe watam, ay e fagsegun tua tam takatanya. Dewa katanya, tam fagsegun bunwa fagsegun ya nu nalag watam tam fagfanyaun. Aroro sinu tagfanya yay dewa nalag wan?

²⁵ Ay nu gfanya tua tam tam nayud yay nalag, gugatan tua tam gfanya.

²⁶ At Masine fag Falad ggubuk antam sa tam fagmamomuyun. Ya tam saful nusnge wain tam fagdaranginun, dewa katanya, at Masine fag Falad tagfaman antam gdarangin sas Dius, ay ginas tam fagyudun makatu garingang.

²⁷ Dius, tagsaful taw at amatanganan, nasaful yangay at Masine fag Falad at amatanganan, aroro at Masine fag Falad tagwabilug Dius ay at ngay taw, gfaning Dius at fakaylatun.

²⁸ Ay nasaful tua tam te, Dius gfakamulun tua gugat nusnge wain at masine sas fagayu takesug anya, at masuad, sat nauro fag ngay taw gfaning at algan.

²⁹ Dius nasaful wan at nafili fag ngay taw siginans fakasigadan, ay kanya yangay at nafalganan laman at namaning at Baguama, laman at Baguama wan ngayuk duksayan at kaka.

³⁰ Ay Dius nauro at ngay nafalganan. Ay kanya nafangayan at ngay nauro te, kata nu yud e asalanan. Ay kanya nafon at fagmasineun sa anya fagayu.

Dius nu Kesug

³¹ Nataw ya tam longan sa takatanya fagayu? Dius nu siwa antam, sinu at mafabadbaboan antam?

³² Kanya nu ddi nadgaragun gfon at Baguama sas fakabulun, ay nafon tua anya sa antam, o nunda ro wa gfon sa antam fagayu nusnge wain, gasfuan at Baguama?

³³ Sinu at malong te, Dius at ngay nafili e asalanan? Dius wan at nafangayan kafag ngay taw te, kata nu yud e asalanan.

³⁴ Nu katanya, sinu ya at mafaurianan antam? Tam Fun Isus bundi lang anbul ay nadog naleleg, nu bunway kanya malunggung yangay sis Dius at siun, ay gwabilug antam gdarangin sas Dius.

³⁵ Sinu at mafasaruayan antam siginan tam Fun Isus at fakesugun? O famaskud, ay fagidapun, ay faurianan, ay fanlunus, ay fagyudun e lanbung, ay fagmalimuun, ay fakabulun?

³⁶ Kata at kinriruk te, “Aroro sa ayu fagngabak menit si wamis fakabulun. Antap wami kata sik fagnamabulun fag ngay tupa.”

³⁷ Dewa katanya, gbabo way tam takatanya fagayu aroro tam Fun Isus takesug antam.

³⁸ Aroro natuyan kwa te, dewa fakabulun, ay leleg, ay ngay tagbarita, ay at mauri fag ngay falad, ay katsi fia fag buknga, ay takadasug yay ban, ay at ngay mabalyanan,

³⁹ ay fagayu awatan tagsis tungud, ay tagsis daga daga, ay nusnge wain fag awatan wa mafasaruayan antam siginans Dius at fakesugun at nafalag sa antam siginans Isus tam Fun.