Ruma 7 - Fanawbuid tagsibaliwas Fakayabian

Wam si yas Muisis at Faugali

¹ Ku ngay faduksay, saful tuam sabaliwas Muisis at Faugali. O nunda yam nasaful te, sik faugali e fagmabalyananun sas taw kaduge kafag taw gleleg?

² Kata tuy sik fafaskudanan: sik mangena kaduge at mangama gleleg, kanya masadi sa anya. Ay dewa katanya, at mangama nu nbul wan, kanya nalfas wan siginan kafag faugali sabaliwa sik dadwa.

³ Kafag mangena nu nanfamatugtug way sa tibak mangama, kaduge at mangama gleleg, kanya anke asalanan. Ay at mangama nu nbul wan, kafag mangena nalfas wan siginan kanya fag suguan. Kanya bunwa sik takamatugtug dewa nafangindugan sa tibak mangama.

⁴ Ku ngay faduksay, katanya yangay am. Siginan tam Fun Isus at nabulanan, anbul wam sabaliwas Muisis at Faugali, ay ansadi tuam sas Isus, kanya at nadog naleleg siginans at fagmabulanan. Fakatanyaun, laman e tungkul tuam sas Dius.

⁵ Ebi gina tam gfaning tam bilug at fakaylatun, tam fagugaliun tam bilug way at fakaylatun, nustua Muisis at Faugali nafamut yay tam ugali takatanya, ay takatanya gfadasug way antam sas fakabulun.

⁶ Dewa katanya, Muisis at Faugali wa gagbilug ya antam, kata wan nu nbul tam. Ay kafag Faugali we fagmabalyananun ya sa antam. Nu katanya, katsi e bagu watam ugali siginan at Masine fag Falad.

Muisis at Faugali ay Asalanan

⁷ O katsi glong tam te, Muisis at Faugali fagsigadan way at maksvn fag asalanan? Ida, duan. Dewa katanya, nu dway ro e takatanya fag Faugali, kwa ro nasaful te, e asalanan. Muisis at Faugali nu dway nalong te, “Lag gfangalabian,” kwa ro nasaful fagfangalabianun.

⁸ Ay aroro siginans Muisis at Faugali, asalanan nafulo ku amatanganan sas fagayu dalan fagfangalabianun, aroro nu dway ro e Faugali, asalanan ro we fagmabalyananun.

⁹ Ebi taguna, kwa saful sabaliwas Faugali, dewa katanya, fagnasaful kdi, asalanan ngaro gleleg si angku, ay kanya nataban angku sas fakabulun.

¹⁰ Ku fagsegun suguan gfon angku leleg, ay aroro mangaro kanya nafadasug way angku sas fakabulun.

¹¹ Aroro asalanan anke buknga siginan kafag suguan laman gdaya angku. Ay asalanan nafabul angku siginan kafag suguan.

¹² Muisis at Faugali anggan at ngay suguan we malong, ay matuyan ay masine.

¹³ O at masuad at masine yay tagtaban angku sas fakabulun? Ida duan. Asalanan at nafabul angku siginan at masine, laman namalag sa angku asalanan at kaugalian. Nu katanya, Muisis at Faugali nafatuyan te, kaksvn nya asalanan nu mauri.

Nu Gfabadbaboan tam Asalanan

¹⁴ Nasaful tam te, Muisis at Faugali siginans Dius, ay dewa katanya, maksvn ku fagmauriun ay nafagsuguanan au asalanan.

¹⁵ Kwa nasaful ku fakamulun. Aroro kwa mafakamulun ku fakaylatun fag fakamulun. Ku fagfakamulunun, ku fakauriun way fag fakamulun.

¹⁶ Katsi ku fagfakamulunun nu ku fagyudun way kaylat fag fakamulun, at masuad gafanud au te, masine Muisis at Faugali.

¹⁷ Nu katanya, bunwa au tagfakamulun takatanya, nu bunway asalanan way tagbanwan si angku.

¹⁸ Nasaful au te, we masine ya tagbanwan si angku. Dewa maksvn nu kaylat au namakamulun at masine, kwa mafakamulun.

¹⁹ Kwa mafakamulun fagayu nusnge wain at masine ku fakaylatun gfakamulun. Ku fagfakamulunun at mauri way, ku fagyudun kaylat.

²⁰ Nu gfakamulun kway ku fagyudun kaylat fag fakamulun, bunwa au ya tagfakamulun takatanya, nu bunway asalanan way tagbanwan si angku.

²¹ Nu katanya, katatuy ku nalag si ku sadili: nu kaylat au gyafakamulunun at masine, ku nafakamulun ro at mauri way.

²² Sas fagdaul ku amatanganan guseganan au sas Dius at Faugali.

²³ Dewa katanya, e nalag kyay tibak fagmabalyananun si ku bilug, ay kanya gfabadbaboan ku amatanganan. Aroro katanya nafagsuguanan au asalanan at fagmabalyananun tagfakamulun si ku bilug at ngay afud.

²⁴ Afanyuan kway lang. Sinu ban manga tagfalangfe angku tuy fag bilug tagfadasug angku sas fakabulun?

²⁵ Guseganan au sas Dius, kanya nafalangfe tua angku, siginans Isus tam Fun. Katatuy ku kayaunanan. Ku amatanganan gfaning au Dius at ngay suguan, ay ku bilug gfaning asalanan at suguan.