Ruma 6 - Fanawbuid tagsibaliwas Fakayabian

Bagu fag Leleg siginans Isus tam Fun

¹ Nu katanya, nataw tam longan? O namataglayun tam gasalanan laman Dius at fagmagalangun umkayu?

² Ida, deyud. Anbul watam sas asalanan. Nu katanya, lag tam gfataglayun ya nu gasalanan tam.

³ O nunda wam nasaful te, fagayu tam at kinsurung laman sa tam fagmasadiun sa tam Fun Isus, ansadi yangay tam sat fakabulun?

⁴ Ansurung tam kata nu e nanamoli antam gasfuan anya gina anbul, laman nu setain Dius at fagmabalyananun nu nafaleleg tam Fun Isus siginans fagmabulanan, katanya yangay manamanwan tam sat bagu fag ugali.

⁵ Aroro nu nsadi tua tam sat nabulanan, ansadi yangay tam sat nadogan naleleg.

⁶ Saful watam te, tam dan fag ugali anrabing wan sas fasulungan kayu gasfuan tam Fun Isus, laman tam dan fag ugali kamin wan, ay laman wa tam gafagsuguanan ya sas asalanan.

⁷ Aroro sik taw at kinbul wan, nalfas wan siginans asalanan at fagmabalyananun.

⁸ Ay dakngani anbul watam gasfuan tam Fun Isus, gafanud watam te, gleleg yangay ban tam gasfuan anya.

⁹ Aroro nasaful watam te, tam Fun Isus ban wa kabul ya kabavn aroro kanya nadog wa naleleg siginans fagmabulanan. Fakabulun we fagmabalyananun ya sa anya.

¹⁰ Kanya sadi ginan way kabul, laman gbayad fagayu taw at asalanan, ay katsi gleleg tua laman gfauseganan Dius.

¹¹ Katanya yangay, tapi ay sadili te, anbul wam sas asalanan at fagmabalyananun, ay gleleg tuam laman gfauseganan Dius siginan ay fagmasadiun sa tam Fun Isus.

¹² Nu katanya, lag am gfagbilug ya sas asalanan ay bilug takabul way, laman diam gafagsuguanan ya ay bilug at fakaylatun.

¹³ Lag am gfon ay bilug at ngay afud sas asalanan laman gfakamulun am at mauri, nu bunway foni ay sadili sas Dius aroro kanya nafadog tua nafaleleg ayu siginans fagmabulanan. Ay foni ay bilug at ngay afud sas Dius, ay ugalii kata sik ngay taw at nadog naleleg siginans fagmabulanan.

¹⁴ Aroro asalanan wa magbilug ya ayu, aroro wam si yas Muisis at Faugali, nu bunway si tuams Dius at fagmagalangun.

Fagmasineun at ngay Fagsuguan

¹⁵ Nu katanya, nataw tam fagnamakamulunun? O gfataglayun tam gasalanan aroro wa tam si yas Muisis at Faugali, nu bunway si watams Dius at fagmagalangun? Ida, deyud.

¹⁶ Nasaful tuam te, nusnga sinu tam fagfaningan, kanya gfagsuguan antam. Tam fagfaningun nu asalanan way, kanya gfadasug way antam sas fakabulun, ay tam fagfaningun nu Dius tua, kanya gagbilug antam, nu katanya tam fakadasugan ban sa tuas fagmatuyanun.

¹⁷ Guseganan au sas Dius te, ebi dewa am gafagsuguanan asalanan, katsi gfaning tuam ku nafoyung sa ayu fag foyungan, sas fagdaul ay amatanganan.

¹⁸ Nalfas tuam siginans asalanan, ay katsi fagmatuyanun tua tagfagsuguan ayu.

¹⁹ Gfoyung au sa ayu at masakit katogdungug fag foyungan, aroro ya maksvn ay amatanganan. Ebi nafon am ay bilug at ngay afud laman gafagsuguanan am fagmasuyaun ay fagmauriun at nafae asalanan ayu. Ay katsi foni yangay ay bilug at ngay afud laman gafagsuguanan am fagmatuyanun laman diam e malong.

²⁰ Gina am gafagsuguanan asalanan, yam gagbilugan fagmatuyanun.

²¹ Nataw ay nabul siginan ay nafakamulun ebi ay fakaplaun katsi? Takatanya fag ugali at fungfung fakabulun way.

²² Ay katsi nalfas wam siginans asalanan, ay Dius tuam at ngay fagsuguan. Ay sanya ginan anke leleg tuam at yud e fakatabuan.

²³ Aroro asalanan at famayad, fakabulun, ay dewa katanya, Dius at famonun leleg tua at yud e fakatabuan siginans Isus tam Fun.