Ruma 5 - Fanawbuid tagsibaliwas Fakayabian

Tagsiginans Dius fag Fagmanabayanun

¹ Nu katanya, dakngani antap watam kata nu yud tam e asalanan siginan tam fagafanudun, e fagmanabayanun tua tam sas Dius siginan tam Fun Isus.

² Aroro siginan anya nabul watam tuy fag fanggalangun ay guseganan tam aroro e fagsegun tua tam te, namaudgufudan ban tam Dius sat fagmasineun.

³ Ay bundi lang katanya, nu bunway guseganan yangay tam dewa tam gidapan, aroro saful tam te, kaduge tam gidapan, kananad tam gagwanta,

⁴ ay nu gagwanta tua tam, kaksvn tam, ay nu nkaksvn tua tam, e fagsegun tam.

⁵ Ay di ban umfangulan tam fagsegun aroro Dius at fakesugun siwa tam basad siginan nu gfon sa antam at Masine fag Falad.

⁶ Ebi gina tam mamomuy yay, tam Fun Isus anbul sit kasakan fag buknga laman sa sangay tagasalanan.

⁷ Gsadsadian way at mafon at leleg laman sa sik taw matuyan, dewa katanya, malgau e mafon at leleg laman sa sik taw masine.

⁸ Ay dewa katanya, tam Fun Isus anbul aroro sa antam gina tam sik ngay tagasalanan yay. Katanya Dius nu gfalag sa antam te, kesug antam.

⁹ Nu katanya, dakngani antap watam kata nu yud tam e asalanan siginans Isus at taguk at kinbusbus, matuyan umlangfe ban tam siginans Dius at fandotaman.

¹⁰ Ebi Dius way tam at ngay fawayan, dewa katanya, katsi ansadi tua tam sas Dius siginan at Baguama at nabulanan. Ay dakngani ansadi tua tam sa anya, matuyan, umlangfe tua ban tam siginan at Baguama at leleg.

¹¹ Bundi lang katanya, nu bunway guseganan tam sas Dius aroro at nafakamulun siginan tam Fun Isus. Siginan anya, ansadi tua tam sas Dius.

Isus ay Adan

¹² Asalanan andasug ste swa daga siginan sadik taw, ay asalanan nafadasug fakabulun. Ay nu katanya, fakabulun anrapyag sas fagayu taw aroro fagayu taw e asalanan.

¹³ Asalanan ste wa gugat swa daga siginan yay nu yud andasug Muisis at Faugali. Dewa katanya, nu dway ro e Faugali, wa ro kasaful te, e asalanan.

¹⁴ Aroro katanya, fakabulun e fagmabalyananun yay gugat siginans Adan sitsigons Muisis, taw at asalanan deyud kata Adan at fakamaboun. Adan fafaskudanan sa takadasug yay ban, at masuad tam Fun Isus.

¹⁵ Dius at fagmagalangun wa kata Adan at fakamaboun. Ngayuk taw anbul siginan Adan at nafamaboan, dewa katanya, Dius at fagmagalangun andasug siginan sadik taw, kafag taw Isus, Dius at nafili fag Fun.

¹⁶ Dius at fagmagalangun ay Adan at asalanan gbia tua at nagsamanan. Aroro asalanan at fungfung sa ways faurianan. Ay dewa katanya, siginan Dius at fagmagalangun, ngayuk taw antap kata nu yud e asalanan, dewa ngayu at asalanan.

¹⁷ Fakabulun at fagmabalyananun gfunan sas fagayu taw siginan sadik taw at asalanan. Ay dewa katanya e leleg tua ban tam aroro siginan sadik taw, Isus, Dius at nafili fag Fun. Matuyan e leleg tua ban tam nu nabul tua tam Dius at fagmagalangun ay nu ntap tua tam kata nu yud tam e asalanan.

¹⁸ Nu katanya, siginan sik taw at asalanan, andasug faurianan sas fagayu taw. Katanya yangay, siginan sik taw at fakamulun at masine, fagayu taw antap kata nu yud e asalanan, ay e bagu leleg.

¹⁹ Fagayu taw antap te, tagasalanan, siginan sadik taw at nafamaboan. Katanya yangay siginan sadik taw at nafaningan Dius, ngayuk taw at kintap kata nu yud e asalanan.

²⁰ Muisis at Faugali andasug laman gfasaful sa antam te, kaksvn nya nu kamabo. Dewa katanya, nu setain asalanan nu nkayu, kaugat wan Dius at fanggalangun nu nkayu.

²¹ Nu katanya, asalanan gfunan sas fagayu taw ay nafadasug sas fakabulun. Ay siginan Dius at fagmagalangun, kanya gtap fagayu taw kata nu yud e asalanan ay gfadasug sas leleg at yud e fakatabuan siginan tam Fun Isus.