Ruma 3 - Fanawbuid tagsibaliwas Fakayabian

¹ Nataw taw Udyu at fagtungudun yud Udyu fag ngay taw, ay o e tungkul fakatoglagan?

² Ngay taw Udyu gtungud yay tibak taw sas nusnga setaw, taguna, sa anya fagayu nu gfatigwanan Dius at Longan.

³ Tibak taw Udyu nu dway matuyan, o takatanya fag taw at nafae yud e tungkul Dius at fagmatuyanun?

⁴ Ida, duan. Dius kabavn matuyan tua, fagayu taw dewa kamuag. Kata at Rirukan te, “Matuyan tua nusnga setaw am longan, ay mababo tuo nusnga sinu tagfauri emu.”

⁵ Ay tam fagmauriun nu gfatoglag way antam te, Dius matuyan, tain ro tam longan? O glong ro tam te, Dius wa matuyan nu gfaurianan way ban antam? Kata kanya ngay taw nu gfanlonganan gugat.

⁶ Ida, duan. Nu katanya way ro, setain way ban Dius nu ginsaful fagdaul daga?

⁷ Malgau e glong te, “Siginan ku fakamuagun, nu antuyan way te, Dius di kamuag, nustua ankugat yay ngay taw nu gfauseganan anya, wain Dius fagfauriananun angku aroro sa ku ngay asalanan?”

⁸ O masine glong te, “Gfakamulun tam at mauri laman masine ban at fungfung?” Tagfauri angku glong te, katanya unu ku foyungan. Matuyan kanya fag ngay taw umfaurianan ban fia.

⁹ Nu katanya, tain katsi tam fagmalongun? O ami fag ngay taw Udyu, gtungud tuami yud Udyu fag ngay taw? Duan. Aroro nalong wami te, fagayu taw, dewa taw Udyu ay dewa taw Gresya, si ways asalanan at daga fagmabalyananun.

¹⁰ Kata at Rirukan te, “We taw masine nusdi sadi.

¹¹ We taw saful at matuyan, ay we gugatan grvbvy Dius.

¹² Fagayu taw nasaruy dalan. Fagayu taw we yud e fagmauriun. Nusdi sadik taw we gfakamulun at masine, duan, nusdi sadi.”

¹³ “Tagfadasug taw sas fakabulun, at longan yay at mauri, ay at leplep mapnu fagfandayaun.” “At lislis kata ule nu maganga.”

¹⁴ “At bibig mapnu fagmauriun ay at masait fag ngay longan.”

¹⁵ “Kanya masakit nu gfabul.

¹⁶ Nusnga nday nu glao fagmauriun way lang at fakamulun.

¹⁷ Kanya wa nasaful dalan sas fagmanabayanun.”

¹⁸ “Ay kanya wa saful kalimu Dius.”

¹⁹ Katsi nasaful tua tam te, Muisis at Faugali at foyungan laman sa antam fag ngay taw Udyu tagafagsuguanan kafag Faugali at fagmabalyananun, laman nusnga sinu ban fag taw di e fanlonganan, ay fagayu taw sas fagdaul daga nansalubang sas Dius.

²⁰ Aroro Dius wa gtap nusnga sinu fag taw kata nu yud e asalanan, siginan nu gfaning Muisis at Faugali, aroro kafag Faugali gfasaful te, fagayu taw e asalanan.

Dius Gtap ngay Taw Kata nu Yud e Asalanan

²¹ Ay katsi Dius nafasure wan nu setain nu gtap ngay taw kata nu yud e asalanan. Bunwa siginan nu gfaning Muisis at Faugali, aroro kafag Faugali wan ay ebi fag ngay taglong at nafatuyan.

²² Dius natap fagayu taw kata nu yud e asalanan siginan nu gafanud sas Isus tam Fun, aroro Dius di e fagfili taw.

²³ Aroro fagayu taw e asalanan, ay we fagmasineun kata Dius.

²⁴ Ay dewa katanya, aroro sas Dius at fagmagalangun, kanya natap antam kata nu yud e asalanan, siginan tam Fun Isus nu gfalfas antam fagayu siginans asalanan.

²⁵ Kanya wan Dius at nafalganan at fanggalangun, laman siginan at nabusbusan at taguk gfalyam tam ngay asalanan, nu gafanud tua tam sa anya. Dius nafakamulun takatanya laman gfalag at fagmatuyanun sa sangay taw, aroro ebi taguna kanya nafabayan wan fagayu taw nu gasalanan, ay wa nafaurianan kafag ngay taw.

²⁶ Kanya nafakamulun takatanya laman gfasaful at fagmasineun sa katsi fag ngay taw, ay gfasaful yangay te, kanya matuyan nu gtap nusnga sinu tagafanud sas Isus kata nu yud e asalanan.

²⁷ Wa tam masine ya kamatungudun, aroro Dius nu gtuyan antam kata nu yud tam e asalanan bunwa siginan nu gfaning tam Muisis at Faugali nu bunway siginan tua tam fagafanudun sas Isus.

²⁸ Aroro saful watam te, sik taw antap kata nu yud e asalanan siginan at fagafanudun, ay bunwa siginan at fagfaningun Muisis at Faugali.

²⁹ O Dius, ngay taw Udyu way lang at ke Dius? O nunda bunwa yangay at yud Udyu fag ngay taw at Dius? Sabv, kanya yangay at yud Udyu fag ngay taw at Dius.

³⁰ Sadi way Dius, ay kanya gtap taw Udyu ay anggan yud Udyu fag ngay taw kata nu yud e asalanan siginan kafag ngay taw at fagafanudun.

³¹ Nu katanya, o gfae yud tam e tungkul Muisis at Faugali, siginan tam fagafanudun? Anud, duan. Nu bunway kaugat nu gfae tungkul tam Muisis at Faugali.