Ruma 12 - Fanawbuid tagsibaliwas Fakayabian

Tagafanud at Ugali

¹ Nu katanya, ku ngay faduksay, aroro Dius kafanyu antam, maksvn nu get au sa ayu te, foni ay bilug sas Dius sik tagleleg fag fanggalangun, mafalganan ay tagfauseganan anya. Katatuy at matuyan nu gseg am Dius.

² Lag am gfaning fagdaul daga at ugali, nu bunway asamani way ay tubusi ay amatanganan laman sumaful am Dius at fakaylatun, at masuad at masine ay tagfauseganan fia anya, ay at matuyan fia.

³ Aroro Dius nafon tua sa angku tiba tungud fag fagmasineun, glong au sa ayu fagayu te, lag am gamatangan te, gtungud tuam ay iba, nu dway matuyan, nu bunway amatangani fia ay kayaunanan at matuyan, kata ay fagafanudun Dius at nafon sas galay ayu at sadi.

⁴ Tam bilug ngayu at afud, ay wa gsud at fakamulun.

⁵ Katanya yangay, itam dewa tam ngayu, sadi way tam bilug ansadi tam sa tam Fun Isus. Ay galay tam at sadi masadi tua tam sa tam iba.

⁶ Dius at fon fag fagmakatuun sas galay antam at sadi saman way. At nafon nu sik tagfoyung at longan, foyungi kata tam fagafanudun.

⁷ Ay nu sik taggubuk, gubuki wa fia. Ay nu sik tagfoyung, famoyungi wa fia.

⁸ Ay nu sik tagfaksvn tibak taw at amatanganan, faksvni wa fia. Ay nu sik takamon, famoni sas fagdaul tam fagmakatuun. Ay nu sik funan, ugatani fia funani. Ay nu sik takafanyu, afanyui fia useganani.

⁹ Matuyani tua nu kedkesugan am. Aurii at mauri, ay esugi at masine.

¹⁰ Edkesugani kata nu sik duksayan am. Ay masuyui tua sas galay am at sadi.

¹¹ Dangay mamomuy nu bunway maseganamai tua nu gfaning am tam Fun sas fagdaul ay amatanganan.

¹² Useganani aroro e fagsegun tuam. Ay agwantani tua ay fagidapun. Ay kabavn darangini.

¹³ Gubuki tua Dius at ngay taw at ke fagayudanun. Kabavn mafalganani nu gfasakbo am ay betaw at yud e fagtaglayunan.

¹⁴ Darangini te, Dius gfon at masine sa sangay tagfakamulun sa ayu at mauri. Darangini ay lag am glong te, “Dius faurii anya!”

¹⁵ Useganani gasfuan ngay taguseganan, ay waywayi gasfuan ngay tagwayway.

¹⁶ Ugalii tua manabayan sas galay am at sadi. Lag am kamatungudun nu bunway fasudsunani yangay dewa tagafalingunan fag ngay taw. Lag am gamatangan te, amamatanganan tuam ay iba.

¹⁷ Lag am gfasud at mauri dewa e nafakamulun sa ayu at mauri. Ugatani tua ugalii tagfauseganan sas fagayu taw.

¹⁸ Manabayani tua sas fagayu taw kafanud ay fagmakatuun.

¹⁹ Ku ngay fakesugun, lag am gfasud tagfauri ayu, nu bunway fabayani wan Dius at namasud. Aroro katatuy at Rirukan te, “Tam Fun nalong te, ‘Au waban tagfasud, ay au waban tagfafoli.’ ”

²⁰ Abat ngate am gfasud, “Ay fawayan nu kalunus way, fafangoni, ay nu kadanum way, fainumi. Nu katanya tua ay fakamulun, gfaplan am anya.”

²¹ Dangay am gababawan at mauri, nu bunway baboi tua at mauri siginan nu gfakamulun am at masine.