Ruma 10 - Fanawbuid tagsibaliwas Fakayabian

¹ Ku ngay faduksay, maksvn ku fakaylatun ay ku darangin sas Dius te, ngay taw Israel ban nangus umlangfe tua.

² Gfatuyan au te, kanya fagayu maseganama nu gfaning Dius, ay dewa katanya, at fagmaseganamaun bunwa siginan at matuyan fag fagsafulun.

³ Aroro wa nasaful te, setain Dius nu gtap sik taw kata nu yud e asalanan. Kanya fagayu nu gugatan sa way at sadili balyawvtan ay wa nafaning Dius at balyawvtan.

⁴ Tam Fun Isus wan at fakatabuan Muisis at Faugali laman fagayu tagafanud sa anya katap tua kata nu yud e asalanan.

Fakalangfean sas Fagayu Taw

⁵ Katatuy Muisis at rirukan sabaliwa sik taw nu katap kata nu yud e asalanan siginan nu gfaning Muisis at Faugali: “Nusnga sinu fag taw tagfaning Muisis at Faugali, kanya ban gleleg tua.”

⁶ Dewa katanya, katatuy yangay at longan sabaliwa nu katap kata nu yud e asalanan siginan at fagafanudun. “Lag o glong sam sadili te, ‘Sinu ban tagsas banwa?’ ” At masuad te, laman namatustus o tam Fun Isus ste swa daga.

⁷ Ay lag yangay glong te, “Sinu ban tagsas tangabasad fia fag lusung?” At masuad te, laman namul o tam Fun Isus siginans fagmabulanan.

⁸ Nu bunway katatuy way at longan, “Dius at Longan munakbang si emu, ay si wa am bibig ay si am amatanganan.” Kanya wan at longan em foyungan sabaliwa nu gafanud sa anya.

⁹ Aroro nu nafoyung tuo te, Isus tam Fun, ay nu gafanud tuo sas fagdaul am amatanganan te, Dius nafadog yay nafaleleg anya, umlangfe o.

¹⁰ Aroro sik taw tagafanud tua, kanya katap kata sik taw yud e asalanan, ay nu gfoyung tua at fagafanudun, kanya umlangfe tua.

¹¹ Dius at Longan nafoyung te, “Nusnga sinu tagafanud sa anya di ban umfangulan.”

¹² Taw Udyu ay taw Gresya we fagsamanun. Sadi way fagayu taw at Fun. Ay kanya gfon fagmaramramanun sas fagayu taguro sa anya.

¹³ Aroro at Rirukan nafoyung wa te, “Nusnga sinu taguro sa tam Fun at ngayan umlangfe tua ban.”

¹⁴ Dewa katanya, setain ro ngay taw at yud gafanud sa tam Fun nu guro sa anya? Ay tain ro nu gafanud nu dyay batang gdungug sabaliwa anya? Ay tain ro nu gdungug nu dway e nanfamoyung?

¹⁵ Ay tain ro nu mananfamoyung nusnga sinu fag taw nu dway e gsugu anya? Kata at Rirukan te, “At kasine sik taw at darafa nu nalo laman namoyung at Masine fag Barita.”

¹⁶ Dewa katanya, bunwa fagayu taw Israel at nafanud sat Masine fag Barita. Katatuy Isayas at longan te, “Em Fun, sinu at nafanud sa em foyungan?”

¹⁷ Nu katanya, tam fagafanudun kasure siginan tam nadungug, ay nadungug tam takatanya aroro siginan nu e gfoyung sa antam sabaliwas Dius at nafili fag Fun.

¹⁸ Ay katsi ginto au te, o nunda kanya fag ngay taw Israel ya nadungug Dius at longan? Sabv, kafag ngay taw nadungug wan. Aroro at Rirukan nalong te, “Andasug wan sas fagayu talun kafag ngay aringang, at foyungan anrapyag sas fagdaul daga.”

¹⁹ Ay ginto kyay fia te, o nunda taw Israel wa natogdungug? Sabv, natogdungug wan. Ebi taguna, Muisis nabalus te, “Gfalabian kban ayu sa sik ngay taw at yud gtoglag Dius, ay gfae fakadotamaun kban ayu siginan sik yud e fagsafulun fag furuan.”

²⁰ Ay Isayas wa kalimu gfoyung Dius at longan te, “Sik ngay taw yud grvbvy angku nalag tua angku, ay nafatoglag au ku sadili sa sangay taw at yud ginto sabaliwa angku.”

²¹ Dewa katanya, katatuy way at longan sabaliwa ngay taw Israel te, “Fagngabak menit guro au sa sik takamabo ay sa sik takamaogatun fag furuan.”