Nemyas 6 - Fanawbuid tagsibaliwas Fakayabian

Tibak Talun at ngay Tagfangguna Gsalag nu Kawat Alad

¹ Sanbalat ay Tubya ay Gesem fag taw Arabya ay tiba ya em fawayan nadungug te, antabu wan nu kawat ami alad ay nu gfaut ami ngay sulat, sangay sakbawan alad yud yay e faningding.

² Nu katanya, Sanbalat ay Gesem nafadasug sa angku sik rirukan te, “Kaylat ami gyalagun emu sas datag tagsis Unu fag talun.” Dewa katanya, nasaful au te, kanya fagayu at algan sa angku mauri way.

³ Nu katanya, nasugu au sik ngay tagfosuk longan laman nanlong sa anya fagayu te, “Katsi ku fakamulun mafanud, ay kwa masine gfaragang ku fakamulun laman glao au sanya.”

⁴ Ay kanya fagayu ufat ginan gfadasug sa angku takatanya fag longan, ay ufat ginan kyangay gbalus kata ebi ginan ku famalus.

⁵ Ay sis falimak menit, Sanbalat nasugu sa angku at fagsuguan ay e buba rirukan, ay mabuskadan wan.

⁶ Katatuy at marirukan: Gesem nalong angku te, nusnga nday fag furuan kanya nu glao saful way te, e algan am namawayan, ay kanya wan ay fagnadogun nawat alad. Ay nu mafanud way ro kata at longan, kaylat o ngaro kasik fun sa sangay taw Udyu,

⁷ ay nafili yay o ngay taglong at namoyung sas Erusalem te, o wan Uda at fun. Matuyan em fun sumaful tuy, nu katanya stae yap o, gkamatoan yap tam.

⁸ Katatuy ku famalus anya, “Wa matuyan am ngay nalong, kanya am sadili way lang namatangan.”

⁹ Nasaful au te, kanya fagayu gfalimuanan way emi laman karagang nu gfakamulun ami. Dewa katanya, nadarangin au sas Dius te, “Faksvni yap ku amatanganan.”

¹⁰ Sik menit, nasa aus Semaya, Delaya at baguama, ay Meetabel at fufu, aroro kanya wa mauli ya sat bale. Kanya nalong angku te, “Nangablangan ta sas Dius at basad bale, ay gtabing mandi ro ta ngay sakbawan. Aroro katsi ro fag yabi am ngay fawayan kadasug laman namabul emu.”

¹¹ Ay nabalus au te, “Au wan si sik afud talun at fun; wain ro ku faglagyuun ay ku fagnansuksuanun yay sas Dius at bale laman namalangfe ku leleg? Duan, kwa nanuksuan!”

¹² Ku amatanganan te, Dius wa nafakamatoan anya, nu bunway kanya nabayadan way Sanbalat ay Tubya, laman nanlong sa angku takatanya.

¹³ Kanya way fag duama at nasugu Semaya laman namalimuanan angku ay namae asalanan angku siginan nu gfaning au at ngay nalong, ay duama kaylat namaurianan angku laman ro ngay taw gfalingun angku.

¹⁴ Nu katanya, nadarangin au sas Dius te, “Faurianani Tubya ay Sanbalat ay anggan Nuadya fag taglong fag mangena, ay tiba yak taglong at ke algan namalimu angku.”

Antabu wan nu Kawat Alad

¹⁵ Antabu wan nu kawat alad gina sis faduak safulu e limak menit sis faunumk magdanun, Elul fag magdanun. At kadugean nu kawat alad limak safulu e duak menit.

¹⁶ Ay em ngay fawayan at munakbang si em talun nu nadungug te, antabu wan nu kawat ami alad, anlimu ay ankapla. Kanya fagayu nasaful te, siginan Dius at gubuk nafatabu ami gfakamulun.

¹⁷ Ginanya, Uda at ngay tagfangguna ay Tubya gbadbalusan griruk.

¹⁸ Ay ngayuk taw Uda tagfadiuganan Tubya aroro kanya Sekanyas at nugang, Ara at baguama, ay at baguama Eukanan nabubay Mesulam at baguina; Mesulam, Berekya at baguama.

¹⁹ Ngay taw glong tua gugat sa angku te, Tubya at fakamulun matuyan, ay ku ngay longan kadasug yangay anggan sa anya. Ay Tubya griruk way gugat sa angku laman gfalimu.