Nemyas 4 - Fanawbuid tagsibaliwas Fakayabian

Em ngay Fawayan Nasalag nu Nangawat ami Alad

¹ Sanbalat nu nasaful te, gdog ami nangawat furuan at alad, maksvn nu kauri ay nu gfalingun emi fag ngay taw Udyu.

² Ay gina at ngay ufud ay Samarya fag ngay tagfawayan sit salubangan, kanya nalong te, “Nataw kafag ngay afanyuan fag ngay taw Udyu at fakamulun? O nunda at amatanganan mafatabu way nu kawat Erusalem at alad kaduge sadik menit laman gdog manamon fanggalangun? Malgau kafag ngay taw at amatanganan at ngay kinkirug ro ay at kinrufa fag alad gang masine yay.”

³ Ay Tubya fag taw Amun, malindug munakbang sis Sanbalat, nalong yangay te, “Nusdi ro sik idu talun at nananlao sanya fag alad, karufa way!”

⁴ Nu katanya, nadarangin au te, “Em Dius, dungugi emi, aroro ngay taw gfalingun emi. Nangus sa way anya fagayu nu kafasludan at ngay algan mauri sa emi. Ay matabanan nangus sa tibak talun laman nangafagsuguan.

⁵ Lag kafanyu ya anya fagayu aroro gfauri emu si em salubangan, ami fag ngay takawat alad.”

⁶ Dewa katanya, wami gfaragang nu kawat ami alad, at kabatan gwabilug wan, aroro ngay taw maseganama tua nu gfakamulun.

^7-8 Dewa katanya, Sanbalat ay Tubya ay anggan ngay taw Arabya, taw Amun ay taw Asdud nu nadungug te, gfataglayun nu kawat ami Erusalem at alad, ay antabu wan nu gfaut ami ngay sulat alad, kanya fagayu maksvn nu kadotama emi. Kanya fagayu at algan namawayan Erusalem laman nansalag emi.

⁹ Dewa katanya, nadarangin ami sa em Dius, ay nafae ngay tagulit ami sa em ngay ligung galay menit ay yabi, laman galaga emi.

¹⁰ Ngay taw Uda glong te, “Kalufuy wami gfakamulun. Ngayu yay em fagautun nagrufan gang, ay wami mafatabu ya kawat.”

¹¹ Nu katanya, em ngay fawayan nalong te, “Lag tam gasafulan, laman ro nu glag wa antam, si watam at furuan ay gfabul watam anya fagayu, laman we kawat ya.”

¹² Dewa katanya, ngay taw Udyu at munakbang gbanwan sanya, gbarita tua gugat sa emi em ngay fawayan at algan nu namawayan emi.

¹³ Nu katanya, nafili au sik ngay taw laman gulit sat masakit kasakbo fag ngay afud alad. Nafasanya au kafag ngay taw laman gulit ngay talanan, ay kanya fagayu e ngay famalabag, ay e ngay fiso tagsumbalian at uyup, ngay bangko ay godun.

¹⁴ Kaduge au gamatangan em kayaunanan, nafaful au ngay tagfangguna, ngay fun ayu sirut, ay anggan ngay tagbanwan sanya, ay nalong au sa anya fagayu te, “Lag am kalimu tam ngay fawayan. Amatangani te, tam Fun mabalyanan ay madulo sas fagayu. Namawayan tam anya fagayu laman tam ngay kalongan, tam ngay sisian, ay tam ngay bubay, ay anggan tam ngay bale, umlangfe.”

¹⁵ Ay em ngay fawayan nu nasaful te, nasaful ami at algan nu namawayan emi, ay nasaful te, Dius nasalag at ngay algan, anfoli wami sa em fakawatun.

¹⁶ Siginan ginanya fag menit, takawat alad tiba way lang ktaw, ay tibak taw galaga way emi, kanya fagayu e ngay bangko, ay e ngay famalabag, ay e ngay godun, ay e ngay famalabag sit dubdub. Ay at ngay fun ayu sirut malindug si sangay taw Uda at day guyuy

¹⁷ kaduge kawat alad. At sadi at take gbitbitan ngay fangawat, ay at sadi at take gbitbitan way at ngay mesa famalabag,

¹⁸ ay kanya fagayu gtaudan at ngay fiso tagsumbalian at uyup. Dewa katanya, taguyup ngay budyung si way ku day tigyangan.

¹⁹ Ay nalong au sa sangay tagfangguna, sa sangay fun ayu sirut ay sa sangay taw te, “Gbia tam fakawatun fag alad, ay gyayuan tam.

²⁰ Nu katanya, nu nadungug am budyung at awang, stae wam vtv. Dius tua ro tagfawayan tam ngay fawayan.”

²¹ Nu katanya, gfataglayun ami gfakamulun, siginans balabag yakmay anyabi, ay em tagalaga fag ngay taw, gulit way gugat emi.

²² Ay nalong au sa sangay taw tagbanwan sis day Erusalem te, “Nu nyabi wan, fagayu am ay anggan ay ngay fagsuguan sakboi sas furuan laman nangulit, ay nu nmenit, fakamuluni.”

²³ Aroro katanya, au ay ku ngay kaiban, ay ku ngay fagsuguan, ay ku ngay tagulit, wami karan ya gtubus em ngay lanbung. Ay dewa ami sasad liskung, gbuba wami em ngay famawayan.