Nemyas 2 - Fanawbuid tagsibaliwas Fakayabian

Nemyas Nalao sas Erusalem

¹ Gina taguna fag magdanun, Nisan fag magdanun, ginanya at faduak safuluk banwa fun Artaserses nu gfunan, ginanya namon au sik fanlangu sas fun, ay ginanya yay lang nu glag te, kabalu au.

² Nu katanya, kanya nainto sa angku te, “Nataw am fakabaluun? Nu glag au emu di o e fakasaitun. E fagidapun way o siring?” Nu katanya, nafanawa au maksvn,

³ dewa katanya, nabalus au fun te, “Mesug fag fun, am leleg ban nangus umkaba yay! Kabalu au, aroro fagfolian ku ngay mangaguyang fag furuan daul maiklasan wan, ay at ngay sakbawan mairugan wan.”

⁴ Ay fun nainto te, “Nataw am fakaylatun?” Ay nadarangin au sas Dius,

⁵ sanya ginan, nabalus au fun te, “Mesug fag fun, nu masine, ay nu sik mauseganan ktua sa emu, guli kyay nangus sas Uda, laman gdog kyay namawat kafag furuan nu inda nu gfoli ku ngay mangaguyang.”

⁶ Gina fun ay at mangena magamut malunggung, fun nainto angku te, “Seduge ban nu sanya o, ay ginain ban nu kafoli o?” Ay nabalus au anya te, ginanya ban nu kafoli au, ay kanya naylat tua.

⁷ Ay naet kyangay sas fun te, “Mesug fag fun, nu masine, foni yap angku sik ngay rirukan laman sa sangay talun at mesa fun sirut tagsis talun Eufrates at fakayabian fag ngay afud talun, laman ban kanya fagayu kaylat tua nu gdalan au sat ngay talun gina au guli sas talun Uda.

⁸ Ay nu masine, foni yangay angku sik rirukan laman sas Asaf, tagalaga am fagagbilugun fag araw, laman ban kanya gfon sa angku ngay balse fangawat sakbawan bale daul at mogat at munakbang sis Dius at bale, ay famawat dog furuan at alad ay ku bale.” Aroro Dius guseganan tua angku, fun naylat tua ku ngay fagetun.

⁹ Ay gina au glao, fun nafalo yay sa angku ngay fun tagfawayan, ay ngay tagsaful gsakay sis kabayu laman ku ufud. Ay nu ndasug ami sas Eufrates sabaliwas fakayabian, nafon au fun at rirukan sa kafag ngay fun ayu sirut.

¹⁰ Ay Sanbalat tagsiginans Kurun ay Tubya fag fun tagfawayan sis Amun nu nadungug te, andasug au laman nanggubuk ngay taw Israel, duama maksvn nu kadotama.

Nemyas Nananlingaman Erusalem at Alad

¹¹ Ay nu nlangfe tuluk menit siginan nu kadasug au sas Erusalem,

¹² nalao wami dewa swabilug yabi. Ay kwa nalong sa ku ngay faudgufudan sabaliwa Dius at fagyafafakamulunun sa angku sas Erusalem. Kwe tabanan tibak fagbaugun nu bunway ku sakayan way lang fag asnu.

¹³ Sanya ginan, naduksun au sas sakbawan tagsalubang sas datag ay nataglayun sa sik bubun at ngayan te, Dragun. Ay andasug au sas Sakbawan Fagnangukasan Nakaurian. Ay nalingaman au fia Erusalem at alad at kinrufa fag afud, ay at ngay sakbawan at mairugan.

¹⁴ Ay nafataglayun au sabaliwas Bulbug fag Sakbawan, ay andasug au sas fun at fagigusan, ay sanya way tsigon ku asnu at fagmaloun.

¹⁵ Nu katanya, nataglayun au sas datag Kidrun, ay ginanya fag yabi, nafalingamanun au fia ngay alad. Sanya ginan, anfoli kyay sas sakbawan tagsalubang sas datag laman gduksun.

¹⁶ Ay fagayu tagfangguna sis furuan daul wa nasaful nu daginan au ay nu setain ku nafakamulun. Aroro kye faglongan sas nusnga sinu fag taw Udyu sabaliwa ku algan, dewa sa sangay tagfon fanggalangun ay dewa sa sangay tagfangguna, ay sa sangay fun ayu sirut, ay dewa sa tibak tagfakamulun sanya.

¹⁷ Dewa katanya, nalong au sa anya fagayu te, “Nalag wam tam furuan daul at kayaunanan. Erusalem ankiklas wan, ay nirug wan at ngay sakbawan. Nu katanya, gdog watam nangawat Erusalem at alad laman di tam gafaplan.”

¹⁸ Ay nalong kyangay sa anya fagayu nu setain Dius nu matuyan sa angku, ay nu setain fun at nalong sa angku, ay kanya fagayu nabalus te, “Kin, nangawat watam dog furuan at alad.” Nu katanya, kanya fagayu nafalganan laman namakamulun.

¹⁹ Ay Sanbalat tagsiginans Kurun, ay Tubya fag taw Amun tagfangguna ngay fagsuguan, ay Gesem fag taw Arabya nu nadungug, kanya fagayu gfalingun ay kase emi. Ay glong te, “Nataw ay fagnamakamulunun? O ay algan namawayan am tam fun?”

²⁰ Ay nabalus au anya fagayu te, “Siginans Dius tagsis banwa at gubuk, namakamulun ami. Ami wan Dius at ngay fagsuguan, nu katanya, namasigad ami nangawat Erusalem at alad, ay am, wam katap ay wam e fagmasineun sas Erusalem ay wam yangay kataip stae.”