Naum 3 - Fanawbuid tagsibaliwas Fakayabian

Afanyuan ngay Taw Ninibe

¹ Afanyuan furuan Ninibe. Sanya maksvn nu mauri ay nu kamuag, ay kabavn kamabul.

² At ngay fawayan namawayan wan anya fagayu. Ay kadungug nu gfawvswvs at famalang kabayu, ay at faguyudan nu glao, ay at kabayu at ngay darafa nu kadkalungan.

³ Kanya fagayu nalag wan ngay tagakabayuan nu nantungul, ay at ngay fiso tagsumbalian at uyup ay at banyas nu ganinag, ay ngayu at kinbul nu mafafulan. Ay ngay tagfawayan kataid si sangay kinbul.

⁴ Umfasludan takatanya sas furuan Ninibe aroro kanya kata sik mangena at malayun nu gfalo at bilug ay gfagsuguan tibak talun. Ay kanya kamaylatan ay gfantaban ngay taw siginan nu gfangabalo.

⁵ Yawi at Mabalyanan nalong te, “Am fag ngay taw Ninibe, dungugani! Ku ngay fawayan am! Nu katanya, namapla au ayu sis salubangan ngay talun ay sa sangay fagfagtainanan. Umkata am sik mangena at naurug at lanbung sitsigon at alfuyu ay anlag nu malulasan.

⁶ Maksvn nu kasuya au ayu kata sik taw at natayukan nakaurian, nu katanya, fagayu taw at nalag ayu kasuya ay gsaruyan ayu.

⁷ Ay kanya fagayu glong te, ‘Anrasras wan furuan Ninibe. We kabalu ya ay gfasun anya.’ ”

⁸ O nunda Ninibe amasine yap tua furuan Tebes at munakbang sis Liskung Nilu? Kanya fag liskung tuga Tebes at alad.

⁹ Tebes at fagmakatun siginans talun Etiupya ay talun Igiptu, nu glong ban, ggubuk tua gugat. Put ay Libya fag ngay talun at fagudgubukan yangay.

¹⁰ Dewa katanya, ngay taw Tebes gdog yay natabanan sa tibak talun, ay e nafafalang at ngay sisian sa sangaba dalan. Ay takadungug fag ngay taw masiukan salambitan, ay mesa e nafagsuguan.

¹¹ Taw Ninibe umkata am sik ngay tagalangu at yud saful at kindasug. Ay ngay fawayan kadasug laman namawayan ayu. Nu katanya, nanrvbvy am ay ngay fagnanuksuanan laman diam gagamatan.

¹² Fagayu ay furuan at ke alad umkata sik fun kayu igus taguna at rawvg at kinlesan wan, ay nu e nauig at bilugan, at ngay rawvg katong ay e kon wan.

¹³ Damai ay ngay tagfawayan, kanya fagayu mamomuy! Ay ay furuan daul at sakbawan umkirug wan, nu katanya, ay ngay fawayan masakit nu gsakbo.

¹⁴ Falganani aroro ay ngay fawayan gakadasugun wan. Fanagubi wan ay ngay fanginum. Faogati ay furuan at alad. Awati ay fangawat alad, ay fasinei at marasrasan fag ngay afud alad.

¹⁵ Dewa katanya, umbul ban am si ay fagbanwanan siginans afuy ay fiso tagsumbalian at uyup. Kata am sik ngay tanum ngay liung at naon. Ankayu am kata ngayuk liung.

¹⁶ Nafayu am ay ngay tagfalo at kayuan ayu yap tua galeme sis banwa. Dewa katanya, kanya fagayu umkata ngay liung; taglayug wan nu ntabu gfamin ngay tanum.

¹⁷ Ay ngay tagulit ay ay ngay tagfangguna at kayuan kata ngay liung at mabaritbit sa sangay alad gina marios, ay kafagayu glayug wan, menit nu nsure, ay wa kasaful ya nusnga nday nu glayug.

¹⁸ Asirya at fun, am ngay tagfangguna umbul, ay am ngay taw umsaruayan sa sangay buksul, ay wa ban e namaful ya anya fagayu.

¹⁹ Kata o sik taw at nabasingan yud kafia ya. Ay fagayu at nadungug at kinfasludan sa emu maksvn nu guseganan, aroro andotama o anya fagayu.