Mikas 7 - Fanawbuid tagsibaliwas Fakayabian

Ngay taw Israel at Fagmauriun

¹ Mikas nalong te, “Afanyuan au! Kata au sik taw takalunus ay tagrvbvy wat ubas at rawvg, ay fun kayu igus at ngay rawvg at sawad, dewa katanya, kwe nalag nusdi sadik rawvg.

² Ku longan at masuad, sis talun Israel, kwe nalag nusdi sadi at matuyan sas Dius. We taw ya matuyan, ay galay at sadi grvbvy at buknga laman namabul at iba, kata sik taw nu gfalganan litag at fanggamat mangilafang.

³ Kanya fagayu annanad wan gfakamulun at mauri. At ngay tagfangguna ay at ngay tagwabilug gbul famayad laman namakamulun at mauri. Ay gfaning way at mabalyanan fag ngay taw at fakaylatun, ay masadi yangay laman gfayud e masuad fagmatuyanun.

⁴ Ngay taw sit furuan takatap te, matuyan, we tungkul, kata way sik wat at madugi. Ay andasug wan at buknga Dius nu namaurianan anya fagayu, kata at ngay taglong at nafararang ebi. Ay andasug wan at buknga nu nangafaplan.

⁵ Fagmauriun anfagdaul wan, nu katanya, lag am gafanud ay iba anggan ay fagadgalangan, ay madiriani tua ay nalong dewa say mangena.

⁶ Aroro ginanya ban, ngay baguama wa gsuyu ya at mama, ay at ngay baguina wa gfaning ya at mina, ay at ngay nugang mangena wa yangay gfaning ya at nugangina. Ay sik taw ban at fawayan, siginan wa at sadili talanan.

⁷ Dewa katanya au, gafanud au sas Yawi ku Dius. Gfanya au anya, ku tagfalangfe ay ku taggubuk.”

Yawi ban nu Gfalangfe ngay Taw Israel

⁸ Ngay taw Israel glong te, “Lag tam gafalingunan tam ngay fawayan. Ay dewa tam anlub, abangkadi yap fia. Ay dewa tam sad dulum, Yawi wan tam salung.

⁹ Aroro nafamabo way tam Yawi, agwantani wan at faurianan, yakmay nagubuk ay nafae fagmatuyanun antam. Nu katanya, Yawi gfalangfe wa fia antam, ay namae fagmanabayanun.

¹⁰ Ay tam ngay fawayan ban nu nalag takatanya, umkapla. Aroro ebi kanya fagayu nafalingun antam, glong te, ‘Dada wan ay Dius Yawi?’ Ay kadasug ban sik buknga, lumag tam kanya fagayu nu gafaurianan. Ay kanya ban fagayu umkata ngay lifak sa sangaba dalan ngay taw at fagsiadun.”

¹¹ Mikas nalong sa sangay tagbanwan sis Erusalem te, “Umdasug ban sik menit, gdog yayam nangawat ay furuan at alad, nu katanya, umbia yay ban ay talun.

¹² Ay ginanya yangay ban fag buknga, ngay taw ban siginans Asirya ay Igiptu at fagagbilugun fag ngay furuan, ay sitsigons Liskung Eufrates, ay siginan tangayayu fag ngay talun, nangaful sa ayu.

¹³ Fagayu ban talun sas fagdaul daga umsik mabaluanan aroro sa sangay taw at fagmauriun.”

Ngay Taw Israel Gdarangin laman Dius Kafanyu

¹⁴ Ngay taw Israel gdarangin te, “Yawi, alagai emi kata tagalaga tupa nu galaga at ngay tupa. Ngay talun sa em ligung, kasakan tua at fagfafangonan, dewa katanya, ami, siway mi lang sad araw. Fabiai em talun kata ebi gina ami sis Basan ay sis Gilyad.

¹⁵ Fasurei sa emi at ngay madulo kata ebi am nafakamulun, gina o gfalfas emi siginans talun Igiptu.

¹⁶ Ay at mabalyanan ban fag ngay talun nu nalag takatanya, umkapla, ay wa ban gfalingun ya emi.

¹⁷ Ay kanya ban fagayu kata ule galafangan aroro sat fakaplaun maksvn, ay gduksun gtadtaruyan kalimu emu, em Dius Yawi.

¹⁸ We tibak Dius tagtungud emu. Nafalyam tuo am ngay taw at ngay asalanan. Ay di o kadotama ya emi nu bunway guseganan tuo kesug emi.

¹⁹ Gdog yay ban o kafanyu emi ay gfalyam em ngay asalanan kata ebi am nafakamulun, ay nangukas o sasad fagngabasadan dagat.

²⁰ Nu setain nu nesug o ay nu matuyan o sa em mangaguyang Abrayam ay Akub, katanya yangay nangus am fakamulun anggan sa emi.”