Mikas 6 - Fanawbuid tagsibaliwas Fakayabian

Yawi Kadotama ngay Taw Israel

¹ Mikas nalong te, “Ngay taw Israel, dungugani Yawi at fagyalongun sa ayu. Foyungi ay mamalong, ay fadungugi ay fagyalongun sa sangay buksul.

² Ay am fag ngay buksul, fagdaul daga at mogat at fagtungkudan, dungugani Yawi at longan sat ngay taw Israel.”

³ Yawi nalong te, “Ku ngay taw, nataw ku nafakamulun sa ayu at mauri? O nunda nafaidapan au ayu? Balusi angku.

⁴ Nafalfas koma ayu siginan nu gafagsuguanan am sis talun Igiptu. Nafili au Muisis, ay Arun, ay Miryam laman gfangguna ayu.

⁵ Ku ngay taw, amatangi te, Balak talun Muab at fun nasugu Balaam, Beur at baguama, laman namauri ayu. Dewa katanya, nalong au sas Balaam te, nanlong o sik ngay mauseganan sa anya. Amatangani yangay te, naufud koma ayu gina am glao siginans Sitim sitsigons Gilgal. Ay lag kalyam at ngay kinfasludan laman sumaful am te, nafalangfe au ayu.”

⁶ Ay sik taw Israel gbalus te, “Nataw ro ku fanggalangun sas Yawi gina au nanseg anya? O masine way ro sik tumad baka ku fagnangirugun laman ku fanggalangun?

⁷ O Yawi ro guseganan nu nafon au sa anya ngayuk tupa ay langis? O ay namon kro sa anya ku ngay sisian at kaka laman famayad ku ngay asalanan?”

⁸ Mikas gbalus te, “Yawi nafoyung wan sa antam at masine. Katatuy at fakaylatun tam fakamulun: Fakamuluni at matuyan, afanyui tam ngay iba, ay ugalii famababauni sas Dius.”

Yawi nu Namaurianan ngay Taw Israel

⁹ Dungugani Yawi at longan sas furuan Erusalem, nusnga sinu tagsuyu Yawi e fagsafulun tua. “Uda at ngay kasugfunanan, nangaful am sas furuan Erusalem laman nandungugan am anya.

¹⁰ Am fag ngay taw, mauri wayam! Kwa ban kalyam ay nafaful fag ngay ramraman siginan ay balyawvtan at mauri. Nu gtas am wa kasakan. Kauri kway takatanya fag fakamulun.

¹¹ Kwa kaylat nu gfabudbungguan am yud kasakan.

¹² Ay am fag ngay taw at maramraman, madot am, ay kamuag.

¹³ Nu katanya, namamin kban ayu aroro sa ay asalanan.

¹⁴ Nu katanya, dewa ban am kon, wam kapsug. Ay dewa ban am gfungsu ay gutluan, bunwa ban am at nangagbilug, aroro ay ngay fawayan ban nangago ayu.

¹⁵ Ay dewa ban am at natanum, bunwa ban am taggutlu. Ay dewa ban am gturis ulibu at rawvg, bunwa ban am at nangagbilug kafag langis. Ay gturis yangay ban am rawvg ubas, dewa katanya, bunwa ban am taginum.

¹⁶ Umfasludan ban sa ayu takatanya, aroro nafaning am fun Umri, ay at baguama fun Akab at ngay fakamulun mauri, ay at ngay faugali, ay at ngay famalun longan. Nu katanya, namaurianan kban ayu, ay tiba bank talun namauri ay namalingun ayu.”