Mikas 5 - Fanawbuid tagsibaliwas Fakayabian

¹ Ngay taw Erusalem, falganani ay ngay tagfawayan aroro ay ngay fawayan maligung ayu. Ay kanya ban fagayu namalang siginan sik tulag ngay tagfangguna sis Israel at fingi.

At Fatuyanan fag Tagfangguna siginans Betleem

² Yawi nalong te, “Betleem Efrata, dewa o sik talay way fag furuan sis talun Uda, siginan ban emu, sik taw at namakamulun sa angku laman at namangguna taw Israel. Aroro at ngay mangaguyang sik takadungug siginan ebi.”

³ Nu katanya, Yawi ban gfagbilug wan ngay taw Israel sat ngay fawayan yakmay ban sik mangena nainkidapan nafasalug sik munama, at nanfangguna ban taw Israel. Ay kanya ban fag tagfangguna at ngay kaiban at natabanan sa tibak talun, umfoli yay sat ngay kaiban.

⁴ Siginan ban Yawi at fagmabitsugun ay at fagmabalyananun kanya ban namagtainan ngay taw Israel. Kanya ban kata sik tagalaga ngay fagbaugun. Nu katanya, manabayan tua ban ngay taw Israel nu gbanwan aroro ngay taw ban sas fagdaul daga lumag at fagmasineun.

⁵ Ay kanya ban namae fagmanabayanun at fagfanggunaun fag ngay taw. Ngay taw ban Asirya nu namawayan way antam, am ngay tagfangguna ban at maseganama namangguna antam laman namabo anya fagayu.

Fagmanabayanun ay Faurianan

⁶ Ay kanya ban namabo ay nanfunan talun Asirya, Nimrud at talun. Nu katanya, ngay taw ban Asirya nu namawayan way tam talun, tam tagfangguna ban gfalangfe tua antam.

⁷ Ay at kinsawad ban fag ngay taw Israel umsik fanggalangun sa sangay talun. Ay kanya ban fagayu umkata sik ngay damug ay arak Yawi at nafon laman tagfatugbung ngay tanum. Ay kanya ban fagayu gafanud tua sas Dius bundi sa sangay taw.

⁸ Dewa katanya, kanya ban fagayu gfae fagmauriun yangay sa sangay talun, ay madot ban kata sik liun nu nangagat ngay mela sasad araw, ay ngay tupa sis fagfafangonan. Ay liun nu e fagnangagatun way, gtulbu ay gyukfu ay wa gfalfas ya.

⁹ Ay ngay taw Israel ban namabo at ngay fawayan yakmay namin.

Yawi ban Gfabul ngay Taw Israel at ngay Fagfatigwanan at yud Matuyan

¹⁰ Yawi nalong te, “Ginanya ban fag ngay menit, gfabul kban ay ngay kabayu ay giklas ay ngay faguyudan fangawayan.

¹¹ Ay namaiklas kban ay ngay furuan daul anggan ay ngay fagnanuksuanan bale at mogat.

¹² Nanrufa kban ngay tagfangalga at ngay fagagbilugun, ay wa ban e gfangabalo ya.

¹³ Ay wa ban am nanseg ya ngay fagsegan ay anggan ay nawat fag ngay gang tagfamatang ayu, aroro kanya ban fagayu nanrufa kwan.

¹⁴ Ay nanrufa kyangay ban ngay turuk fagtoglagan Asera fag fagsegan, ay nangiklas kyangay ban ay ngay furuan.

¹⁵ At kaksvnan nu kadotama au, namasud kban sa sangay talun at nafamabo angku.”