Mikas 4 - Fanawbuid tagsibaliwas Fakayabian

Dius at Suguan Tagfon Fagmanabayanun

¹ Sa ban taguyan fag ngay menit, Yawi at bale at fagmalindugan fag buksul abat yap ay amafanud yap tua fagayu buksul, ay fagayu ban talun at ngay taw nangaful sanya.

² Ay kanya ban fagayu glong te, “Bastam sas Yawi at nafili fag buksul, sas Akub at Dius at bale, laman kanya ban gfoyung antam at ngay balyawvtan tam fagnamaningun.” Nu katanya, Yawi ban at foyungan kafagdaul siginans Buksul Siun tagsis furuan Erusalem.

³ Yawi ban nanwabilug ay namasadi tangayayu fag ngay talun at taw. Nu katanya, kanya ban fagayu di gawayan ya, ay wa ban gfananad ya laman at namawayan. Ay at ngay fiso tagsumbalian at uyup, nangawat wan fangali daga. Ay at ngay bangko nangawat wan fanggafas.

⁴ Ginanya ban, ngay taw nanmalunggung manabayan sat mesa tanum wat ubas ay fun kayu igus at lanbung. Matuyan umfasludan ban takatanya, aroro Yawi at Mabalyanan at nalong.

⁵ Ngay taw ban dewa gfataglayun gseg at ngay fagsegan, ami ban gfataglayun tuami gugat gseg Yawi em Dius.

Ngay Taw Israel nu Kafoli sat Talun

^6-7 Yawi nalong te, “Ginanya ban fag ngay menit, namaful kban ku nafaurianan fag ngay taw, kata sik ngay tupa tagalbi ay at narapyagan. Ay at ngay sawad namasik mabalyanan kban fag talun. Ay siginan ban ginanya fag menit, namagtainan kban anya fagayu sas Buksul Siun.

⁸ Ay Buksul Siun, kata ban o sik bale ngabat fagulitan ngay fagbaugun, ay umsik mabalyanan ban o. Ay kafag furuan at ngayan yangay te, Erusalem, umsik tagtungud ban fag furuan sis Israel.”

^9-10 Am fag ngay taw tagbanwan sis furuan Siun, wain ay fagidapanun kata sik mangena nu gafasalugun? Ay sanya yay oma ay ngay fun, ay ay ngay tagfalu longan. Katsi, gidapan am maksvn kata sik mangena nu gafasalugun, ay wa ban glugo ya gubun wam ay furuan ay namanwan ban am sasad araw. Sanya ginan ban, gatabanan am sas talun Babilunya. Dewa katanya, namalangfe kban ayu siginan ay ngay fawayan.

¹¹ Ginanya ban, ngay talun nangasadi laman namawayan ayu. Ay glong te, “Namapla watam furuan Siun! Sanya ginan, nandama ban tam anya aroro sat kaksvnan nu mapla at kayaunanan.”

¹² Dewa katanya, kafag ngay talun at ngay taw wa saful ku amatanganan ay ku algan ku fagnafafulun anya fagayu laman namaurianan. Kanya fagayu kata sik ngay gutluan at fagnanruyusun.

¹³ “Am fag ngay taw tagbanwan sis furuan Siun, falganani laman namabul am ay ngay fawayan kata nu gruyus am trigu. Ay kata ban am sik ngay baka tama at ke sunge sanbung ay at ke ngay u tansu. Ay namabo ban am ngay talun at kinsadi laman namawayan ayu. Ay foni sa angku at nafangago fag ngay ramraman laman sik fanggalangun, aroro au wan fagdaul daga at Fun.”