Mikas 3 - Fanawbuid tagsibaliwas Fakayabian

Mikas Nasalag ngay Tagfangguna ay ngay Taglong

¹ Sanya ginan, Mikas nalong te, “Israel ay Uda at ngay fun, dungugani! O nunda bunwa am tagfafasludan at matuyan?

^2-3 Dewa katanya, wam gfakamulun at matuyan, ay fakaylatun, at mauri way. Nafaidapan am ku ngay kaiban kata nu nabul am at balat, ay nabul am at ngay faknul siginan at bini ay naramyuk, ay nafatama am ay naon.

⁴ Gina ban am gafaurianan fag menit, get ban am gubuk sas Yawi, ay wa ban ggubuk ayu aroro sa ay fagmauriun.”

⁵ Katatuy Yawi at longan sabaliwa takamuag fag ngay taglong tagfatuyanan te, manabayan ban ngay taw tagfon sa kafag ngay taglong fakonun, dewa katanya, gidapan way ban at yud gfon sa anya ngay fakonun.

⁶ “Aroro nafamuag am sa ku ngay taw, wa ban am e taginfan ya, ay wa ban am mainsaful ya. Kata nu yud am glag sasad madulum.

⁷ Am fag ngay taglong ay fag ngay taginsaful, umkapla ban am. Ay gtaup ban am ay mata at kaksvnan nu kapla am, aroro wa ban am batang ya gdungug famalus siginans Dius.”

⁸ Dewa katanya, Yawi at Falad si tua gugat angku, kanya gfon angku fagmabalyananun laman mafafasludan au at matuyan, ay gfabitsug tua ku amatanganan laman mafafoyung au te, ngay taw Israel ay taw Uda gasalanan.

⁹ Am fag ngay tagfangguna sis Israel ay sis Uda, dungugani! Wam gfafasludan fagmatuyanun ay wam gfae masuad at matuyan.

¹⁰ Mawat wayam furuan Siun siginan ay balyawvtan at mauri. Ay gfabul am taw laman mafatabu am kawat.

¹¹ Gfadiuganan am sa tagfon ayu famayad gina am gfawabilugan. Anggan ngay tagfon fanggalangun nu gfoyung gbul yangay famayad. Katanya yangay ngay taglong, wa nanginsaful way ro e famayad. Ay gseg am te, Yawi ggubuk ayu, ay gamatangan yangay am te, Yawi gufud tua gugat ayu, nu katanya, we mauri takadasug sa ayu.

¹² Aroro nafakamulun am takatanya, umkiklas ban Siun, furuan Erusalem. Ay kanya ban umkata sik fagtanuman at malian, ay sik fagfungsuan at kinkiklas fag ngay bale, ay at fagfalindugan Yawi at bale fag buksul umkata sik araw.