Mikas 2 - Fanawbuid tagsibaliwas Fakayabian

Yawi ban Namaurianan Tagfaidapan at Yud e Kwa

¹ Ida am, tagintiugunan gugat gamatangan sat mauri. Ay balabag di gfafasludan am kata ay algan aroro e fagmabalyananun am gfakamulun takatanya.

² Ay gago am ay fagalabianun fag ngay daga ay fag ngay bale. Ay kamuag am sa sangay taw laman magbilug am at ngay bale ay at ngay ramraman.

³ Nu katanya, Yawi glong sa ayu te, “Dungugani! Namaurianan kban ayu ay wa ban am umlangfe, ay wa ban am mafamatungudun ya.

⁴ Ginanya ban, ngay taw gfalingun ayu siginan nu galubad at mabalu te, ‘Katsi afanyuan wami! Yawi nagbilug wan em ngay daga ay nafon sa sangay tagfandaya.’ ”

⁵ Nu katanya, Yawi at ngay taw wa ban e nangagbilug ya at daga.

⁶ Glong am te, “Lag am kamoyung ya sa emi sabaliwa takadasug ban fag faurianan, aroro wa ban mi gafaplan.”

⁷ Ay wain, o nunda ban Yawi namaurianan wan Akub at kasugfunanan? O nunda we amatanganan ya gfalyam kafag ngay taw at asalanan? Ay o nunda at fakamulun wan tagfabul? Katatuy Yawi at famalus, “Ay fakamulun nu masine di, magbilug tua ban am ku ngay fatuyanan.

⁸ Dewa katanya, gfawayan wayam ku ngay taw at yud e kwa kata sik ngay fawayan. Kanya fagayu nu glong, nu noli tua ro sat furuan siginans fagawayanan, anlangfe wan. Aroro mangaro nangagbilug wayam kafag ngay taw at ngay lanbung.

⁹ Naiyan am at ngay mangena siginan at ngay bale. Ay naago am at ngay sisian ku ngay famonun sa anya, nu katanya, kanya fag ngay sisian wa manangafoli ya sat ngay fagtainan kabavn.

¹⁰ Nu katanya, loi wan ste ginans talun Israel aroro wa ban am manabayan, aroro ay ngay asalanan nafasuya ay furuan. Tuy ban fag furuan umrasras ay wa ban e tungkul ya.

¹¹ Ay ay fakaylatun ay takamoyung, takamalingun ay takamuag, tagfoyung te, ‘Ngayu ban ay fanginum fanlangu.’ ”

Ngay Taw Israel ay ngay Taw Uda at Fagmanabayanun ban

¹² Yawi nalong te, “Fagayu am at sawad tagbanwan sis Israel ay sis Uda, namaful kban ayu kata ngay tupa sis fagubungan, ay kata ngay gaban fagbaugun sas fagnamafangonan. Katanya yangay, umkayu ban am sa ay fagbanwanan.

¹³ Nanluang kban at nataban ayu fag furuan at sakbawan, ay gguna kban ayu gina am gduksun. Au Yawi ay Fun, at namangguna ban ayu.”