Mateu 9 - Fanawbuid tagsibaliwas Fakayabian

Isus Nafafia sik Taw at Yud Malelegan

¹ Ay Isus nasakay wan sa sik sakayan lino, ay nadife ay andasug sat furuan fia.

² Ay e nabuba sa anya sik taw at yud malelegan mataygilid sit igyan. Ay Isus nu nalag kafag ngay taw at fagafanudun, nalong sanya fag taw at yud malelegan te, “Sama, lag o gafanawa, aroro nalyam wan am ngay asalanan.”

³ Ay tibak tagfoyung Muisis at Faugali gkamatoan te, “Tuy fag taw nalong at mauri sas Dius.”

⁴ Ay Isus nasaful kafag ngay taw at amatanganan, ay glong te, “Wain ay fagamatanganun at mauri?

⁵ Amatangani, inday at masakit fag longan, nu glong ro te, ‘Nalyam wan am ngay asalanan,’ ay mannga, ‘Alindugi ay loi wan’?

⁶ Kaylat au nu nasaful am te, au, Taw at Baguama, e fagmabalyananun au ste swa daga gfalyam taw at asalanan.” Ay Isus glong sat yud malelegan fag taw te, “Alindugi wan, bangkadi am igyan ay ulii wan.”

⁷ Ay kafag taw anlindug ay noli wa fia.

⁸ Ay kafag ngay taw nu nalag, andulo daul, ay gseg Dius aroro kanya nafon fagmabalyananun sas taw.

Isus Nataban Mateu

⁹ Ay Isus kaduge glao, nalag sik taw at ngayan Mateu nu malunggung sis bale fagfonan famayad sas fun. Ay Isus nalong anya te, “Aloi angku.” Ay Mateu anlindug ay nanangalo anya.

¹⁰ Ay Isus ay at ngay tagadal gina gfangon sis Mateu at bale, ngayuk tagbul famayad laman sas fun ay ngay tagasalanan nasakbo sanya ay nanfangon yangay gasfuan anya fagayu.

¹¹ Ay sanya fag ngay taw Fariseu nu nalag, ginto sas Isus at ngay tagadal te, “Wain manga ay takamoyung nu gfangon fagfasfuanun ngay tagbul famayad laman sas fun ay anggan ngay tagasalanan?”

¹² Ay Isus nu nadungug at longan, nalong te, “Sik taw at yud e fakasaitun wa gayudan tagfafia, kayu way at ke fakasaitun.

¹³ Amatangani ay asafuli at masuad Dius at Longan te, ‘Ku fakaylatun bunwa ay fanggalangun, nu bunway kaylat au nu kafanyu am ay iba.’ Aroro ku fagnastaeun kwa namaful at matuyan fag ngay taw sa angku, kayu way at ke asalanan.”

Sik Fagintoun sabaliwa nu Yud Gfangon

¹⁴ Ay arodi Uan Tagfasurung at ngay tagadal nanangakbang sas Isus ay ginto te, “Wain manga ami ay anggan ngay taw Fariseu em fagebukngaun yud gfangon laman gdarangin, ay am ngay tagadal wa gfakamulun takatanya?”

¹⁵ Ay Isus nabalus anya fagayu te, “O sik bagu kadadwa fag mangama gina gfadgaloan at ngay fagadgalangan, o ginanya ro at ngay fagadgalangan kabalu? Duan. Ay sa ban tibak menit e gtaban wan kafag mangama, ay ginanya ya ban at ngay iba nu e buknga nu yud gfangon laman gdarangin.

¹⁶ “Ay we taw nansimat sik bagu fag ramit sat dan fag lanbung at girat, nu dway nabakbak taguna at bagu laman gfalay. Aroro nu dway katanya, kafag ramit at bagu umkalay ay gfabia at dan fag lanbung at girat.

¹⁷ Ay we taw nantalin at bagu fag fanlangu sat dan fag fagsuadan mawatan fagbaugun at balat. Aroro nu natalin ro sanya, kafag fagsuadan kaltu, ay at natalin umbusbus, ay at fagsuadan umrasras wan. Abat ngate, sik taw nu gtalin at bagu fag fanlangu sa tua at bagu fag fagsuadan mawatan fagbaugun at balat, laman fagdua di nfangulan.”

Sik Baguina at Kinbul wan ay sik Mangena at ke Fakasaitun

¹⁸ Kaduge Isus garingang sa sangay taw, sik tagfangguna bale fakafulan andasug. Ay kanya namalub sas Isus at daga salubangan ay get te, “Ku baguina bagu kabul. Aloi angku, ay fatayuki ro am daluap sa anya ay lumeleg yay ro.”

¹⁹ Ay Isus anlindug ay nangalo wa anya, gasfuan at ngay tagadal.

²⁰ Ay arodi sik mangena labi dua wak banwa nu yud karagang nu gfangigusan, ankakbang sas Isus at day guyuy, ay nated at baringbingan lanbung.

²¹ Aroro at amatanganan te, “Nu nated kdi ro at lanbung, kafia kwan.”

²² Ay Isus anbiling ay nalag kafag mangena, ay nalong sa anya te, “Fagmangena, lag gafanawa. Am fagafanudun nafafia emu.” Ay arodi vtv kafag mangena anfia wan.

²³ Ay Isus nu ndasug sa kafag tagfangguna at bale, nalag ngay tagtulali ay anggan sik ngay taw tagaringang ngayu.

²⁴ Ay Isus nalong te, “Loi wan, aroro tuy fag baguina wa nbul, gtiug way.” Ay kafag ngay taw kase, gfalingun Isus.

²⁵ Ay nu naiyan fagayu taw siginan sad bale, Isus nasakbo ay nated kafag baguina at daluap. Ay kafag baguina nlindug.

²⁶ Ay kafag fakamulun anbarita sas fagdaul sanya fag talun.

Isus Nafafia Duak Taw Yud Glag

²⁷ Ay kaduge Isus glo sanya ginan, duak taw yud glag galo anya. Ay kafag duama nauro te, “Fun Dabid at kasugfunanan, afanyui emi.”

²⁸ Ay Isus nu nasakbo sa sik bale, anggan kanya fag duama at yud glag ankakbang sa anya. Ay Isus nainto anya te, “O gafanud tuam te, mafafakamulun au tuy?” Ay kafag duama nabalus Isus te, “Sabv em Fun.”

²⁹ Ay Isus nated kafag duama at mata ay glong te, “Kin, umsure wa ro sa ayu kaksvn ay fagafanudun.”

³⁰ Ay kafag duama glag wan. Ay Isus maksvn nu gsalag duama laman wa gfasaful sas nusnga sinu.

³¹ Ay dewa katanya, kafag duama nalo wan ay nafarapyag at barita sabaliwa anya sas fagdaul sanya fag talun.

Isus Nafafia sik Taw Yud Maringang

³² Ay gina kafag duama galoun, e nataban yangay fia sas Isus sik taw yud maringang ay ke mauri fag falad.

³³ Ay Isus naiyan kafag mauri fag falad, ay kafag taw maringang wan. Ay sanya fag ngay taw andulo daul te, “Wami batang nalag takatatuy sis talun Israel.”

³⁴ Ay dewa katanya ngay taw Fariseu gkamatoan te, “At fagmabalyananun gaiyan mauri fag ngay falad siginan way mauri fag ngay falad at fun.”

Gsadsadian Wayk Taw Tagfoyung Dius at Longan

³⁵ Ay Isus nalo sa sangay furuan ayu daul ay sa sangay furuan ayu sirut, laman namoyung sanya fag ngay bale fakafulan at masine fag barita sabaliwas Dius nu gfagtainan. Ay Isus nafafia fagayu taw nusnge wain at fakasaitun.

³⁶ Ay Isus nu nalag kanya fag ngay taw, anfanyu, aroro gidapan ay we ggubuk, aroro kanya fagayu kata way ngay tupa at yud e galaga.

³⁷ Ay Isus nalong sat ngay tagadal te, “Ngayu at faggutluun, ay gsadsadian way at nanggutlu.

³⁸ Darangini sas faggutluun at Fun, laman kanya gsugu ngay taggutlu sat faggutluan.”