Mateu 7 - Fanawbuid tagsibaliwas Fakayabian

Lag Ginsaful Ay Iba at Asalanan

¹ “Lag gamatangan sabaliwa ay iba te, mauri at fakamulun, laman ban Dius di gfoyung te, mauri yangay ay fakamulun.

² Aroro nusnga setaw ay amatanganan at mauri sabaliwa ay iba, katanya yangay ban at foyungan sabaliwa ayu. Ay nusnga se aksvn nu gfaurianan am ay iba, katanya yangay nu gafaurianan am.

³ Wain am faglongun sam faduksay te, ‘Gamata o,’ ay emu ngap am namata sik balse tua daul?

⁴ Ay wain ro am fagnalongun sam faduksay te, ‘Au wan tagbul am namata,’ ay am namata sik balse tua daul?

⁵ Takamaningan wayo fag taw. Buli yap taguna kafag balse sim mata, ay nu nabul tuo, malyo tua ro nu gdama o, ay mabul wo am faduksay at namata.

⁶ “Lag gfon sas idu Dius at ramraman, ay lag gukas sik dalag masine sas bumbu. Aroro nu gfakamulun o takatanya, bumbu mansiad kafag dalag ay idu manbiling ay magat ayu.

Isus at Foyungan sabaliwa Taget ay Tagrvbvy ay Takatuk

⁷ “Eti, ay gfon ro sa ayu. Rvbvyi, ay lumag am. Atuki, ay gluang ro laman sa ayu.

⁸ Aroro fagayu taget mul waban fia. Ay fagayu tagrvbvy lumag tua ban fia. Ay fagayu takatuk e lumuang waban fia laman sa anya.

⁹ Ay amatangani, am fag ngay mama. O ay sisian ro nu get sa ayu sik fakonun, o namon ro am anya sik gang?

¹⁰ Ay nu naet ro sa ayu sik albon mataman, o namon ro am anya sik ule? Duan, o kin?

¹¹ Dewa am sik ngay mauri fag taw, saful tuam gfon at masine sa ay sisian, ay ay Mama sas banwa gtungud yay nu gsaful gfon at masine sas nusnga sinu taget sa anya.

¹² “Ay nusnge wain ay fakaylatun ay iba at fakamulun sa ayu, katanyai yangay ay fakamulun sa anya. Aroro katanya Muisis at Faugali ay Dius at ngay taglong at rirukan at masuad.

Talay ay Tagbia fag Sakbawan

¹³ “Ay ay fagsakboan sa yakman talay fag sakbawan. Aroro tagbia fag sakbawan ay at malbang fag dalan, at fakadasugan sa ways faurianan. Ay ngayuk taw sanya way nu glao.

¹⁴ Ay aroro ngap talay fag sakbawan ay at yud gbia fag dalan, kanya at fakadasugan sa tuas leleg at yud e fakatabuan. Ay gsadsadian wayk taw taglag ay taglao sanya fag dalan.

Sik Kayu ay at Rawvg

¹⁵ “Dirii ngay tagfandaya te, ‘Au wan at sadi Dius at taglong.’ Kanya gina kadasug sa ayu magup kata sik ngay tupa. Ay dewa katanya mangaro kafag ngay taw kata way sik ngay tagfangagat fag idu talun.

¹⁶ Ay sumaful ban am anya siginan at fakamulun at rawvg. Newa wa batang e grabas rawvg sarisa siginan sik sabinit, ay wa batang e grabas rawvg bayabas siginan sik dugi dauy.

¹⁷ Katanya yangay, fagayu at masine fag kayu at rawvg masine yangay. Ay at yud e tungkul fag kayu at rawvg wa yangay e tungkul.

¹⁸ Sik masine fag kayu wa grawvg yud e tungkul, ay sik yud e tungkul fag kayu wa grawvg at masine.

¹⁹ Ay fagayu kayu nu dway masine at rawvg, e gfuan ban ay gukas sasad afuy.

²⁰ Katanya yangay sumaful am at yud matuyan fag ngay taglong siginan at fakamulun at rawvg.

At Matuyan ay at Yud Matuyan fag ngay Tagadal

²¹ “Bunwa ban fagayu taglong sa angku te, ‘Ku Fun, ku Fun,’ at kumful sas Dius at fagfagtainanan, kayu way ban tagfaning ku Mama sas banwa at fakaylatun.

²² Ay gina ban Dius ginsaful asalanan fag menit, ngayu bank taw taglong sa angku te, ‘Em Fun, em Fun, o nunda wami nafamoyung am longan siginan am ngayan, ay siginan am ngayan o nunda wa yangay mi naiyan at mauri fag ngay falad, ay anggan nafakamulun ami at ngay madulo siginan yangay am ngayan?’

²³ “Gbalus kban anya te, ‘Duan, kwa gtoglag ayu. Ayayui wan siginan angku, am fag ngay taw tagfakamulun at mauri.’

Duak Takawat Bale

²⁴ “Fagayu at nadungug ay at nafaning ku longan kata sik taw at mamatanganan nu gbale. Kanya fag taw naali ngabasad, at kabasadan andasug sas gang.

²⁵ Ay narak maksvn, ay mamam anbia, ay tagmara nayukfu at bale, ay dewa katanya at bale di nfuan, aroro at turuk at kabasadan andasug tua sas gang.

²⁶ Ay fagayu taw dewa nadungug ku ngay longan ay nu dway nafaning, kanya kata way sik taw at yud e fagsafulun. Nu gbale, si way sad lagnas.

²⁷ Ay narak maksvn, ay mamam anbia, ay tagmara nayukfu at bale, ay kafag bale anfuan ay anrasras wan.”

²⁸ Ay Isus nu ntabu wan nu gfoyung, ngay taw nu nadungug, andulo,

²⁹ aroro nu gfoyung, kata tua sik fun, ay di kata ngay tagfoyung Muisis at Faugali.