Mateu 5 - Fanawbuid tagsibaliwas Fakayabian

At Mauseganan fag Taw

¹ Ay Isus nu nalag sanya fag ngay taw, kanya naulul yay sa sik buksul ay malunggung sanya. Ay at ngay tagadal nangakbang sa anya.

² Ay Isus nafoyung sa anya fagayu te,

³ “Mauseganan ngay taw at yud e kwa tagsarig tua Dius, aroro Dius gfagtainan tua anya.

⁴ Mauseganan ngay taw takabalu, aroro kanya gbul ban Dius at nafatuyanan.

⁵ Mauseganan ngay takamababaun tua, aroro kanya gbul ban Dius at nafatuyanan.

⁶ Mauseganan ngay taw nu kaylat tua gfakamulun Dius at fakaylatun, aroro Dius ggubuk tua ban anya.

⁷ Mauseganan ngay taw takafanyu tua at iba katsi, aroro e kafanyu yangay ban anya.

⁸ Mauseganan ngay taw at ngay amatanganan nu sa tua gugat at masine, aroro kanya lumag ban Dius.

⁹ Mauseganan ngay taw nu mafafalukmeanan tua tiba, aroro kanya ban fagayu kangayan te, Dius at ngay sisian.

¹⁰ Mauseganan ngay taw nu e gfauri anya dewa masine at fakamulun, aroro Dius gfagtainan tua anya.

¹¹ “Mauseganan tuam gina e gfalingun ayu, ay e gfauri ayu, ay e glong at mauri sabaliwa ayu, siginan nu gafanud am sa angku.

¹² Useganani ay aylati dewa katanya, aroro ngayu ban Dius at fon ayu sas banwa at maksvn nu masine. Aroro katanya yangay nu e gfauri Dius at ngay taglong at naguna ayu.

Barara ay Fagmayamagun

¹³ “Am wan takata sik barara ste swa daga. Ay barara nu dway mayat ya, tain ro nu gdog kae ayat? We tungkul ya. Nu katanya, gukas wan laman ro ngay taw gsiad wan.

¹⁴ “Am takata sik salung ste swa daga. Sik furuan daul tagsis tungud buksul wa masuksuk.

¹⁵ Katanya yangay sik taw nu nafasalung tua sik salung, di nanuklub sik alungkung, nu bunway namasa tuas fagfatungkudan laman dumamlag fagayu taw sanya fag bale.

¹⁶ Ay ugali katai sik salung nu gdamlag sas fagayu taw, laman ngay taw nu nalag te, masine ay fakamulun, sumeg ay Mama sas banwa.

Isus ay Muisis at Faugali

¹⁷ “Lag am gamatangan te, ku fagindasugun laman nanfae yud kway e tungkul Muisis at Faugali, ay anggan Dius at ngay taglong at longan. Duan. Ku fagindasugun laman namafasludan kway at Faugali.

¹⁸ Matuyan nu glong au ayu te, dewa ban banwa ay daga ankamin, nusdi sik afud sirut Muisis at Faugali wa myud e tungkul yakmay ban umfasludan fagayu.

¹⁹ Nu katanya, nusnga sinu takamabo nusdi sa talay fag suguan sis Muisis at Faugali ay mannga nu gfoyung yay tiba te, ‘Katanyai anggan am,’ e gfangayan waban kafag taw te, tiba daga sis Dius at fagfagtainanan. Ay nusnga sinu tagfaning fia ay gfoyung yangay kanya fag ngay suguan, e gfangayan yangay ban kafag taw te, tagtungud sas Dius at fagfagtainanan.

²⁰ Aroro gfoyung kwa ayu te, ay fagmatuyanun nu dyakmay tumungud ngay tagfoyung Muisis at Faugali ay ngay taw Fariseu at fagmatuyanun, wa ban am umful sas Dius at fagfagtainanan.

Isus at Foyungan sabaliwa Takauri

²¹ “Nadungug wam at foyungan ebi sa tam ngay mangaguyang te, ‘Lag gfabul. Aroro nusnga sinu at nafabul taw, umfaurianan.’

²² Ay katsi glong au ayu te, nusnga sinu takauri at faduksay, umfaurianan. Ay nusnga sinu taglong sat faduksay te, ‘Gfansaful o,’ e tumaban ban sa sangay taginsaful. Ay nusnga sinu taglong te, ‘Wo e amatanganan,’ kanya ban nangadasug sas Afuy Daul.

²³ “Aroro katanya, kaduge o gfon am fanggalangun sas Dius sas fagirugan fanggalangun, ay nu e namatangan yay o am nasalan sam faduksay,

²⁴ famatoi yap sanya am fanggalangun ay loi wan ay namasine yap o am malong sam faduksay. Ay nu nsine wan, afolii yap ay foni wa dayvm am fanggalangun sas Dius.

²⁵ “Kaduge tagfantabugan gtaban emu sas tagwabilug, fasinei wan am malong sa anya, laman wo sak gatabanan sas tagwabilug, ay tagwabilug wa sak gfadasug emu sas tagulit laman ro wa gubung emu.

²⁶ Matuyan nu glong au emu te, wa ban o umkalfas yakmay ban o nabayad am bedan anggan tiba alay fag salapi.

Isus at Foyungan sabaliwa Tagfanugtug

²⁷ “Ay nadungug wam at foyungan ebi te, ‘Lag gfanugtug.’

²⁸ Ay katsi glong au ayu te, nusnga sinu fag mangama nu nadama sik mangena ay anke algan mauri sa anya, sat amatanganan gfanugtug wan.

²⁹ Ay am siun fag mata nu gfae asalanan way emu, guladi wan ay ukasi. Aroro masine sik afud am bilug dewa nalyam wan, nu bundi ngap ban gukas fagdaul am bilug sas afuy daul.

³⁰ Ay am siun fag daluap nu gfae asalanan way emu, gatvngi wan ay ukasi. Aroro amasine sik afud am bilug dewa nalyam wan, dewa ngap ban fagdaul am bilug nu kadasug sas afuy daul.

Isus at Foyungan sabaliwa Tagaubunun at Mangena

³¹ “Ay ebi e foyungan te, ‘Nusnga sinu tagaubunun at mangena, masine kanya nu gfon sik rirukan famatuyan sabaliwa nu gsaruayan.’

³² “Ay katsi glong au ayu te, nusnga sinu at naubun at mangena, ay kafag mangena nu doma nanamatugtug, kafag mangama way tagfafanugtug at mangena nu nadog nafangindugan. Ay nusnga sinu at kumdadwa sanya fag mangena kaduge at dan fag mangama gleleg, anggan kanya gfanugtug yangay.

Isus at Foyungan sabaliwa Tagfaksvn at Longan

³³ “Ay nadungug wam ebi at foyungan sa tam ngay mangaguyang te, ‘Lag gfatuyanan nu dway am mafafasludan, nu bunway fafasludani tua ay ngay nafatuyanan sa tam Fun.’

³⁴ Ay katsi glong au ayu te, nu gfatuyanan am, lag gfaksvn ay longan. Lag sak glong te, ‘In yay banwa,’ aroro banwa Dius wan at faglunggungan.

³⁵ Ay lag sak glong te, ‘In yay daga,’ aroro fagdaul daga, kanya wan Dius at fagsiadan. Ay lag sak glong te, ‘In yay furuan Erusalem,’ aroro kanya fag furuan Tiba Tungud fag Fun at furuan.

³⁶ Ay lag sak glong te, ‘Tuy yay ku alfuyu,’ aroro wam mafafaubanun ay mafafalayung ay buk nusdi sadi.

³⁷ At masine ay famalus nu ‘Kin,’ kin wa fia. Ay ay famalus nu ‘Duan,’ anud duan. Ay longan nu natungud wa sanya, kanya siginan Tagmauri.

Isus at Foyungan sabaliwa Tagfasud at Mauri

³⁸ “Ay nadungug yangay am ebi at foyungan te, ‘Mata fasudi sas mata ay bagang fasudi sas bagang.’

³⁹ “Ay katsi glong au ayu te, lag gfasud ya dewa e nafauri ayu. Sik taw nu nafalang am siun fag fingi, fasalubangi am wala fag fingi.

⁴⁰ Sik taw nu nataban emu sa sangay funan, ay nu gyabulun wan am lanbung, foni wan anggan am fangumutan.

⁴¹ Ay sik taw nu nafabulun emu te, ‘Bubai ku famubaun nusnga seyayu ku fakaylatun,’ bubai duak kayayu at fakaylatun.

⁴² Foni sas nusnga sinu taget sa emu, ay faulbusi yangay sat nangulbus sa emu.

Esugi ay Fawayan

⁴³ “Ay nadungug yangay am ebi at foyungan te, ‘Esugi am iba, ay lag kesug am fawayan.’

⁴⁴ “Ay katsi glong au ayu te, esugi tagfawayan ayu ay darangini tagfauri ayu,

⁴⁵ laman umtuyan te, am wan ay Mama tagsis banwa at ngay sisian. Aroro Dius gfasure menit sat mauri fag taw ay sat masine fag taw. Ay gfarak sat matuyan fag taw ay sat yud matuyan fag taw.

⁴⁶ Ay fakesugun nu takesug way lang ayu, wa ban am e fagfanyaun at masine siginans Dius. Aroro anggan ngay tagbul famayad laman sas fun kesug yangay takesug anya.

⁴⁷ Ay fagfakamatoanun nu ay ngay fagadgalangan way lang, wam e fakamulun tagtungud tibak taw. Aroro anggan at yud gtoglag Dius gfakamatoan yangay at ngay fagadgalangan.

⁴⁸ Lag am e malong, kata ay Mama sas banwa nu yud e malong.