Mateu 4 - Fanawbuid tagsibaliwas Fakayabian

Satanas Nafaskud Isus.

¹ Ay arodi at Masine fag Falad nataban Isus sas talun at yud e taw, laman Satanas namaskud Isus sanya.

² Ay kaduge ufatk safuluk menit ay ufatk safuluk yabi Isus we naon, ay nu ntabu wan, kalunus.

³ Ay Tagfaskud andasug wan ay glong sas Isus te, “Nu Dius tuo at Baguama, longi stae fag ngay gang te, Akawati sik fakonun.”

⁴ Ay Isus gbalus te, “Duan. Anriruk wan sas Dius at Longan te, ‘Sik taw nu gleleg, bundi siginan langs fakonun, siginan tua Dius at Longan fagayu.’ ”

⁵ Sanya ginan, Satanas nataban Isus sas Erusalem, at yud e malong fag furuan, ay nafalindug anya sas Dius at bale sat tiba tungud fag afud.

⁶ Ay Satanas glong yangay fia sas Isus te, “Nu Dius tuo at Baguama, tosi, aroro anriruk wan sas Dius at Longan te, ‘Kanya sumugu at ngay tagbarita laman ggubuk emu, laman at daluap gurug emu, laman am darafa di katuktuk sas gang.’”

⁷ Ay Isus nabalus yangay te, “Duan, anriruk yangay sas Dius at Longan te, ‘Lag gfaskud am Dius am Fun.’ ”

⁸ Ay at fadogan, Satanas nataban Isus sa sik tungud buksul daul ngabat. Ay nafabanawan anya sa sangay fagfagtainanan sas fagdaul daga, ay anggan nusnge wain at ngay fagmaramramanun ay at ngay fagmasineun.

⁹ Ay Satanas nalong yangay fia sas Isus te, “Gfon kban emu fagayu am nalag nu namalub tua ro wo laman gseg angku.”

¹⁰ Ay Isus gbalus te, “Loi wan, Satanas, lag ste ya, aroro anriruk wan sas Dius at Longan te, ‘Segi ay Fun ay Dius, ay sia yakman lang ay fagfaningan.’”

¹¹ Ay sanya ginan, Satanas naubun Isus. Ay sik ngay tagbarita andasug ay nagubuk anya.

Isus Nalo sas Talun Galilea ay Nafoyung Sanya

¹² Ay Isus nu nadungug te, Uan Tagfasurung ankubung wan, kanya anfoli wan sas talun Galilea.

¹³ Ay kanya nalo wan siginans furuan Nasaret ay namanwan yangay sas furuan Kapernaum sis tigyangan lino, ebi sis Sebulun ay Naftali fag gaban at talun.

¹⁴ Katanya nafafasludan Isayas, Dius at taglong at sadi ebi at longan te,

¹⁵ “Talun Sebulun ay talun Naftali sanya sis tigyangan Lino Galilea, tsiuy baliwas Liskung Urdan, sis talun Galilea, sanya ngayu at yud Udyu fag taw.

¹⁶ At ngay malunggung sisad madulum nalag sik fagmayamagun daul. Ay tiba at malunggung sas fakabulun fag talun ay sis fakabulun at lanbung ansure yangay sa anya sik fagmayamagun.”

¹⁷ Siginan ginanya fag menit, Isus gfasigad gfoyung te, “Ubuni ay ngay asalanan, aroro munakbang wan Dius sas banwa nu gfagtainan taw.”

Isus Nafili Taguna at ngay Tagadal

¹⁸ Ay gina Isus glo sis tigyangan Lino Galilea, kanya nalag sik duksay Simun, tiba at ngayan Pedru, ay anggan at arian Andres nu gukas at fanggamat albon sasad lino, aroro kafag duksay tagfangalbon.

¹⁹ Ay Isus nalong anya te, “Wainyayam, aloi angku. Ay namoyung au ayu nu gfaful ban am taw kata nu gfaful am albon katsi.”

²⁰ Ay arodi vtv kanya fag duksay nafamato at fanggamat albon ay nanangalo Isus.

²¹ Gina Isus gtaglayun glao sanya ginan, kanya nalag yangay fia sik duksay, Santiagu ay Uan, Sebedeu at baguama fagdua. Kafag duksay ay anggan at mama Sebedeu sisad sakayan lino gina gsimat at ngay fanggamat albon. Ay Isus nagewan duksay.

²² Ay arodi vtv kafag duksay naubun wan at sakayan ay at mama, ay nanangalo Isus.

Isus Nafoyung ay Nafafia

²³ Ay Isus nalo sas fagdaul talun Galilea laman namoyung sanya fag ngay bale fakafulan at masine fag barita sabaliwa Dius nu gfagtainan. Ay Isus nafafia fagayu taw, nusnge wain kafag ngay taw at fakasaitun.

²⁴ Ay andungug Isus at fakamulun sas fagdaul talun Sirya. Ay sanya fag ngay taw nataban sa anya fagayu at ke fakasaitun, dewa snga setaw fag fakasaitun, ay at ngay taginkidapan sas faganinianun, ay anggan ngay tagfansaful, ay anggan tagfatfat fag ngay taw, ay anggan at yud malao. Ay Isus nafafia tua anya fagayu.

²⁵ Ay ngayuk taw nanangalo Isus. Kafag ngay taw siginans Galilea, ay Safuluk Furuan Daul, ay Erusalem, ay talun Udea ay tiba siginans dife Liskung Urdan fag talun.