Mateu 12 - Fanawbuid tagsibaliwas Fakayabian

Isus Famiangalay fag Menit at Fun

¹ Ay gina sis Famiangalay fag Menit Isus ay at ngay tagadal gdalan sa sik gamasun. Ay ginanya at ngay tagadal kalunus, ay nabul ngay raug trigu ay naon.

² Ay sik ngay taw Fariseu nu nalag, nalong sas Isus te, “Damai am ngay tagadal at fakamulun. Takatanya wa gfaning tam faugali sabaliwas Famiangalay fag Menit.”

³ Ay Isus nabalus te, “O nunda yam natap sabaliwa fun Dabid at nafakamulun ebi gina kanya ay at ngay ufud kalunus?

⁴ Kanya nasakbo sas Dius at bale ay naon fanggalangun fag tinapay, ay nafon yangay sat ngay ufud, Dius at Longan dewa gsalag takatanya. Aroro at masine kon, kayu way ngay tagfon fanggalangun.

⁵ Ay o yam yangay natap sis Muisis at Faugali te, ngay tagfon fanggalangun sis Dius at bale wa gfaning Famiangalay fag Menit at faugali, ay dewa katanya, di e asalanan?

⁶ Ay glong kyangay ayu te, e ndasug ste tagtungud yay Dius at bale.

⁷ Amatangani Dius at Longan te, ‘Ku fakaylatun bunwa ay fanggalangun, nu bunway kaylat au nu kafanyu tuam ay iba.’ Ay nu nasaful di am kanya fag longan at masuad, diam nangus glong sabaliwa sangay taw at yud e asalanan te, e asalanan.

⁸ Au, Taw at Baguama, au wan Famiangalay fag Menit at Fun.”

⁹ Ay Isus nalo sanya ginan ay nasakbo sas taw Udyu at bale fakafulan.

¹⁰ Ay sanya e sik taw at yud mafalelegan at daluap. Ay sanya yangay sik ngay taw Fariseu, ay kanya fagayu grvbvy at balyawvtan laman e fantabugan te, Isus e asalanan, ay nainto sas Isus te, “O gfaning tam faugali sik taw nu gfafia at ke fakasaitun gina Famiangalay fag Menit?”

¹¹ Ay Isus nabalus sanya fag ngay taw te, “O nunda wam namul ya ay tupa nu ntong sasad lusung gina Famiangalay fag Menit?

¹² Sik taw amafanud yap tua sik tupa. Nu katanya, sik taw gfaning Muisis at Faugali nu gfakamulun tua at masine sis Famiangalay fag Menit.”

¹³ Ay sanya ginan Isus nalong sa kafag taw at yud mafalelegan at daluap te, “Falugdei am daluap.” Ay kafag taw nafalugde. Ay at daluap anfia wan ay kata wan at sadi.

¹⁴ Ay kafag ngay taw Fariseu nalo wan ay gkamatoan sabaliwa nu namabul ban Isus.

Dius at Fagsuguan

¹⁵ Ay Isus nasaful ngay taw Fariseu at algan, ay nalo wan sanya ginan. Ay ngayuk taw galo anya. Ay Isus nafafia fagayu at ke fakasaitun.

¹⁶ Ay Isus nasalag kafag ngay taw laman di kamarita sabaliwa anya.

¹⁷ Fakatanyaun anfasludan Isayas fag taglong at foyungan te,

¹⁸ “Tuy wan ku fagsuguan, ku filian ay ku fakesugun, guseganan au anya. Namon au anya ku Falad, laman ban kanya namoyung sas sangay talun at ngay taw te, Katsi Dius matuyan namagtainan ayu.

¹⁹ Kanya ban di kamabadbaboan, ay maran tua nu garingang, ay di ban kadungug at aringang si sangaba dalan,

²⁰ ay dewa e sik sigbo malukyukan, di ban ggatvng. Ay dewa sik salung gakarabungun, di ban gfarabung. Ay kanya ban gfataglayun nu gfakamulun yakmay ban nafae fagmatuyanun.

²¹ Ay fagayu ban talun at ngay taw e fagsegun tua sa anya.”

Isus ay Satanas

²² Ay e nataban sas Isus sik taw at ke mauri fag falad, ay kanya wa glag ay wa maringang. Ay Isus nafafia anya ay kanya maringang tua ay glag.

²³ Ay sanya fag ngay taw andulo ay gkamatoan te, “Malgau in wan fun Dabid at kasugfunanan.”

²⁴ Ay ngay taw Fariseu nu nadungug kafag ngay taw at longan, nabalus te, “At fagmabalyananun gaiyan mauri fag ngay falad siginan way Lango at Fun, kanya mauri way fag ngay falad at fun.”

²⁵ Ay Isus nasaful kafag ngay taw Fariseu at amatanganan, ay nalong anya te, “Kayu fun at fagfagtainanan fag ngay taw nu gawayan way gugat, abandi kalyam wan kanya fag fagfagtainanan. Ay katanya yangay at kumfasludan sa sik furuan ay mannga sik talafuan nu gawayan way gugat.

²⁶ Ay Satanas nu gaiyan way at sadili, gfawayan way at sadili, ay wa ban gtaglayun at fagmafunanun.

²⁷ Ay ku fagmabalyananun gaiyan at mauri fag ngay falad nu siginan way Lango at Fun, daginan way ay ngay taw at fagmabalyananun at fangaiyan at mauri fag ngay falad? Ay ngay taw at fakamulun gfatuyan te, wa matuyan ay longan.

²⁸ Ku fagmabalyananun gaiyan mauri fag ngay falad nu siginan tua Dius at Falad, at masuad, Dius at Fagfagtainanan andasug si ayu.

²⁹ “O sik taw masakbo sa sik maseganama at bale laman nanfangkamul at ramraman nu dway nasiuk kafag taw at maseganama? Duan. Ay kanya nu nasiuk tua, mafangkamul wan sanya fag bale at ngay ramraman.

³⁰ “Ay nusnga sinu at yud gfadiuganan angku, kanya ku fawayan way. Ay nusnga sinu at yud ggubuk angku gfaful ngay taw, gfasaruayan way.

³¹ Ay nu katanya, glong au ayu te, nusnge wain fag asalanan, ay nusnge wain fag longan tagfauri Dius, Dius gfalyam yay. Ay dewa katanya nusnga setaw fag longan at mauri sabaliwa at Masine fag Falad, Dius wa gfalyam ya.

³² Ay nusnga sinu at nalong at mauri sabaliwa angku, Taw at Baguama, Dius gfalyam yay. Ay dewa katanya, nusnga sinu at nalong at mauri sabaliwa at Masine fag Falad, Dius wa gfalyam ya, dewa katsi fag ngay menit, ay kabavn ban.

³³ “Sik kayu at masine, at rawvg masine yangay. Ay sik kayu at yud masine, at rawvg wa masine. Sik fun kayu at rawvg tagfasaful sas taw te, tain kafag kayu.

³⁴ Kata wayam sik ngay ule at ke ganga! Ay fagyudun mafafoyung at masine, aroro mauri am. Aroro sik taw glong nusnga setaw tagsit amatanganan.

³⁵ Sik masine fag taw at longan masine tua, aroro at amatanganan masine. Ay sik mauri fag taw mauri way at longan, aroro at amatanganan mauri.

³⁶ Ay gfoyung au ayu te, gina ban fanginsafulan asalanan fag menit, fagayu taw gfoyung sas Dius sabaliwa at longan fagayu at yud e tungkul.

³⁷ Aroro siginan am ngay longan Dius ban gtuyan emu te, di o e asalanan, ay mannga, e asalanan way o.”

Tibak Taw Udyu Kaylat Gyalagun sik Mabalyanan fag Fakamulun

³⁸ Ay arodi tibak tagfoyung Muisis at Faugali ay tibak taw Fariseu naet sas Isus te, “Takamoyung, kaylat ami nu gfalag o emi sik mabalyanan fag fakamulun tagfatoglag te, Dius at nasugu emu.”

³⁹ Ay Isus nabalus anya te, “Ay fagyalagunun sik ke fakatoglagan way fag fakamulun aroro mauri wayam fag ngay taw ay at yud matuyan sas Dius. Ay wa ban e gfalag ya sa ayu takatanya sas day at kinfasludan sas Dius at taglong Unas.

⁴⁰ Aroro kata yangay ebi Unas nu tuluk menit ay tuluk yabi nu sisad albon daul at ungdan, katanya yangay ban au, Taw at Baguama, tuluk menit ay tuluk yabi nu sisad luib.

⁴¹ Ay ebi fag ngay taw Ninibe gdog yangay ban gleleg gasfuan ayu gina ban fanginsafulan asalanan fag menit, ay glong ban te, mauri am. Aroro ngay taw Ninibe naubun tua at ngay asalanan gina nadungug Unas at foyungan. Ay amatangani, at kindasug katsi gtungud yays Unas, ay dewa katanya, wam gubun ay ngay asalanan.

⁴² Ay anggan talun Seba at fun fag mangena, gdog yangay ban gleleg gasfuan ayu gina ban fanginsafulan asalanan fag menit ay lumong ban te, mauri am, aroro kafag mangena ndasug sas fun Sulumun siginans fungfung daga, laman nandungugan fun Sulumun at mamatanganan fag ngay longan. Ay amatangani, at kindasug ste katsi, gtungud yay fun Sulumun, ay dewa katanya, wam kaylat gdungugan anya.

Sik Mauri fag Falad Gdog yay Kafoli sat Bale

⁴³ “Sik mauri fag falad nu naubun at fagbanwanan fag taw, nalo sa sangay talun at yud e mamam, laman nanrvbvy tibak fagbanwanan. Ay nu dway e nalag,

⁴⁴ kanya gamatangan te, ‘Kafoli kyay siring sa ebi ataw ku bale.’ Ay nu ndasug wan, manlag di malanu ay masine, ay we gbanwan ya sanya.

⁴⁵ Ay kafag mauri fag falad gdog yay nalao ay nataban yay fitu yak mauri fag falad tagtungud yay anya nu mauri. Ay kanya fagayu namanwan sanya fag taw, ay kafag taw nu mauri aksvn yap ebi ataw. Katanya yangay ban takafasludan anggan sa ayu fag ngay taw mauri.”

Isus at Mina ay at ngay Faduksay

⁴⁶ Ay kaduge Isus gfoyung sanya fag ngay taw, Isus at mina ay at ngay faduksay andasug, ay gfanya anya sis lod bale, ay gyafakamatoanun anya.

⁴⁷ Ay e nalong sas Isus te, “Am mina ay am ngay faduksay sis lod bale, ay gyafakamatoanun emu.”

⁴⁸ Ay Isus nabalus te, “Sinu nunda ku mina ay ku ngay faduksay?”

⁴⁹ Ay Isus natiu at ngay tagadal ay nalong te, “In fagayu ku mina ay ku ngay faduksay wan.

⁵⁰ Aroro nusnga sinu tagfaning ku Mama sas banwa at fakaylatun, kanya tua ku ngay faduksay ay ku mina.”