Malakyas 3 - Fanawbuid tagsibaliwas Fakayabian

¹ Dungugani, Yawi at Mabalyanan glong te, “Namadasug kban ku fagsuguan laman namalganan ku dalan. Sanya ginan, ay fagfanyaun fag Fun umdasug wan sat bale. Kadasug ban ku fagsuguan at namafasludan ku nasadian.”

^2-3 Dewa katanya, sinu ban fag taw at magwanta gina Dius kadasug? Ay sinu yangay ban at manangalindug sat daga salubangan? Kanya ban kadasug kata sik afuy nu gfadalusan sanbung ay kata sik famalyam lanbung at layungun. Kanya ban namasine ngay taw Lebi kata sik takawat sanbung nu gfasine salapi ay gintu. Ay kanya ban fagayu at fanggalangun gdog tua e tungkul sas Yawi.

⁴ Nu katanya, Yawi ban gdog yay kaylat ngay taw Uda ay ngay taw Erusalem at ngay fanggalangun kata ebi ginan.

⁵ Yawi at Mabalyanan glong te, “Kadasug kban laman nanginsaful ayu. Ay gfatuyan kban vtv te, mauri ngay tagfangabalo, takamuagan fag tagwabilug, at yud gfakasakan at famayad sat ngay fagsuguan, tagfauri ngay fagbubayun ay at yud e fagtainan ya, ay at yud matuyan sat ngay betaw. Namakamulun kban takatanya sa ayu, at yud gsuyu angku.”

Nu Gfon Fasafuluk Afud

⁶ “Au Yawi at yud gbadbalian. Ay katanya am fag ngay taw, Akub at kasugfunanan, ay fagyudun namin.

⁷ Dewa katanya, kata wayam ay ngay mangaguyang; wam nafaning ku ngay faugali. Ay katsi, afolii wan sa angku laman kafoli kyangay sa ayu. “Dewa katanya, ginto am sa angku te, ‘Setain ya ro nu nangafoli ami sa emu?’

⁸ “O nunda sik taw makatu gfangkamul siginans Dius? Nu katanya, gbalus au ayu te, nafangkamul am siginan angku. “Ay ginto yangay am angku te, ‘Tain nu gfangkamul ami siginan emu?’ ” “Nafangkamul am aroro wam nafon sa angku ay ngay fasafulu ay ay ngay famonun.

⁹ Nu katanya, umdasug ban faurianan sa ayu ay sas fagdaul ay talun aroro nafangkamul am siginan angku.

¹⁰ Dewa katanya, katsi glong au ayu te, faskudi angku. Bubai fagayu ay fasafulu ay suadi sas fagfungsuan si ku bale laman e fakonun sanya. Nu nafakamulun tua ban am takatanya, gluang kban banwa at fagbanawanan laman gfadasug au sa ayu ngayuk famonun, ay wa ban sak ya sa ay ngay fagfungsuan.

¹¹ Ay gsalag kban ngay ulud nu namamin ay nu nanrabas ay ngay tanum wat ubas at ngay rawvg.

¹² Ay ginanya ban, fagayu talun at taw gfangayan ayu te, at manabayan fag talun, aroro ay ngay furuan at masine fag fagbanwanan. Au, Yawi at Mabalyanan, taglong tuy.”

¹³ Yawi nalong yangay te, “Glong am mauri sabaliwa angku. Dewa katanya, ginto yayam te, ‘Nataw nunda em nalong at mauri sabaliwa emu?’

¹⁴ Nalong am te, ‘We masuad tagfaning Dius. Nataw ban at fanambagun sa antam nu nafaning tam at ngay suguan? Ay nataw ban at fanambagun sa antam nu nafalag tam te, kabalu tam ay gubun tam ngay asalanan sis Yawi at Mabalyanan at daga salubangan?’

¹⁵ Ay malong tam te, ‘Takamatungudun fag ngay taw mauseganan, aroro kanya fagayu kae ngay ramraman tua. Ay kanya fagayu wa gafaurianan, dewa nafaskud Dius.’ ”

¹⁶ Ay sanya ginan, ngay tagsuyu Yawi gkamatoan, ay Yawi nadungug. Kafag ngay taw at ngay ngayan anriruk sa sik fafil tagsis Yawi at daga salubangan, laman Yawi gamatang tua gugat fagayu tagsuyu ay tagtoglag anya.

¹⁷ Yawi at Mabalyanan nalong sa sangay tagafanud te, “Gina kban gfaurianan fag menit, gagbilug kban ayu, ay gtuyan au te, am wan ku ngay taw. Kwa gfaurianan ayu, kata sik mama nu yud gfaurianan at ngay sisian tagfaning anya.

¹⁸ Ay fagayu ban taw sumaful at matuyan ay at mauri fag ngay taw at fagsamanun, ay tagfakamulun sa angku ay at yud gfakamulun at fagsamanun.”