Lukas 7 - Fanawbuid tagsibaliwas Fakayabian

Isus Nafafia sik Tagfangguna Tagfawayan at Fagsuguan

¹ Isus nu ntabu wan nu gfoyung sa sangay taw, kanya nasas Kapernaum.

² Ay sik tagfangguna tagfawayan at fakesugun at fagsuguan e fakasaitun ay gakabulun.

³ Kafag tagfangguna nu nadungug Isus at fakamulun, kanya nasugu taw Udyu at ngay fagtainan laman namainfanyuan sas Isus te, “Sai yap ku bale ay namafiai ku fagsuguan.”

⁴ Ay kafag ngay fagtainan nu ndasug sas Isus, maksvn nu get te, “Kanya fag tagfangguna matuyan. Nu masine, gubuki yap anya,

⁵ aroro kanya kesug tua fagayu taw si tam talun, ay kanya wan at nafawat tam bale fakafulan.”

⁶ Ay Isus nangalo kanya fag ngay fagtainan. Ay nu munakbang wan sat bale, kafag tagfangguna tagfawayan nasugu at ngay fagadgalangan, laman namoyung sas Isus te, “Ku Fun, deyud ro wo ndasug sa ku bale, aroro kapla kway ro nu sak tua ro wo gsakbo.

⁷ Nustua kwa masine nangakbang sa emu. Aringangi way lang, ay ku fagsuguan ro umfia wan.

⁸ Aroro e fun au tagtungud yay angku, ay e tagfawayan kyay si ku daga vtv. Ay nu nalong au sat sadi te, Loi wan, kanya glo wan. Ay nu nalong kyangay sat sadi te, Stei wan, kanya stae wan. Ay nu nalong au sa ku fagsuguan te, Fakamuluni tuy, kanya ro namakamulun fia.”

⁹ Ay Isus nu nadungug, andulo maksvn ay nasalubang sa sangay taw ngayu tagalo anya, ay nalong te, “Glong au ayu te, sas fagayu taw Israel kwa batang gdungug takaksvn nya nu gafanud.”

¹⁰ Ay at nasugu fag ngay fagtainan nu noli wan sat bale, manlag di, anfia wan kafag fun tagfawayan at fagsuguan.

Isus Nafaleleg sik Fagbubayun at Baguama

¹¹ Wa glugo ay Isus andasug sa sik furuan at ngayan Nain. At ngay tagadal ay anggan sik ngay taw ngayu galo anya.

¹² Isus nu munakbang wan sis furuan at sakbawan alad, nafablang sik ngay taw siginans furuan, gbuba sik taw at mabulan laman namoli. Kanya at mabulan sik fagbubayun at baguama fag sadi. Kafag fagbubayun sadi way at sisian. Ay sik ngay taw ngayu siginans furuan galo anya.

¹³ Ay tam Fun, nu nalag kafag fagbubayun, kafanyu, ay nalong te, “Lag o gwayway.”

¹⁴ Ay Isus nanangakbang ay nated fagsuadan at mabulan, ay tagbuba anragang. Ay Isus nalong sa kafag baguama at mabulan te, “Fagbaguama glong au emu te, abangkadi.”

¹⁵ Ay kafag baguama at mabulan anbangkad ay naringang. Ay Isus nafon sat mina.

¹⁶ Ay fagayu taw kalimu ay naseg Dius te, “Sik mabalyanan fag taglong andasug sa antam. Dius andasug sat ngay taw.”

¹⁷ Ay anfagdaul sas talun Udea ay sat ligung fag ngay furuan, Isus at nafakamulun takatanya.

Isus ay Uan Tagfasurung

¹⁸ Uan at ngay tagadal nananlong sa anya fagayu aro taw Isus at nafakamulun.

¹⁹ Ay Uan nauro at tagadal at dua, ay nasugu laman nanginto sa tam Fun te, “O o wan ebi at foyungan tagakadasugun, ay o mannga gfanya yay ban mi?”

²⁰ Ay at ngay tagadal nu ndasug sas Isus, glong te, “Uan Tagfasurung nasugu emi sa emu, laman nanginto te, ‘O o wan ebi at foyungan tagakadasugun ay o mannga gfanya yay ban mi?’ ”

²¹ Ginanya, Isus nafafia ngayuk taw at ke fakasaitun, ay ngayuk taw at ke mauri fag falad. Ay nafafia yangay ngayuk taw at yud glag.

²² Ay Isus gbalus Uan at ngay tagadal te, “Loi wan ay foyungi sas Uan ay nadungug ay ay nalag. Ngay taw yud glag ebi, katsi glag tua, ay ngay yud malao, katsi malao tua, ay ngay tagabangbang katsi anfia tua, ay ngay yud gdungug, katsi gdungug tua, ay ngay kinbul nadog tua naleleg, ay ngay yud e kwa, katsi e nafadungug tua at Masine fag Barita sa anya fagayu.

²³ Mauseganan tua sik taw nu ddi gaduanun sa angku.”

²⁴ Ay Uan at ngay tagadal nu nalo wan, Isus gfasigad gfoyung sa sangay taw sabaliwas Uan te, “Wain ro ay fagnaloun sas talun at yud e taw? Nataw ya ay fagyalagunun sanya? O kaylat am nanlag sik sigbo, tagmara at fagfauyusun?

²⁵ Ay nu bunyay kanya ay fagyalagunun, nataw ya fia ay fagyalagunun sanya? O kaylat am nanlag sik taw at ke lanbung at maksvn nu masine? At ke lanbung at maksvn nu masine ay gleleg manabayan, takatanya fag taw nu gbanwan sa tua tiba tungud fag fun at bale.

²⁶ Ay nu bunway kanya, nataw ya ay fagyalagunun? O kaylat am glag Dius at taglong at sadi? Ay kin, nu katanya, glong au ayu te, Uan gtungud tua tibak taglong.

²⁷ Kanya wan Dius at nafoyung sit Rirukan ebi te, ‘Gsugu kban ku fagsuguan laman at nangguna emu. Ay kanya ban namalganan am dalan.’

²⁸ Glong au ayu te, ya batang e nsalug tagtungud tua Uan. Ay dewa katanya, nusnga sinu tiba daga sis Dius at fagfagtainanan, kanya gtungud tua Uan.”

²⁹ Fagayu taw, anggan ngay tagbul famayad laman sas fun, nu nadungug Isus at foyungan, kanya fagayu naseg Dius te, matuyan. Aroro Uan nafasurung ebi kafag ngay taw.

³⁰ Ay ngay taw Fariseu ay tagfoyung Muisis at Faugali kauri Dius at algan sa anya fagayu, aroro ebi kafag ngay taw wa kaylat Uan nu gfasurung anya.

³¹ Isus nalong yay fia te, “Dada ro nu gfafaskudanan au katsi fag ngay taw, ay nataw takata anya?

³² Kanya fagayu kata way sik ngay sisian tagawean ay at malunggung lang sis fagawean ay gfanguroan sa tiba te, ‘Dewami gfawang tulali laman gfauseganan ayu, wam gfalelegan ay bilug. Ay dewami galubad kata nu gwayway, wam gawaywayun.’

³³ Katatuy ku faydayuanan aro at masuad. Uan Tagfasurung nu ndasug e buknga wa gfangon laman gdarangin, ay wa yangay ginum fanlangu. Ay kauri am anya te, sik mauri fag falad si anya.

³⁴ Ay au, Taw at Baguama, gina au ndasug, gfangon ktua ay ginum. Ay ngay taw glong te, ‘Ida, kanya fag taw sik tagfangkumon way ay annanad glanguan, ay gfagadgalangan ngay tagbul famayad laman sas fun, ay anggan tagasalanan.’

³⁵ Dewa katanya, gtuyan tam te, Dius at fagmamatanganun matuyan siginan at ngay fakamulun.”

Sik Mangena Nafatayuk Famaebebanglu sas Isus at Darafa

³⁶ Sik taw Fariseu ggewan Isus laman nanfangon sat bale. Ay Isus nanangalo anya ay malunggung sit fagfangonan.

³⁷ Ay sanya fag furuan e sik mangena, takadungug te, e asalanan. Kanya nadungug te, sanya fag bale Isus nu gfangon. Nu katanya, kafag mangena nabuba sik famaebebanglu fag mamam, at fagsuadan mawatan siginans gang alabastru,

³⁸ ay kanya malindug sis Isus at day guyuy, sit day darafa ay gwayway. Ay at liasun nafabasa Isus at darafa, ay at fangarus at buk wan, ay nayuk, ay sanya ginan nafatayuk at buba fag famaebebanglu.

³⁹ Ay kafag taw Fariseu, at nagewan Isus, nu nalag kafag mangena at nafakamulun, gamatangan te, “Tuy fag mangama, nu Dius di at taglong at sadi, kanya ro saful te, sinu tuy fag mangena tagted anya, aroro kanya sik tagasalanan.”

⁴⁰ Ay Isus nalong te, “Simun, e longan au emu.” Ay Simun nabalus te, “Foyungi angku, Takamoyung.”

⁴¹ Ay Isus nalong te, “Duak taw e bedan sa tagfabedan salapi. At sadi at bedan limak sandan. Ay at usama at bedan limak safulu way.

⁴² Ay kanya fag dua we salapi, laman namatabu at bedan. Ay at tagfabedan nafalyam wan duama at bedan. Inday kanya fag dua tagtungud nu kesug at nafabedan?”

⁴³ Ay Simun nabalus te, “Nu gamatangan au, at ke bedan tangayu.” Isus nalong te, “Matuyan am amatanganan.”

⁴⁴ Isus nadama sa kafag mangena ay nalong sas Simun te, “O glag o tuy fag mangena? Dewa au ndasug sa am bale, wo nafon angku sik mamam laman ku famegus ku darafa. Kafag mangena nafabasa ku darafa at liasun ay at fangarus at buk wan.

⁴⁵ Wo nayuk ku fingi, ay dewa katanya siginan ngay nu gsakbo au, tuy fag mangena ya ntabu nu gayuk ku darafa.

⁴⁶ Wo nafatayuk langis sa ku alfuyu. Ay tuy fag mangena nafatayuk famaebebanglu sa ku darafa.

⁴⁷ Aroro katanya, ku longan emu, tuy fag mangena at ngay asalanan, dewa ngayu, nalyam wan, ay nu katanya maksvn nu kesug angku. Ay sik taw nu alay way at nafalyam fag asalanan, alay way nu kesug.”

⁴⁸ Isus nalong sanya fag mangena te, “Nalyam wan am ngay asalanan.”

⁴⁹ Ay Isus at ngay ufud sis fagfangonan gfasigad gidgintoan te, “Sinu tuy fag taw, at mafalyam anggan asalanan?”

⁵⁰ Ay Isus nalong sa kafag mangena te, “Am fagafanudun nafalangfe emu. Loi wan, manabayan tua ro wo.”