Lukas 4 - Fanawbuid tagsibaliwas Fakayabian

Satanas Nafaskud Isus

¹ At Masine fag Falad nu ntayuk sas Isus, Isus nalao wan siginans Liskung Urdan. Ay at Masine fag Falad nataban anya sas talun at yud e taw.

² Isus nu sanya ufatk safuluk menit, ay Satanas gfaskud anya. Kadugenya, Isus wa batang gfangon, ay maksvn nu kalunus.

³ Ay Satanas nalong sas Isus te, “Nu Dius tuo at Baguama, longi stae fag gang te, ‘Akawati sik fakonun.’ ”

⁴ Ay Isus nabalus te, “Duan. Dius at Longan at marirukan nalong wa te, ‘Sik taw nu gleleg, bundi lang siginans fakonun.’ ”

⁵ Sanya ginan, Satanas nataban Isus sa sik buknga tangabat fia, ay kaduge sik liplip mata, nafabanawan anya sa sangay fagfagtainanan sas fagdaul daga.

⁶ Ay Satanas nalong sas Isus te, “Gfon kwan sa emu fagmabalyananun ay fagmasineun laman nangagbilug ngay fagfagtainanan, aroro nafatigwanan wan sa angku kanya fagayu, ay e fagmabalyananun au gfon sas nusnga sinu ku fakaylatun ku fagfonan.

⁷ Nu gseg tuo angku, o ban tagagbilug fagayu tuy.”

⁸ Ay Isus nabalus te, “Dius at Longan at marirukan nalong wa te, ‘Segi am Fun, am Dius, ay sia yakman lang am fagfaningan.’ ”

⁹ Ay Satanas nataban Isus sas Erusalem, ay nafalindug anya sas Dius at bale sat tiba tungud fag afud. Ay Satanas glong yangay fia sas Isus te, “Nu Dius tuo at Baguama, tosi ste ginan,

¹⁰ aroro anriruk wan sas Dius at Longan te, ‘Kanya sumugu at ngay tagbarita laman ggubuk emu,

¹¹ laman at daluap gurug emu, laman am darafa di katuktuk sas gang.’ ”

¹² Ay Isus nabalus te, “Dius nalong yangay te, ‘Lag gfaskud am Dius am Fun.’ ”

¹³ Ay Satanas nu nalong wan fagayu at famaskud, nalo wan, laman namanya tibak menit.

Isus Gfasigad at Fakamulun sis Talun Galilea

¹⁴ Isus anfoli wan sas talun Galilea ay at Masine fag Falad at fagmabalyananun si wa anya. Ay fagayu taw tagbanwan sit ligung fag ngay talun nadungug Isus at fakamulun.

¹⁵ Ay Isus gfoyung sas taw Udyu at ngay bale fakafulan, ay fagayu taw naseg anya.

Taw Nasaret Kauri Isus

¹⁶ Sanya ginan, Isus noli wan sas furuan Nasaret sat talun ebi gina munama yay, ay nasakbo sas bale fakafulan sis Famiangalay fag Menit, kata at ugali. Ay Isus namalindug, laman gtap Dius at Rirukan.

¹⁷ Ay tagalaga nafon sas Isus, Isayas at nariruk fag fagtapan. Ay Isus nalugde, ay nu nalag at fagrvbvyun fag afud, kanya natap. Katatuy at nalong:

¹⁸ “Dius at Falad si wa angku, aroro Dius nafili angku laman namoyung au at Masine fag Barita sa sangay taw at yud e kwa. Kanya nasugu angku laman namoyung au sat maubungan te, e gfalfas ban ayu, ay laman namoyung au sas taw at yud glag te, glag ban am; ay laman namalfas au at ngay taginkidapan,

¹⁹ ay laman namoyung au te, andasug wan at buknga tam Fun nu gfalangfe taw.”

²⁰ Isus nu ntabu wan nu gtap, nafalut ay nafafoli sa tagalaga, ay kanya namalunggung. Ay fagayu taw sis bale fakafulan gdama anya.

²¹ Ay Isus gfasigad gfoyung te, “Katsi fag menit, anfasludan wan ste fag afud rirukan kaduge am gdungugan.”

²² Ay fagayu taw kaylat Isus ay andulo aroro at ngay foyungan masine, ay kanya fagayu gidgintoan te, “O nunda kanya bunwa Use at baguama?”

²³ Ay Isus nalong te, “Matuyan, lumong am sa angku te, ‘Tagfafia, fafiai am sadili,’ at masuad te, ‘Fakamuluni yangay ste sim furuan, kata em nadungug am nafakamulun sis furuan Kapernaum.’ ”

²⁴ Ay Isus nalong yangay fia te, “Matuyan nu glong au ayu te, ngay taw wa gdungugan Dius at taglong sit sadili furuan.

²⁵ Ay anud nu glong au te, kaduge Elyas gleleg, ngayuk fagbubayun sis talun Israel. Ay tuluk banwa ay unumk magdanun wa batang karak, ay andasug sik maksvn fag fanlunus sanya fag talun,

²⁶ dewa katanya, Dius wa nasugu Elyas sa sangay fagbubayun tagsis Israel, nu bunway sa way sik fagbubayun tagsis Sarefat sis Sidun fag talun.

²⁷ Ay kaduge Elisyu gleleg, ngayuk tagabangbang sis talun Israel, ay we nfia, sangay Naaman tagsiginans talun Sirya.”

²⁸ Fagayu taw sis bale fakafulan ankuri nu nadungug Isus at longan.

²⁹ Nu katanya, kafag ngay taw namalindug, ay naiyan Isus siginans furuan, ay nataban sa sik tangrawan, munakbang sit furuan, laman namatong.

³⁰ Dewa katanya, Isus nadalan sa kafag ngay taw at wabilug, ay nalao wan.

Sik Mangama at ke Mauri fag Falad

³¹ Sanya ginan, Isus nalao sas furuan Kapernaum, sis talun Galilea. Ay sis Famiangalay fag Menit, kanya gfoyung sa sangay taw.

³² Ay sanya fag ngay taw andulo nu nadungug Isus at foyungan, aroro Isus nu gfoyung, kata tua sik fun.

³³ Ay sis bale fakafulan e sik mangama at kintayuk sik mauri fag falad, ay kanya nauro te,

³⁴ “Isus fag taw Nasaret, nataw am fagyafakamulunun sa emi? O am algan namalyam wo em fagmabalyananun? Saful au te, o wan Dius at nasugu at Yud e Malong.”

³⁵ Ay Isus maksvn nu gsalag te, “Lag garingang. Ubuni wan kanya fag taw.” Ay kafag mauri fag falad nu nafatong kafag taw sas wabilug fagngayuan taw, naubun wan, ay kafag taw di e natarasan.

³⁶ Ay fagayu taw andulo ay gidgintoan te, “Nataw tuy fag foyungan? Aroro kanya kata sik fun, ay e fagmabalyananun gaiyan at mauri fag ngay falad, ay kanya fag ngay falad gfaning.”

³⁷ Nu katanya, sanya fag talun anfagdaul barita sabaliwas Isus.

Isus Nafafia Ngayuk Taw

³⁸ Isus namalindug ay nalo wan sanya ginan fag bale fakafulan, ay nasakbo sas Simun at bale. Ay ginanya, Simun at nugangina garagnat, ay tibak taw gfainfanyuan sas Isus te, “Fafiai anya.”

³⁹ Ay Isus ankakbang sanya fag mangena at day tigyangan ay nalong te, “Afiai,” ay anfia wan. Ay arodi vtv kanya fag mangena nlindug ay nafalganan sik fakonun laman sas Isus ay at ngay ufud.

⁴⁰ Ay gina menit gakafalyuun, ngay taw nabuba sas Isus at ngay ke fakasaitun, ay Isus nafatayuk at daluap sa anya fagayu, ay anfia wan.

⁴¹ Ay Isus naiyan yangay at mauri fag ngay falad siginan ngayuk taw. Ay kafag ngay falad gina gduksun, guro sas Isus te, “O wan Dius at Baguama!” Dewa katanya, Isus nasalag laman wa garingang, aroro kafag ngay falad saful te, Isus, Dius at nafili fag Fun.

Isus Nalo wan laman Nanfamoyung

⁴² Ay balabag di sdaga kamenit, Isus nalo wan ay andasug sa sik talun at yud e taw. Ay sanya fag furuan at ngay taw grvbvy Isus, ay kanya fagayu nu nalag, gfainfanyuan te, “Lag yap glao siginan em furuan.”

⁴³ Ay Isus nabalus te, “Masine nu namoyung kyangay at Masine fag Barita sabaliwas Dius nu gfagtainan nusnga nday fag furuan, aroro katanya at fagnasuguun angku.”

⁴⁴ Ay Isus gfataglayun nu gfoyung sa sangay bale fakafulan sis talun Udea.