Lukas 3 - Fanawbuid tagsibaliwas Fakayabian

Uan Tagfasurung at Foyungan

^1-2 Gina sis falabi limak banwa Tiberiu, talun Ruma at fun, nu gfunan, Dius naringang sas Uan, Sakaryas at baguama, gina kanya sis talun at yud e taw. Ginanya, Punsyu Pilatu at fun sirut sis Udea, ay Erudes gfunan sis Galilea, ay at faduksay Felipe gfunan sis Iturea ay sis Trakunitis, ay Lisanyas gfunan sis Abilinya. Ay ginanya at fun tagfon fanggalangun, Anas ay Kayfas.

³ Ay Uan nafafagdaul talun tagsumbalian Liskung Urdan, ay kamoyung sa sangay taw tagbanwan sanya te, “Foyungi ay ubuni ay ngay asalanan ay asurungi sasad mamam, laman Dius gfalyam ay ngay asalanan.”

⁴ Uan at fakamulun gfaning Isayas, Dius at taglong ebi, at nariruk sit Rirukan te, Sik taw guro sis talun at yud e taw te, Fasinei tam Fun at dalan. Faturunani at fagnanloan.

⁵ Fagayu buknga buksul umkapnu ban, fagayu fungsu ay buksul umdatag ban, ay ngay dalan at mabaraud umturun ban, ay ngay tagubungan dalan umdalusan ban.

⁶ Ay fagayu ban taw lumag Dius nu gfalangfe.

⁷ Ay sik ngay taw andasug sas Uan laman nangasurung, dewa katanya, Uan nalong sa anya fagayu te, “Am, kata way am tagfandaya fag ngay ule at maganga! Sinu at nafararang ayu te, lagyui siginan takadasug ban fag faurianan?

⁸ Ugalii at masine laman gfalag am te, naubun wam ay ngay asalanan. Ay lag gamatangan te, ‘Ansak wan aroro Abrayam tua em mangaguyang.’ Amatangani, Dius ro mawat way Abrayam at ngay kasugfunanan dewa ste ginan fag ngay gang.

⁹ Gfoyung au sa ayu te, katsi yay wase mafawawan wan sa sangay fun kayu at lalid. Ay kafag ngay fun kayu nu dway masine at rawvg, e gfuan wan ay nangukas sasad afuy.”

¹⁰ Ay ngay taw nainto te, “Tain ban manga em fakamulun?”

¹¹ Ay Uan nabalus te, “At ke lanbung dua, foni at sadi sat yud e lanbung. Ay at ke fakonun, foni tua sat yud e fakonun.”

¹² Ay ginanya, ngay tagbul famayad laman sas fun andasug yangay laman nangasurung ay nainto te, “Takamoyung, tain manga at masine em fakamulun?”

¹³ Ay Uan nabalus te, “Nu gbul am famayad lag gfasawe.”

¹⁴ Tibak tagfawayan nainto te, “Ay emi, tain manga em fakamulun?” Ay Uan nabalus te, “Lag gfalimu ay iba, ay lag glong te, ay iba at fakamulun mauri nu dway matuyan. Ay lag gfalabo ay fun at famayad sa ayu.”

¹⁵ Kafag ngay taw kanbang wa daul nu gfanya at fagfanyaun, ay kanya fagayu namatangan sabaliwas Uan te, “O sia wa manga Dius at nafili fag Fun?”

¹⁶ Ay Uan nafoyung sas fagayu taw te, “Au, gfasurung au ayu sasad mamam, ay takadasug ban fag taw gtungud yay angku nu mabalyanan. Ay kwa masine nusdi at fagsuguan laman at nanluas at fansalod at lapak. Kanya ban namasurung ayu sat Masine fag Falad ay sas afuy.

¹⁷ Kanya glayap laman gfasaman at ngay nagutan siginans trigu, ay gfaful ngay bintuy trigu sat fagfungsuan. Dewa katanya, at ngay upa nangirug sas afuy at yud ban karabung kabavn.”

¹⁸ Ngayu yay Uan at foyungan sa sangay taw sabaliwa at Masine fag Barita.

¹⁹ Ay Uan nagras Erudes, sanya fag talun at funan, aroro kanya namangena at ifag, Erudias, ay aroro sas fagayu at fakamulun mauri.

²⁰ Ay Erudes at fagmauriun ankugat yay, aroro nafaubung Uan.

Isus nu Kasurung

²¹ Sik menit, gina Uan gfasurung ngay taw, anggan Isus ansurung yangay. Ay gina Isus gdarangin, banwa anluang,

²² ay at Masine fag Falad kadaga kata sik labikung ay naafun sa anya. Ay e naringang siginans banwa te, “O wan ku fakesugun ku Baguama; maksvn nu guseganan au emu.”

Isus at ngay Mangaguyang

²³ Isus nu gfasigad gfakamulun, at banwa tulu wak safulu. Ay kata ngay taw at fagsafulun, Isus at mama Use, ay Use, siginans Eli at kasugfunanan.

²⁴ Eli at mama Matat. Matat at mama, Lebi. Lebi at mama, Melki. Melki at mama, Anay. Anay at mama, Use.

²⁵ Use at mama, Matatias. Matatias at mama, Amus. Amus at mama, Naum. Naum at mama, Esli. Esli at mama, Nagay.

²⁶ Nagay at mama, Maat. Maat at mama, Matatias. Matatias at mama, Semin. Semin at mama, Usek. Usek at mama, Oda.

²⁷ Oda at mama, Ukanan. Ukanan at mama, Resa. Resa at mama, Serubabel. Serubabel at mama, Sealtiel. Sealtiel at mama, Neri.

²⁸ Neri at mama, Melki. Melki at mama, Adi. Adi at mama, Kusam. Kusam at mama, Elmudam. Elmudam at mama, Er.

²⁹ Er at mama, Uswe. Uswe at mama, Elieser. Elieser at mama, Urim. Urim at mama, Matat. Matat at mama, Lebi.

³⁰ Lebi at mama, Simyun. Simyun at mama, Uda. Uda at mama, Use. Use at mama, Unam. Unam at mama, Eliakim.

³¹ Eliakim at mama, Melea. Melea at mama, Mena. Mena at mama, Matata. Matata at mama, Natan. Natan at mama, Dabid.

³² Dabid at mama, Ese. Ese at mama, Ubed. Ubed at mama, Buas. Buas at mama, Salmun. Salmun at mama, Naksun.

³³ Naksun at mama, Aminadab. Aminadab at mama, Admin. Admin at mama, Arni. Arni at mama, Esrum. Esrum at mama, Peres. Peres at mama, Uda.

³⁴ Uda at mama, Akub. Akub at mama, Isak. Isak at mama, Abrayam. Abrayam at mama, Tera. Tera at mama, Nakur.

³⁵ Nakur at mama, Serug. Serug at mama, Reu. Reu at mama, Peleg. Peleg at mama, Eber. Eber at mama, Sela.

³⁶ Sela at mama, Kainan. Kainan at mama, Arfaksad. Arfaksad at mama, Sem. Sem at mama, Nui. Nui at mama, Lamek.

³⁷ Lamek at mama, Metusela. Metusela at mama, Inuk. Inuk at mama, Yared. Yared at mama, Maalalel. Maalalel at mama, Kenan.

³⁸ Kenan at mama, Enus. Enus at mama, Set. Set at mama, Adan. Ay Adan at mama, tam Dius.