Lukas 24 - Fanawbuid tagsibaliwas Fakayabian

Isus nu Gdog Gleleg

¹ Ay sis Linggu sbalabag sirut, kafag ngay mangena nalao sas fagfolian, gbuba at nafalganan fag ngay famaebebanglu.

² Ay manlag di at faningding luib fag gang, madagingan wan.

³ Ay nu nasakbo sas luib, we lagan Isus at bilug.

⁴ Ay gina gamatangan, duak mangama at ke lanbung masulo nsure wa vtv, malindug sit akbang.

⁵ Ay kafag ngay mangena at kaksvnan nu kalimu narungan sas daga. Ay kafag duak mangama nalong te, “Wain ro ay fagrvbvyun tagleleg sit ngay kinbul?

⁶ Wa ste ya Isus, kanya nadog wan naleleg. O nunda wam gamatang ya at longan ayu ebi gina am sis talun Galilea te,

⁷ ‘Tiba namon ban Taw at Baguama sas tagasalanan ay nantuktuk anya sas fasulungan kayu, ay sis fatuluk menit kanya gdog yay gleleg’?”

⁸ Ay kafag ngay mangena namatang Isus at longan.

⁹ Ay kanya fagayu noli wan siginans fagfolian ay nafasaful fagayu at nalag sas labi sadik nasugu, ay anggan sat tiba fagayu.

¹⁰ Kafag ngay mangena, Maria Magdalena, ay Uana, ay Maria, Santiagu at mina, ay tiba ya at ufud fag ngay mangena. Kanya wa fagayu at nafasaful sas Isus at ngay nasugu.

¹¹ Ay kanya fagayu wa gafanud kafag ngay mangena at nalong, aroro kata way nu yud e masuad.

¹² Ay dewa katanya, Pedru anlindug ay natarung sas fagfolian, ay nu ndasug, kanya narungan gfatangun ay at nalag fansifig way lang Isus fag ramit malaksi. Ay nu katanya kanya noli wan ay gamatangan te, “Wain ngaro fakatanyaun lang ku lagan?”

Duak Tagadal nasas Furuan Emaus

¹³ Ginanya fag menit at duak tagadal nalao sas furuan Emaus. Erusalem at kayayuan siginans Emaus, nu e nanlao sik wabilug menit.

¹⁴ Ay duama at kamatoanan sabaliwa at ngay nalag ay at ngay nadungug.

¹⁵ Ay gina duama gkamatoan ay gidgintoan, Isus nanangakbang anya ay gadgaloan wa dayun.

¹⁶ Ay duama dewa gfadgaloan Isus, wa toglag te, kanya wan Isus.

¹⁷ Ay Isus nalong te, “Nataw ay kamatoanan kaduge am glao?” Ay duama nafaragang yay sirut nu glao, ay mafabaluanan way.

¹⁸ Ay at sadi, at ngayan Kleupas, nabalus Isus te, “O nunda kayu nya ktaw tagsibo sas Erusalem, o yo nasaful at kinfasludan ebi vtv?”

¹⁹ Ay Isus nainto te, “Ay nataw nunda at kinfasludan?” Duama nabalus Isus te, “At kinfasludan sabaliwas Isus fag taw Nasaret. Kanya sik taglong at mabalyanan sas Dius ay sa sangay taw at daga salubangan. Ay at fakamulun wan at mabalyanan ay at foyungan tagfatuyan.

²⁰ Ay tam ngay fun tagfon fanggalangun ay tam ngay tagfangguna nafon Isus sat iba, ay kanya fagayu nasugu te, ‘Fabuli anya.’ Ay kanya fagayu natuktuk anya sas fasulungan kayu.

²¹ Ay gseg mandi mi te, kanya ban at namalangfe ngay taw Israel. Ay newa katsi tulu wak menit at kinlangfe siginan nu e gfabul anya.

²² Ay sis balabag sirut em ufud tiba fag ngay mangena nalao sas fagfolian, ay andulo ami at barita sa emi te,

²³ we lagan ya Isus at bilug. Ay kanya fagayu gina anfoli siginans fagfolian, nalong sa emi te, ‘Nalag ami Dius at ngay tagbarita ay nalong sa emi te, Isus gleleg wan.’

²⁴ Ay tibak mangama em ufud nalao sas fagfolian, ay kanya fagayu natuyan te, matuyan kafag ngay mangena at longan te, we kalag ya Isus at bilug.”

²⁵ Isus nalong sa kafag duama te, “Am wan at yud mamatanganan fag ngay taw! Ay at maranan nu gafanud Dius at ngay taglong at longan.

²⁶ At matuyan, masine Dius at nafili fag Fun nu nanginkidapan yay, ay sanya ginan nangadasug sat fagmasineun.”

²⁷ Ay Isus gfataglayun gfayamag sas duama sabaliwa at sadili siginans Muisis ay anggan Dius at ngay taglong at rirukan sabaliwa anya.

²⁸ Duama gina munakbang sat fagnangadasugan fag furuan, Isus kata nantaglayunan wama sat fanloan.

²⁹ Ay duama gfatawad yay anya te, “Ste yap tam, aroro gakayabiun wan, menit gakafalyuun wan.” Ay Isus nanangalo duama.

³⁰ Ay gina gfasfuan duama gfangon, Isus nabul tinapay ay nafauseganan Dius, ay nalungud ay nafon sas duama.

³¹ Ay duama nu nafanoglag fia, natoglag te, kanya wan Isus. Ay ginanya yay vtv duama we lagan ya Isus.

³² Ay duama gkamatoanan te, “Newa ngani mabayan tua aro nu gdungugan ta kaduge gfayamag sa anta Dius at Longan at masuad, o kin?”

³³ Ay duama anlindug wa vtv ay anfoli sas Erusalem. Ay nu ndasug sanya, nalag Isus at labi sadik nasugu maful, ay tiba ya at ngay ufud.

³⁴ Ay at maful nalong te, “Anud wan, tam Fun gdog yay gleleg ay ansure sas Simun.”

³⁵ Ay kafag duama nafansulitan at nalag gina si sangaba dalan, ay nu gtoglag Isus gina glungud tinapay.

Isus Ansure sat ngay Tagadal

³⁶ Ay gina duama kamansulit, Isus ansure sanya fag ngay taw at wabilug ay nalong te, “Siwa ayu fagmanabayanun.”

³⁷ Ay kanya fagayu anlipsik ay kalimu, aroro nu glong, at kinsure, sik labang.

³⁸ Ay Isus nalong te, “Wain ay fakalimuun? Ay wain ay fagawabiluganun yay?

³⁹ Damai ku daluap ay ku darafa. Au wa fia. Tedi angku, laman sumaful wam. Aroro sik labang we faknul ay we bini kata angku.”

⁴⁰ Ay nu nalong wa katanya, Isus nafalag at daluap ay at darafa sa anya fagayu.

⁴¹ Ay kafag ngay taw at kaksvnan nu guseganan ay nu kadulo, ya fia gafanud at nalag. Ay Isus ginto te, “O e fakonun am?”

⁴² Ay tagsanya at sadi nafon sa anya sik lungud albon masugban.

⁴³ Ay Isus nabul ay naon sis taw at daga salubangan.

⁴⁴ Ay Isus nalong te, “Katatuy ku longan ayu ebi, gina au galo yay ayu: fagayu at marirukan sabaliwa angku sis Muisis at Faugali ay sis Dius at ngay taglong at ngay rirukan, ay anggan si sangay Alubad, umfasludan wan.”

⁴⁵ Sanya ginan Isus nafoyung sa anya fagayu laman gtogdungug Dius at Longan.

⁴⁶ Ay kanya nalong sa anya fagayu te, “Sis Dius at Longan marirukan te, Dius ban at nafili fag Fun dumalan fagidapun ay umbul, ay si bans fatuluk menit gdog yay gleleg.

⁴⁷ Ay siginan ban at ngayan e gfoyung sas fagayu taw, taguna sas Erusalem ay anggan sas fagdaul daga at taw te, fagayu taw nu naubun tua at ngay asalanan, Dius gfalyam wan at ngay asalanan.

⁴⁸ Am wan tagfatuyan tuy fag ngay fakamulun.

⁴⁹ Dungugani, sumugu kban ku Mama at nafatuyanan sa ayu. Fanyai yap ste fag furuan, yakmay am nabul fagmabalyananun siginans banwa.”

Isus Gdog yay Nfoli sas Banwa

⁵⁰ Ay Isus nataban kanya fagayu sas day furuan Betanya, ay nafalugde at take laman gfadante sa anya fagayu.

⁵¹ Ay gina Isus gfadante sa anya fagayu, kanya naubun ay e naurug anya sas banwa.

⁵² Ay sanya ginan at ngay tagadal naseg Isus, ay anfoli wan sas Erusalem, ay maksvn nu guseganan.

⁵³ Ay kanya fagayu si gugat Dius at bale ay gseg Dius.