Lukas 23 - Fanawbuid tagsibaliwas Fakayabian

Isus sis Pilatu at Daga Salubangan

¹ Ay kafag ngay fun anlindug ay nataban Isus sas Pilatu.

² Ay kanya fagayu gfasigad gfoyung at ngay fantabugan te, “Nalag ami tuy fag taw nu gfae asalanan tam ngay taw. Ay kanya gsalag emi nu gfon ami famayad sas talun Ruma at fun, ay nalong te, ‘Au wan sik fun, Dius at nafili.’ ”

³ Ay Pilatu nainto sas Isus te, “O o wan taw Udyu at fun?” Ay Isus nabalus anya te, “O wan at nalong takatanya.”

⁴ Ay Pilatu glong sa sangay fun tagfon fanggalangun ay sa sangay taw te, “Kwe nasaful tuy fag taw at asalanan.”

⁵ Ay ngay taw nafabulun te, “Tuy fag taw gfauri ngay taw sas fagdaul talun Udea siginan at ngay foyungan, ay kanya nu gfoyung nafasigad siginans talun Galilea ay ndasug stae.”

Nataban Isus sas Erudes at Daga Salubangan

⁶ Ay Pilatu nu nadungug takatanya, kanya nainto te, “O kafag taw sik taw Galilea?”

⁷ Ay kanya nu nasaful te, Isus siginan Erudes at fagfunanun, Pilatu nasugu te, “Nantaban am Isus sas Erudes,” aroro ginanya fag ngay menit Erudes sis Erusalem.

⁸ Erudes nu nalag Isus, guseganan, aroro kanya glugo wan nu gyalagun anya. Kanya ebi nadungug Isus at fakamulun ay gyalagun Isus nu gfakamulun at madulo.

⁹ Ay Erudes ngayu at fagintoun sas Isus. Ay Isus wa gbalus.

¹⁰ Ay ngay fun tagfon fanggalangun ay ngay tagfoyung Muisis at Faugali malindug sanya ay maksvn nu gfantabugan te, Isus e asalanan.

¹¹ Ay Erudes ay at ngay tagfawayan kase, gfalingun Isus. Ay kanya fagayu nafae lanbung Isus sik masine fag lanbung. Ay sanya ginan Erudes nalong te, “Fafolii Isus sas Pilatu.”

¹² Ay ginanya fag menit Pilatu ay Erudes nagadgalangan, ebi ataw kanya fag dua dewa gawayan.

Pilatu Nasugu te, Fabuli Isus

¹³ Pilatu nafaful ngay fun tagfon fanggalangun ay ngay tagfangguna ay anggan ngay taw,

¹⁴ ay nalong te, “Aro nataban am tuy fag taw sa angku, ay nalong am te, tuy fag taw gfauri way ngay taw. Nu katanya nainsaful au anya si ay daga salubangan, ay natuyan au te, wa matuyan ay ngay nafantabugan sabaliwa anya.

¹⁵ Ay katanya yangay anggan Erudes, ay nu katanya kanya nafafoli anya sa antam. Dungugani, kanya di e asalanan at sak ngawa ro namabul.

¹⁶ Nu katanya, namafaurianan kway lang anya ay gfalfas kwan.”

¹⁷ [Galay fagmafulun sabaliwa Tagbarita nu Glangfe, Pilatu gfalfas sik taw at maubungan.]

¹⁸ Ay ngay taw gasfuan ngayu guro te, “Fabuli Isus ay falfasi Barabas!”

¹⁹ Barabas, ebi sik taw at kinkubung, aroro nafawayan at fun sisad furuan ay nafabul taw.

²⁰ Pilatu gdog yay garingang sa sangay taw, aroro kaylat gfalfas Isus.

²¹ Ay kafag ngay taw nauro te, “Tuktuki, tuktuki anya sas fasulungan kayu!”

²² At fatulu ginan, Pilatu glong sa sangay taw te, “Wain ay fagnantuktukun anya? Nataw nunda tuy fag taw at fakamulun mauri? Kwe nalag at asalanan, laman sak au namabul anya. Nu katanya, namafaurianan kway lang anya ay gfalfas kwan.”

²³ Ay kaugat way ngay taw nu gfabulun ay nu guro te, “Tuktuki anya sas fasulungan kayu.” Ay taguro nababo.

²⁴ Pilatu nafaning kafag ngay taw at fakaylatun.

²⁵ Kanya nafalfas Barabas kata ngay taw at fagetun, kanya ebi ankubung aroro nafawayan at fun ay nafabul taw. Ay Pilatu nafatigwanan Isus sa sangay tagfawayan laman gfaning ngay taw at fakaylatun.

Nu Gtuktuk Isus sas Fasulungan Kayu

²⁶ Gina ngay tagfawayan gtabanan Isus, kanya fagayu nafatawad Simun, sik taw siginans talun Sirene, at kindasug siginan baliwas gamasun. Ay kanya nafafasanan sa anya Isus at fasulungan kayu, laman gbuba sis Isus at guyan.

²⁷ Ay sik ngay taw naguyan Isus, ay anggan tibak mangena grungan way lang sirut gwayway, aroro kafanyu Isus.

²⁸ Ay Isus anbiling ay nalong sa sangay mangena te, “Furuan Erusalem at ngay mangena, lag gwayway, dewa am kabalu angku. Ay fagwaywayun, sa yakman ay sadili ay sa ay ngay sisian.

²⁹ Aroro amatangani, kadasug ban sik ngay menit, tibak taw lumong ban te, ‘Mauseganan tagaranas, ay at yud batang e nafasusu!’

³⁰ Kadugenya, ‘ngay taw ban lumong sa sangay fungsu te, “Atongi sa emi,” ay sa sangay buksul te, “Tabuni emi.” ’

³¹ Aroro ngay taw nu gfakamulun wan takatanya sa angku at yud e asalanan, kaugat wa ban nu gfakamulun takatanya sa sangay taw at ke asalanan.”

³² Ngay tagfawayan nataban dua yak taw at ke asalanan, laman namabul gasfuan Isus.

³³ Ay nu ndasug sas buksul at ngayan te, Butul Alfuyu, kanya fagayu natuktuk Isus sas fasulungan kayu. Ay natuktuk yangay kafag duak tagasalanan sas duak fasulungan kayu gsumbalian Isus.

³⁴ Isus nalong te, “Mama, falyami kafag ngay taw at fakamulun at mauri, aroro wa nasaful at fakamulun at masuad.” Ay kafag ngay tagfawayan gukas gang laman ginsaful te, sinu ro at nangagbilug Isus at ngay lanbung.

³⁵ Ay ngay taw malindug ngayu sanya gdama. Ay ngay tagfangguna gfalingun Isus te, “Ebi kanya nafalangfe tibak taw, ay mafalangfe yangay nangus at sadili nu kanya tua Dius at nafili fag Fun.”

³⁶ Anggan sanya fag ngay tagfawayan gfalingun anya ay nangakbang ay nafon anya sik mayat fag sanggvtan,

³⁷ ay glong te, “Nu o wan taw Udyu at fun, falangfei am sadili.”

³⁸ E sik rirukan sis Isus at tungud alfuyu te, Tuy ngay Taw Udyu at Fun.

³⁹ At sadi at ke asalanan, ngay taw at natuktuk, gfalingun Isus te, “Nu o wan Dius at nafili fag Fun, falangfei am sadili, ay anggan emi.”

⁴⁰ Ay at usama gagras anya te, “O wo kalimu Dius? Aroro gafaurianan yangay o kata anya.

⁴¹ Matuyan, ita gafaurianan wata fia, aroro e asalanan ta. Ay tuy fag taw we nafakamulun at mauri.”

⁴² Kafag taw nalong sas Isus te, “Isus, amatangi ban angku gina ban o gfagtainan.”

⁴³ Ay Isus nabalus anya te, “Matuyan nu glong au emu te, katsi ro fag menit gtaban au emu sas Dius at fagbanwanan.”

Isus nu Kabul

⁴⁴ Ay nu swabilug menit wan, andulum sanya fag talun. Ay nu madulum, sitsigon sfatulu sas fafun baliwa,

⁴⁵ aroro menit wa gdamlag ya. Ay fantaba fag ramit sad basad Dius at bale an-girat ay ankafud dua.

⁴⁶ Ay Isus nauro maksvn te, “Mama, gfatigwanan kwan sa emu ku falad.” Ay kanya wan taguyan at engasan.

⁴⁷ Tagsanya fag fun tagfawayan nu nalag at kinfasludan, kanya naseg Dius te, “At matuyan, tuy fag taw we asalanan.”

⁴⁸ Ay ngay taw at maful sanya at nalag at kinfasludan, gina kanya fagayu guli grungan way lang aroro kabalu.

⁴⁹ Ay Isus at ngay fagadgalangan, ay anggan ngay mangena at nanangalo anya siginans talun Galilea, malindug sit dayu ay nalag yangay at kinfasludan ginanya.

Nu Namoli Isus at Bilug

⁵⁰ Sanya sik taw, at ngayan Use, siginan taw Udyu at furuan at ngayan Arimatea. Ay kanya ngay taw Udyu at tagfangguna at sadi, ay sik taw masine ay matuyan.

⁵¹ Use wa gfadiuganan tibak tagfangguna at fakaylatun ay at fakamulun. Kanya gfanya Dius nu gfagtainan.

⁵² Kanya fag taw nalo sas Pilatu ay get sa anya Isus at bilug.

⁵³ Ay Use nafadaga Isus at bilug ay nasifig sik ramit daul, ay nanamoli sa sik fagfolian at magaruyan sisad gang. Sanya ya batang e nanamoli at kinbul.

⁵⁴ Ginanya, Famalganan ngay fakonun fag Menit, ay gafasigadun Famiangalay fag Menit.

⁵⁵ Kafag ngay mangena, ebi tagalo Isus siginans talun Galilea, naguyan Use ay nalag at fagfolian ay anggan nu gfoli at bilug sanya.

⁵⁶ Kafag ngay mangena nfoli wan ay nafasine sik famaebebanglu ay sik lumad. Ay kanya kamato sis Famiangalay fag Menit, gfaning Dius at Longan.