Lukas 22 - Fanawbuid tagsibaliwas Fakayabian

Taw Udyu at ngay Fagtainan Kaylat Gfabul Isus

¹ Ginanya fag buknga munakbang wan fagmafulun sabaliwa Tinapay at yud e Famabia, sik fagmafulun at ngayan yangay te, Tagbarita nu Glangfe.

² Ay ngay fun tagfon fanggalangun ay ngay tagfoyung Muisis at Faugali grvbvy sik balyawvtan laman namabul Isus, aroro kanya fag ngay fagtainan kalimu ngay taw.

Udas nu Namoyung Isus sat Mauri fag ngay Taw

³ Arodi Satanas nasakbo sas Udas Iskariute. Kanya Isus at labi duak tagadal at sadi.

⁴ Ay Udas nalao laman namakamatoan ngay fun tagfon fanggalangun ay sa sangay fun tagulit sis Dius at bale te, setain nu namoyung Isus sa anya fagayu.

⁵ Ay kafag ngay tagfangguna naylat Udas at longan, ay nafatuyanan sa anya te, namon ban anya salapi.

⁶ Ay Udas nafadiuganan ay gfanya sik buknga laman namoyung Isus sa kafag ngay tagfangguna, gina ngay taw yud sanya.

Isus at ngay Tagadal Gfalganan at Yafun sabaliwa Tagbarita nu Glangfe

⁷ Andasug wan fagmafulun sabaliwa Tinapay at yud e Famabia, ay ginanya yangay fag menit nu gfon fanggalangun fag tupa laman at fakonun ginanya fag fagmafulun.

⁸ Ay Isus nasugu Pedru ay Uan te, “Loi wan ay namalganan am tam yafun sabaliwa Tagbarita nu Glangfe.”

⁹ Ay kanya fag duak nasugu nainto sas Isus te, “Dada ro am fakaylatun nu namalganan ami?”

¹⁰ Ay Isus nabalus te, “Nu nasakbo ro am sas furuan, sik mangama ro tagfasanan sik baringan mamam gfablang ayu. Ay nangalo ro am anya sat fagsakboan fag bale.

¹¹ Ay longi sa tagagbilug bale te, ‘Tam Takamoyung nalong te, Dada ro fag salug nu gfangon au gasfuan ku ngay tagadal, laman sas fagmafulun sabaliwa Tagbarita nu Glangfe?’

¹² Ay kanya ro namoyung ayu sik tagbia fag falangganan tagsit tungud baliwa. Ay sanya ro nu namalganan am tam yafun.”

¹³ Ay at ngay tagadal nalo wan, ay nalag kata Isus at longan, ay nafatama sanya at yafun sabaliwas fagmafulun.

Tam Fun at Yafun

¹⁴ Nu ndasug wan at fanyafunan fag buknga, Isus malunggung sis fagfangonan magamut at ngay nasugu.

¹⁵ Ay Isus nalong te, “Maksvn nu kaylat au gfasfuan ayu gyafun gina fagmafulun sabaliwa Tagbarita nu Glangfe, gina yay yud e nafaurianan angku.

¹⁶ Aroro gfoyung au ayu te, kwa ban gdog ya kon takatatuy fag yafun yakmay ban anfasludan Dius nu gfagtainan.”

¹⁷ Isus nabul sik taya, ay nu naseg Dius, kanya nalong te, “Na. Afudani.

¹⁸ Aroro glong au ayu te, siginan katsi, kya ban gdog ginum rawvg ubas at mamam, yakmay ban andasug Dius nu gfagtainan.”

¹⁹ Isus nabul sik tinapay ay nu naseg Dius, nalungud ay nafon sat ngay tagadal ay nalong te, “Tuy ku bilug at nafon laman sa ayu. Fakamuluni ban takatatuy, laman gamatang am angku.”

²⁰ Ay katanya yangay, nu ntabu wan at yafun, Isus nabul sik taya ay nalong te, “Tuy fag taya tam bagu fag nasadian sa ku taguk, laman famalyam ay ngay asalanan.

²¹ “Ay at namoyung ro angku ste wan fag fagfangonan tagfasfuan angku gfangon.

²² Aroro au, Taw at Baguama, gtaglayun au sas fakabulun, gfaning Dius at fakaylatun, ay afanyuan ban at namoyung angku sat mauri fag ngay taw.”

²³ Ay at ngay tagadal gkamatoan sit dayu te, “Sinu manga si antam at namakamulun ro kata at nalong?”

At ngay Tagadal Gbadbaboan te, Sinu ban Tam Tagtungud

²⁴ Isus at ngay tagadal gbadbaboan te, sinu ban si anya fagayu tiba tungud.

²⁵ Ay Isus nalong te, “At yud Udyu fag ngay taw at ngay fun gfunan ngay taw, ay at ke fagmabalyananun kaylat at fagfanggunaun fag ngay taw nu gseg anya te, Em Taggubuk.

²⁶ Ay diam nangus katanya. At masine at tagtungud fag taw katai yakman sik sisian, ay at tagfunan katai sik fagsuguan.

²⁷ Inday ro manga at tiba tungud tuy fag dua? At malunggung sit fagfangonan, ay mannga at namuba sa anya at fakonun? At malunggung tua, o kin. Au wan tagalo ayu kata sik tagbuba ay fakonun.

²⁸ Am wan tagfaudgufudan angku gina au e fagidapun.

²⁹ Ay nu setain ku Mama nu gfalganan sa angku sik ngay taw ku fagfagtainanan, anggan ban au gfon au sa ayu fagmabalyananun gfunan.

³⁰ Gfasfuan ban am angku gfangon ay ginum si ku fagfagtainanan fag fagfangonan. Ay malunggung ban am sas fanfun fag ngay faglunggungan laman ban namagtainan am Israel at ngay kasugfunanan fag labi dua.

Isus Nafaguna Nalong Pedru nu Kamuag sabaliwa Anya

³¹ “Simun, Simun, dungugani angku, Satanas get ayu, laman glayap ayu kata sik fare.

³² Dewa katanya, nadarangin kwa emu, laman am fagafanudun wa kamomuy. Ay nu nfoli wo sa angku, faksvni anggan am ngay faduksay.”

³³ Ay Pedru nalong sas Isus te, “Ku Fun, mafalganan kwan, dewa ta ndasug sas fakaubungan ay sas fakabulun.”

³⁴ Isus nalong te, “Pedru, glong au emu te, katsi ro fag yabi, gina tabag yud natarakit, tulu ginan ro wo kamuag te, wo toglag angku.”

Mafalganani

³⁵ Isus nalong sat ngay tagadal te, “Ebi gina au gsugu ayu te, lag am e sulpa, ay lag gasabian, ay lag am e lapak, o e fagayudanun yayam?” At ngay nasugu nabalus te, “Duan, wami e fagayudanun ya.”

³⁶ Ay Isus nalong te, “Katsi, nung am e sulpa, bubai, ay anggan sik sabi. Ay nu dway am e fiso, faebayadi ay lanbung ay buli at sadi.

³⁷ Aroro gfoyung au ayu te, at masine nu namafasludan kban tuy fag Rirukan te, ‘Natap anya kata sik tagasalanan.’ Ay katsi kafasludan wan kafag Rirukan.”

³⁸ Ay at ngay tagadal nalong sas Isus te, “Em Fun, damai, tuy wan duak fiso.” Ay Isus nalong te, “Sabv ro kanya.”

Isus Gdarangin

³⁹ Kata Isus at nananadan, kanya nalao sas buksul Ulibu. Ay at ngay tagadal nanangalo anya.

⁴⁰ Ay nu ndasug wa sanya, Isus nalong te, “Darangini, laman diam gafaskudan asalanan.”

⁴¹ Ay Isus nalo kayayu nu e naukas sik gang, ay natudan ay gdarangin te,

⁴² “Mama, nu kaylat o, buli siginan angku ku fagnandalanun ban fag faurianan. Dewa katanya lag gfaning ku fakaylatun, am fakaylatuni tua.”

⁴³ Ay Dius at tagbarita at sadi ansure sas Isus ay nafasun anya.

⁴⁴ Ay Isus gfaksvn nu gdarangin aroro maksvn nu kabalu, ay at fangenit nu ganting sas daga, kata sik taguk.

⁴⁵ Ay kanya nu nlindug siginan at fagdaranginan, anfoli sat ngay tagadal, ay kanya fagayu gtiug way ngayu aroro maksvn nu kabalu.

⁴⁶ Ay Isus nalong te, “Wain ay fagtiugun way? Malunggungi wan ay darangini tua, laman diam gafaskudan asalanan.”

Nagamat Isus

⁴⁷ Gina Isus garingang, ngayuk taw andasug. Ay Udas, Isus at labi duak nasugu at sadi, tagfangguna kafag ngay taw. Udas nanangakbang sas Isus ay nayuk anya.

⁴⁸ Ay Isus nalong anya te, “Udas, o am fagnangayukun angku namoyung o angku, Taw at Baguama, sat mauri fag ngay taw?”

⁴⁹ Ay Isus at ngay ufud nu nasaful takafasludan ro, nalong te, “Em Fun, o gbasing wami?”

⁵⁰ Ay sanya at sadi nabasing tiba tungud fag tagfon fanggalangun at fagsuguan ay andasdas way lang sis siun baliwa fag talinga.

⁵¹ Ay Isus nalong te, “Lagi, lag gfakamulun takatanya.” Ay Isus nated kafag taw at talinga ay nafafia.

⁵² Ngay fun tagfon fanggalangun ay ngay tagulit Dius at bale at ngay fun, ay ngay fagtainan andasug laman nanggamat Isus, ay Isus nalong sa anya fagayu te, “Nataw ay fagsteun ngayu gafisoan ay e ngay ba famalang nanggamat angku kata nu e ggamat sik tagfangkamul?

⁵³ Kayu menit si koma gugat Dius at bale magamut ayu, ay wam nagamat angku. Dewa katanya, katsi ya ay buknga gina fagmadulumun tagfunan.”

Pedru nu Kamuag te, wa Toglag Isus

⁵⁴ Ay ngay taw nagamat Isus ay nataban anya sa tiba tungud fag tagfon fanggalangun at bale. Ay Pedru gguyan anya sit dayu.

⁵⁵ Ay tibak taw nafaygang sis wabilug fagawean, ay kanya fagayu maligung sanya fag faygangan ay gfangenbung ay Pedru malunggung yangay gfasuglatan sanya fag ngay taw.

⁵⁶ Ay arodi sik fagsuguan fag mangena nalag Pedru sisad yamag, ay kafag mangena nu nadama, nalong te, “In at sadi tagalo Isus.”

⁵⁷ Ay Pedru nafamuag te, “Fagmangena, kwa toglag am nalong fag taw.”

⁵⁸ Ay arodi vtv, tibak taw nalag anya ay nalong te, “O wan at sadi at tagadal.” Ay Pedru nabalus te, “Duan, bunwa au.”

⁵⁹ Ay sanya ginan, nu nlangfe sik kadugayan sirut, at sadi maksvn yangay nu nalong te, “Anud, in wa fia at sadi ebi tagalo Isus, aroro kanya sik taw Galilea yangay.”

⁶⁰ Ay Pedru nalong te, “Duan, kwa saful am longan at masuad.” Ay arodi vtv gina garingang, sik tabag gtarakit.

⁶¹ Tam Fun anbiling ay nadama Pedru. Ay Pedru namatang tam Fun at nalong sa anya te, “Gina ro tabag yud natarakit, tulu ginan ro wo kamuag te, wo toglag angku.”

⁶² Ay Pedru naduksun ay maksvn nu gwayway.

Nu Gfalingun ay nu Gfalang Isus

⁶³ Kafag ngay taw tagulit Isus, gfalingun anya ay gfalang.

⁶⁴ Ay kanya fagayu natabun Isus at mata ay ginto te, “Sinu at nafalang emu?”

⁶⁵ Ay nalong ya ngayuk mauri sa anya.

Nu Gtaban Isus sas Taw Udyu at ngay Tagfangguna

⁶⁶ Gina menit bagu kasure, taw Udyu at ngay tagfangguna ay ngay fun tagfon fanggalangun ay anggan ngay tagfoyung Muisis at Faugali anful ay nataban Isus sat fakafulan. Kanya fagayu nalong te,

⁶⁷ “Longi sa emi, o o wan Dius at nafili fag Fun?” Ay Isus nabalus te, “Dewa kngap ro nafoyung ayu, wam gafanud.

⁶⁸ Ay dewa kngap ro nainto sa ayu, wa ngap ro am gbalus.

⁶⁹ Dewa katanya, Au, Taw at Baguama, nanmalunggung kban sas Dius at mabalyanan at siun baliwa.”

⁷⁰ Ay kanya fagayu nainto te, “Nu katanya, o wo wan Dius at Baguama?” Ay Isus nabalus te, “Am wan at nalong.”

⁷¹ Ay ngay fun nalong te, “Lag tam kaylat ya tibak taw tagfoyung sabaliwa tuy fag taw at asalanan, aroro nadungug watam at longan.”