Lukas 20 - Fanawbuid tagsibaliwas Fakayabian

Sinu at Nasugu Isus

¹ Sik menit kaduge Isus gfoyung at Masine fag Barita sa sangay taw sis Dius at bale, ngay fun tagfon fanggalangun ay ngay tagfoyung Muisis at Faugali ay anggan ngay fagtainan nanangakbang sa anya.

² Ay kanya fagayu nainto sas Isus te, “Daginan am fagmabalyananun am fagmafafakamulunun katanya, ay sinu at nasugu emu?”

³ Ay Isus nabalus te, “Anggan au e fagintoun au sa ayu. Balusi angku.

⁴ Ginto au ayu te, Uan at fagfasurungun taw, o at fakamulun siginans banwa, o ay mannga siginans taw?”

⁵ Ay kanya fag ngay taw Udyu gkamatoan sit dayu te, “Nu nalong ro tam te, ‘Siginans banwa,’ kanya ro gbalus antam te, ‘Wain ay fagyudun gafanud Uan at longan?’

⁶ Ay nu nalong ro tam te, ‘Siginans taw,’ fagayu taw mafana antam gang, aroro kafag ngay taw gafanud te, Uan, Dius fia at taglong at sadi.”

⁷ Nu katanya, kanya fagayu nabalus Isus te, “Wami saful te, daginan.”

⁸ Ay Isus nalong te, “Anggan au, kwa gfoyung ayu te, daginan ku fagmabalyananun ku fagmafafakamulunun takatanya.”

Isus at Faydayuanan sabaliwa at Mauri fag ngay Tagalaga Tanuman

⁹ Isus gfasigad gfoyung sanya fag ngay taw tuy fag faydayuanan. Glong te, “Sik taw natanum sik ngay wat ubas sit daga. Ay kanya nafaalaga at tanuman sa sik ngay tagalaga ay nalo sa tangayayu fag talun ay glugo tua ban nu gbanwan sanya.

¹⁰ Ay abandi, at tanuman at rawvg nu nlesan wan, kanya nasugu at fagsuguan at sadi sa sangay tagalaga at tanuman laman namul at afud. Ay kafag ngay tagalaga nafalang kanya fag fagsuguan ay naiyan we buba.

¹¹ Ay tagagbilug nasugu tiba at fagsuguan. Ay at ngay tagalaga nafalang ay nafalingun ay naiyan we buba.

¹² Ay tagagbilug nasugu at fatuluk fagsuguan. Ay at ngay tagalaga nafae fakarukan ay naukas anya.

¹³ Ay tagagbilug tanuman gamatangan te, ‘Tain ban ku fakamulun? Nansugu au ku fakesugun ku baguama. Bangaran ban kanya fag ngay tagalaga gsuyu tua anya.’

¹⁴ “Ay kanya fag ngay tagalaga nu nalag kafag baguama, gkamatoan te, ‘Kadasug wan at nangagbilug at mama at daga. Namabul watam anya, laman ban itam wan tagagbilug at daga.’

¹⁵ Ay at ngay tagalaga nataban kafag baguama sas day tanuman ay nafabul anya. Tain ban tagagbilug kafag tanuman at fakamulun?

¹⁶ Kanya ban kadasug ay namabul kafag ngay tagalaga ay namalaga at tanuman sa tibak tagalaga.” Ay ngay taw nu nadungug glong te, “Lag nangus katanya.”

¹⁷ Ay Isus nadama ngay taw ay nalong te, “Nu katanya, nataw Dius at Rirukan at masuad, at longan te, ‘Ngay takawat bale at naukas fag gang, katsi at famaogat wan at bale.’

¹⁸ Ay nusnga sinu at kumtong sanya fag gang, umrufa, ay nusnga sinu at nafakwanan kafag gang umdudug.”

¹⁹ Ay arodi ngay tagfoyung Muisis at Faugali ay ngay fun tagfon fanggalangun gananggamatun Isus, aroro kanya fagayu nasaful te, Isus at faydayuanan at fagfatungulan sa wa anya fagayu. Ay dewa katanya, kanya fagayu kalimu ngay taw.

O Masine Gfon Famayad sas Talun Ruma at Fun

²⁰ Ngay tagfoyung Muisis at Faugali ay ngay tagfon fanggalangun naulit Isus at fakamulun, ay nasugu at ngay fagsuguan laman nandaya kata nu kaylat gdungugan. At fakaylatun fia namae asalanan Isus sit longan, ay namagamatan sat fun.

²¹ Ay kafag ngay fagsuguan nainto sas Isus te, “Takamoyung, saful ami te, matuyan am foyungan, ay gsudsudan am foyungan sas fagayu taw, ay di o e fagfili nusnga sinu fag taw, ay matuyan nu gfoyung o Dius at fakaylatun.

²² O gfaning manga tam tam faugali nu gfon tam famayad sas talun Ruma at fun, o mannga duan?”

²³ Ay Isus nasaful at fakamaninganun ay nalong anya te,

²⁴ “Falagi angku sik salapi. Sinu at ke aninu ay at ke ngayan at marirukan ste fag salapi?” Ay kafag ngay taw nabalus te, “Talun Ruma at fun.”

²⁵ Ay Isus nalong anya te, “Nu katanya, foni sas talun Ruma at fun, anya mandi at afud. Ay foni sas Dius, Dius mandi at afud.”

²⁶ Ay kanya fag ngay taw wa mafae asalanan Isus sit longan sa sangay taw at daga salubangan. Ay kanya fagayu andulo nu nadungug Isus at famalus, ay anragang nu ginto anya.

O at Kinbul Gdog yay ban Gleleg

²⁷ Tibak taw Saduseu andasug sas Isus. Ngay Saduseu gfoyung gugat te, ngay taw ban wa gdog ya gleleg. Ay kanya nainto Isus te,

²⁸ “Takamoyung, ebi Muisis nariruk sa antam te, sik mangama at kinbul wan, at masine, at arian nantiugi yap at ifag. Ay taguna ban at sisian tuga at kaka at ngenge.

²⁹ Ebi e fituk duksayan mangama. At kaka daul nafamubay ay anbul ay wa nke sisian.

^30-31 Ay katanya yangay at fadua ay at fatuluk faduksay. Ay fagfitu nabubay sanya fag mangena ay wa nke sisian, ay abandi kafag duksayan anbul wan.

³² Ay abandi, kafag mangena anbul yangay.

³³ Gina ban fagayu taw nadog naleleg, sinu ban at ke bubay fia kafag mangena, aroro fagfitu nabubay anya?”

³⁴ Ay Isus nalong te, “Katsi fag ngay taw gdadwaan.

³⁵ Dewa katanya, Dius at ngay nafili tagdog yay ban gleleg ginanya fag ngay menit, wa ban e gdadwaan ya.

³⁶ Ay kanya ban fagayu wa kabul ya, aroro kanya kata Dius at ngay tagbarita. Ay kanya fagayu Dius at ngay sisian, aroro gdog yay ban gleleg.

³⁷ Anggan Muisis nafatuyan te, at ngay kinbul gdog yay ban gleleg gina kanya nalag sik fun kayu tagigang ay nafangayan tam Fun te, ‘Abrayam, Isak ay Akub at Dius.’

³⁸ Dius bunwa at mabulan fag ngay taw at Dius, nu bunway tagleleg tua fag ngay taw at Dius, aroro sas Dius, fagayu taw gleleg.”

³⁹ Tibak tagfoyung Muisis at Faugali nalong te, “Takamoyung, masine am longan.”

⁴⁰ Aroro kafag ngay taw Saduseu kalimu wa nanginto.

Sinu ke Kasugfunanan Dius at Nafili fag Fun

⁴¹ Ay Isus nalong sanya fag ngay taw te, “Wain at fage foyunganun te, Dius at nafili fag Fun, fun Dabid at kasugfunanan?

⁴² Dabid yangay tagfoyung sas Alubad fag fafil te, ‘Tam Fun nalong sa ku Fun te, Malunggungi sa ku siun baliwa,

⁴³ ay namababo au emu sa am ngay fawayan.’

⁴⁴ Fun Dabid nu nafangayan way Dius at nafili fag Fun te, ‘Ku Fun,’ tain ro kanya nu siginan fun Dabid at kasugfunanan?”

Isus Nafararang sabaliwa ngay Tagfoyung Muisis at Faugali

⁴⁵ Gina fagayu taw gdungugan, Isus nalong sat ngay tagadal te,

⁴⁶ “Mataganani tua ngay tagfoyung Muisis at Faugali. Kanya fagayu e lanbung at mafilian nusnga nday nu glao, ay gina sis wabilug furuan, kaylat ngay taw nu gseg anya. Ay galay nasas bale fakafulan ay e ngay fagmafulun, kanya fagayu at fakaylatun sa tua at masine fag ngay faglunggungan,

⁴⁷ ay gfamin ngay fagbubayun at ramraman, ay dewa ngaduge nu gdarangin, gfalagan way lang. Kanya ban fagayu mul at maksvn fag faurianan.”