Lukas 19 - Fanawbuid tagsibaliwas Fakayabian

Isus ay Sakyu

¹ Isus andasug sas Eriku aroro sanya at dalan sas Erusalem.

² Ay sanya sik taw at ngayan Sakyu. Ay kanya sik tiba tungud fag tagfon famayad laman sas fun, ay kanya maramraman.

³ Ay Sakyu gugatan gyalagun Isus. Ay wa glag aroro sik taw way ngababa, ay ngayu yak taw gfarum anya.

⁴ Ay Sakyu masakit naguna kafag ngay taw ay naulul sa sik kayu sikumuru laman ro lumag Isus, aroro Isus gdalan ro sanya.

⁵ Isus nu ndasug sanya, kanya natangda ay nalong te, “Sakyu, masakiti nu gtustus o, aroro nansibo kro emu sam bale.”

⁶ Ay Sakyu masakit nu gtustus ay guseganan gfasakbo Isus sat bale.

⁷ Ay tibak taw nu nalag, gibugan te, “Isus nasakbo sa sik tagasalanan at bale.”

⁸ Sakyu namalindug ay nalong sa tam Fun te, “Ku Fun, dungugani, gwabilug ban ku ramraman namon kwan sat yud e kwa. Ay fagayu ku nafandaya gina au gbul ngay taw at famayad, gfafoli kban ufatk kayu nya.”

⁹ Ay Isus nalong anya te, “Katsi, fakalangfean andasug wan ste fag bale.” Ay nalong yangay te, “Tuy fag taw Abrayam yangay at kasugfunanan.

¹⁰ Aroro au, Taw at Baguama, ku fagindasugun, laman nanrvbvy au ay namalangfe fagayu at nalyam.”

Isus at Faydayuanan sabaliwa Safuluk Fagsuguan

¹¹ Gina ngay taw nadungug at longan, Isus nafoyung yangay sik faydayuanan, aroro ginanya kanya munakbang sis Erusalem ay ngay taw gamatang te, munakbang wan Dius nu gfagtainan taw.

¹² Nu katanya, Isus nalong te, “Ebi, sik taw at mabalyanan ay maramraman nalao sa tangayayu fag talun laman namul at fagmafunanun gfagtainan at talun, ay at algan nu nabul wan kafoli way.

¹³ Ay gina galoun, kanya nagewan at fagsuguan fag safulu. Ay kanya nafon sat ngay fagsuguan safuluk libuk salapi, ay nalong te, ‘Fayui tuy fag salapi yakmay kban andasug.’

¹⁴ “Ay tibak taw sanya fag talun kauri kafag fun, nu katanya, kanya fagayu nasugu sik ngay tagfosuk longan sa kafag fun at talun laman nanlong sanya fag ngay taw te, ‘Wami kaylat tuy fag taw nu gfunan emi.’

¹⁵ “Dewa katanya, kanya nabul at fagmafunanun ay noli wan. Kanya nasugu laman nantaban at fagsuguan, ebi at fagfatigwanan salapi, laman at fagsuguan namasaful sa anya nu seyu galay sadi at nafamut.

¹⁶ “At taguna fag fagsuguan at kindasug nalong te, ‘Ku fun, am nafon sa angku fag sadik salapi, anfamut safuluk salapi.’

¹⁷ “Ay at tagfayafun nalong anya te, ‘Masine tuo. Matuyan o fag fagsuguan, aroro matuyan tuo sa talay fag fakamulun. Katsi ban o wan tagfunan safuluk furuan daul.’

¹⁸ “At faduak fagsuguan ankakbang ay nalong te, ‘Ku fun, am nafon sa angku fag sadik salapi, anfamut limak salapi.’

¹⁹ “Ay at tagfayafun nalong anya te, ‘Nanfunan ban o sas limak furuan daul.’

²⁰ “Ay at fatuluk fagsuguan andasug yangay, ay nalong te, ‘Ku fun, na, tuy yay ebi am nafon sa angku fag sadik salapi nasifig au sa sik ramit ay nasuksuk.

²¹ Aroro kalimu au emu, aroro malimu tuo. Gbul o, deyud o at nafon, ay ggutlu o, deyud o at natanum.’

²² “At tagfayafun nalong anya te, ‘At mauri fag fagsuguan, namaurianan kban emu kata am nafamanlonganan. Nasaful oma o te, sik taw au malimu, aroro gbul au deyud au at nafon, ay ggutlu au, deyud au at natanum.

²³ Wain am fagyudun nafasas fagfafamutan salapi ku salapi? Satu ro katsi ku salapi anfamut tua.’

²⁴ “Ay at tagfayafun nalong sa sangay taw at malindug sanya te, ‘Buli kafag salapi siginan tuy fag fagsuguan ay foni sat ke safuluk salapi.’

²⁵ “Ay kafag ngay taw nabalus te, ‘Em fun, anya at salapi safulu wan.’

²⁶ “Ay at tagfayafun nalong te, ‘Dewa. Gfoyung au ayu te, sik taw at ke kwa, e gfamut yay ban sa anya. Ay sik taw nu alay way tagsi anya, e namul way ban siginan anya.

²⁷ Nusnga sinu fag taw takauri nu gfunan au, tabani stie ay gfabul au si ku salubangan.’ ”

Isus Nasakbo sas Erusalem Kata sik Fun

²⁸ Isus nu nafoyung wan takatanya, kanya naguna wan kafag ngay taw sas Erusalem.

²⁹ Ay nu munakbang wan sis Betfage ay Betanya fag duak furuan sis day Buksul Ulibu, Isus nasugu at tagadal at dua te,

³⁰ “Loi wan sat fadogan fag furuan ay nu ndasug am sanya lumag ro am sik riangan asnu masiukan. Kafag riangan ya batang e gsakay. Luasi ay tabani stae.

³¹ Ay sik taw nu ginto ayu te, ‘Wain ay fagluasun?’ balusi te, ‘Tam Fun kaylat.’ ”

³² Ay kanya fag dua nalo wan ay at nalag kata wa fia Isus at longan.

³³ Ay gina gluas, at ngay tagagbilug nalong te, “Wain ay fagluasun kafag asnu?”

³⁴ Ay duama nabalus te, “Tam Fun kaylat laman at fagsakayan.”

³⁵ Ay kanya nataban kafag asnu sas Isus ay nasagmak at lanbung sas asnu at tungud guyuy ay nafasakay Isus.

³⁶ Ay gina Isus gsakay laman nangadasug sas Erusalem, ngay taw sanya nasagmak at ngay lanbung sa sangaba dalan.

³⁷ Nu munakbang wan, gina gtagbung Buksul Ulibu, fagayu at ngay tagadal gfasigad guseganan ay maksvn nu gseg Dius, aroro kanya fagayu nalag at mabalyanan fag ngay fakamulun.

³⁸ Ay nalong te, “Mauseganan takadasug fag Fun sas Dius at ngayan! E fagmanabayanun sis banwa. Segi Dius sis banwa!”

³⁹ Tibak taw Fariseu sis wabilug taw, nalong sas Isus te, “Takamoyung, salagi am ngay tagadal.”

⁴⁰ Ay Isus nalong te, “Gfoyung au ayu te, tuy fag ngay taw nu dway garingang, ngay gang wa ro taguro.”

⁴¹ Ay Isus nu kakbang wan sas Erusalem, ay nu nalag kafag furuan, kanya gwayway, aroro kabalu,

⁴² ay nalong te, “At masine nu nasaful di o katsi te, nataw tagfae fagmanabayanun emu. Ay duan, ansuksuk wan at masuad sa emu.

⁴³ Aroro umdasug ban sik ngay menit, am ngay fawayan nantungluan namawayan emu, ay nanligung emu, ay kadasug nusnga ndaginan baliwa.

⁴⁴ Kanya ban fagayu namatong emu, gasfuan tagbanwan si emu. Ay wa ban e gang ya gtudtungudan, aroro wo nasaful te, Dius andasug sa emu.”

Isus Naiyan Tagfaebayad Siginan Dius at Bale

⁴⁵ Isus nasakbo sas Dius at bale ay naiyan tagfaebayad ay anggan at namayad sanya ginan sad bale.

⁴⁶ Ay Isus nalong sanya fag ngay taw te, “E rirukan wa te, ‘Ku Bale sik bale daranginan.’ “Ay dewa katanya, nawat wayam ku bale ‘ngay tagfangkamul fag ngay taw at fagmafulan.’ ”

⁴⁷ Fagayu menit Isus gfoyung sis Dius at bale. Ay ngay fun tagfon fanggalangun ay ngay tagfoyung Muisis at Faugali, ay anggan tagfangguna ngay taw, narvbvy te, tain ban nu namabul anya.

⁴⁸ Ay kanya fagayu we nalag at balyawvtan, aroro fagayu taw gdungugan fia Isus at longan.