Lukas 18 - Fanawbuid tagsibaliwas Fakayabian

Isus at Faydayuanan sabaliwa sik Fagbubayun ay sik Tagwabilug

¹ Isus nafansulitan sat ngay tagadal sabaliwa sik faydayuanan, laman kanya fagayu wa kamomuy ay wa kalufuy gdarangin.

² Isus nalong te, “Ebi e sik tagwabilug sa sik furuan. Ay kanya wa gseg Dius ay wa kafanyu ngay taw.

³ Ay sanya fag furuan e sik fagbubayun yangay, ay kanya malayun nu nanget gubuk sa kafag tagwabilug, glong te, ‘Gubuki angku, e fawayan au.’

⁴ “Ebi taguna kafag tagwabilug kauri ggubuk, ay abandi kanya namatangan te, ‘Dewa yud au gseg Dius, ay deyud au kafanyu ngay taw,

⁵ aroro tuy fag fagbubayun gfasalag angku, katsi ggubuk kwa anya, laman ban di gugat stae gfadotama angku.’ ”

⁶ Tam Fun nalong te, “Amatangani at yud matuyan fag tagwabilug at longan.

⁷ Anggan tam Dius ggubuk at filian fag taw nu guro sa anya fagngabak menit ay fagngabak yabi, o kin? O Dius gfadugean nu ggubuk?

⁸ Gfoyung au ayu te, Dius masakit nu ggubuk. Ay au, Taw at Baguama, gina kban kafoli ste swa daga, o e lagan ktua ban tagafanud sa angku?”

Isus at Faydayuanan sabaliwa Duak Taw Tagdarangin

⁹ Isus nafoyung tuy fag faydayuanan sa sangay taw takauri at usama ay tagamatangan te, matuyan at fakamulun.

¹⁰ “Ebi, duak taw gundaud laman nandarangin sas Dius at bale. At sadi sik taw Fariseu, ay at sadi sik tagbul famayad laman sas fun.

¹¹ Ay kafag taw Fariseu namalindug ay gdarangin sat amatanganan te, ‘Fadi fadi ku Dius, aroro kwa gfaning tibak taw tagfangkamul ay at yud matuyan at fakamulun, ay tagfanugtug, ay kdi kata in fag tagbul famayad laman sas fun.

¹² Kayu linggu duak menit nu yud au gfangon laman gdarangin. Ay gafud ktua fagayu ku nabul, ay gfon ktua sa emu ku fasafuluk afud.’

¹³ “Ay kafag tagbul famayad laman sas fun namalindug ngayayu siginan tibak taw ay wa gtangda, aroro kapla. Kanya grungan ay glong te, ‘Ku Dius, afanyui angku, aroro sik tagasalanan au.’ ”

¹⁴ Ay Isus glong yay fia te, “Gfoyung au ayu te, kanya fag taw gina guli, Dius natap anya kata sik taw at yud e asalanan, ay duan kafag taw Fariseu. Aroro nusnga sinu nu kamatungudun way, abandi ban e gfababa anya, ay kanya nu kamababaun tua, abandi ban e gfabat anya.”

Isus Nafadante sik ngay Sisian

¹⁵ Tibak taw nabuba at ngay sisian ayu sirut sas Isus, laman Isus namatayuk at ngay daluap sa anya fagayu. Ay at ngay tagadal nu nalag, gsalag anya fagayu.

¹⁶ Ay Isus nagewan kafag ngay sisian ay nalong sat ngay tagadal te, “Fabayani wan kanya fag ngay sisian nu kakbang sa angku. Lag am gsalag, aroro takata kanya fag ngay sisian katap ban sas Dius at fagfagtainanan.

¹⁷ Matuyan nu glong au ayu te, nusnga sinu at yud kaylat Dius nu gfagtainan anya kata sik sisian sirut nu kaylat, kanya ban wa manangatap sas Dius at fagfagtainanan.”

Sik Maramraman fag Mangama

¹⁸ Sik tagfangguna ngay taw Udyu ginto sas Isus te, “At matuyan fag Takamoyung, setain manga ku fakamulun laman magbilug ktua leleg at yud e fakatabuan?”

¹⁹ Ay Isus nabalus anya te, “Wain ro am fagnafangayanun angku te, ‘Matuyan’? We taw matuyan. Dius way lang at matuyan!

²⁰ Saful wo Dius at ngay suguan te, ‘Lag gfanugtug, lag gfabul, lag gfangkamul, lag o kamuag nu gfatuyan o am iba at fakamulun, ay suyui am mama ay am mina.’ ”

²¹ Ay kafag mangama nalong te, “Nafaning kwan takatanya fagayu siginan nu mabaguama au.”

²² Isus nu nadungug katanya, nalong sa kafag mangama te, “Dewa katanya, sadi ya am kurang. Falaoi am ramraman fagayu ay at nagbulan foni sat yud e kwa, laman e ramraman tua ban o sas banwa. Ay sanya ginan, aloi angku.”

²³ Ay kafag taw nu nadungug, kabalu, aroro kanya maramraman daul.

²⁴ Ay Isus nadama anya ay nalong te, “Maidap mandi at maramraman fag ngay taw nu manangatap sas Dius at fagfagtainanan.

²⁵ Amasakit yap sik kamelyu nu nansulun sasad fansimat ramit at sulat, sik maramraman fag taw nu manangatap sas Dius at fagfagtainanan.”

²⁶ Ay kanya fag ngay taw nu nadungug Isus at longan, nalong te, “Ay nu katanya, sinu ban at kumlangfe?”

²⁷ Ay Isus nabalus te, “Ngay taw at fagyudun mafafakamulun, Dius mafafakamulun tua.”

²⁸ Ay Pedru nalong te, “Ami, naubun wami fagayu em ngay ramraman laman nangalo ami emu.”

²⁹ Ay Isus nabalus te, “Matuyan nu glong au ayu te, nusnga sinu nu naubun wan at bale ay at bubay ay at faduksay ay at mina ay at mama ay at sisian, aroro Dius gfagtainan anya,

³⁰ kanya ban at fagnamulun gtungud tua at ngay naubun, ay e leleg tua ban at yud e fakatabuan.”

Isus at Fatulu Ginan Gfoyung sabaliwa nu Kabul Ban

³¹ Isus nataban at nasugu fag labi dua, ay nalong sa anya fagayu te, “Amatangani, katsi sa watams Erusalem, ay umfasludan ban Dius at taglong fagayu at rirukan sabaliwa angku, Taw at Baguama.

³² Ay e gfon ban angku sas yud Udyu fag ngay taw, ay kanya ban fagayu gfalingun ay gfauri ay gtufe angku.

³³ Ay kanya ban fagayu gfalang ay gfabul angku. Ay nu nlangfe ban tuluk menit gdog kyay gleleg.”

³⁴ Ay at ngay tagadal wa nyamag Isus at longan, aroro at longan at masuad masuksukan siginan anya fagayu.

Isus Nafafia sik Mangama at Yud Glag

³⁵ Ay Isus nu munakbang wan sas furuan Eriku, sik taw yud glag malunggung sis tigyangan dalan ay gfanget.

³⁶ Ay kanya nadungug sik ngay taw nu gdalan, ay ginto te, “Nataw takafasludan?”

³⁷ Ay tiba nafoyung anya te, “Isus fag taw Nasaret gdalan.”

³⁸ Ay kafag taw at yud glag nauro te, “Isus, fun Dabid at kasugfunanan, afanyui angku.”

³⁹ Ay tagsis fagunan fag ngay taw, gsalag anya laman wa garingang. Ay kanya gtungud yay aro taw nu guro te, “Fun Dabid at kasugfunanan, afanyui angku.”

⁴⁰ Ay Isus anragang ay nasugu te, “Tabani stae at yud glag fag taw.” Ay nu ndasug wan, Isus nainto anya te,

⁴¹ “Nataw ro am fakaylatun ku fakamulun sa emu?” Ay at yud glag fag taw nabalus te, “Ku Fun, ku fakaylatun glag ktua nangus.”

⁴² Ay Isus nalong anya te, “Glag wa ro wo. Am fagafanudun nafafia wan emu.”

⁴³ Ay arodi vtv kanya glag wan ay nangalo wan Isus ay gseg Dius. Ay fagayu taw nu nalag Isus at fakamulun gseg yangay Dius.