Lukas 17 - Fanawbuid tagsibaliwas Fakayabian

E Gfae Asalanan Ban

¹ Isus nalong sat ngay tagadal te, “Anud wan, e gfae asalanan ban, ay afanyuan way ban nusnga sinu tagfae asalanan.

² Amasine yap nu e gsiuk sat liug sik fanligis trigu fag gang ay gukas anya sas fagngabasadan dagat, nu gamut ban kanya nu nafae asalanan way at iba at yud yay maksvn nu gafanud.

³ “Amatangani am fakamulun. Am iba nu e asalanan sa emu, salagi anya. Ay kanya nu gubun tua at asalanan sa emu, alyami tua.

⁴ Ay dewa fitu ginan sik menit kanya nu e asalanan sa emu, ay andasug fitu ginan ay nafoyung emu te, ‘Gubun au ku asalanan,’ at masine, falyami wan.”

Fagafanudun

⁵ Tam Fun at ngay nasugu nalong sa anya te, “Faksvni em fagafanudun.”

⁶ Ay tam Fun nabalus te, “Nu e fagafanudun di am kadaul sik rigrig burarad, malong am snay fag kayu te, ‘Aguladi ay alini sasad dagat,’ ay kanya ro gfaning ay longan.

Sik Fagsuguan at Fakamulun

⁷ “Nu e fagsuguan o, ay at fakamulun garadu sim daga, ay mannga galaga am ngay fagbaugun, o nu ndasug ro siginan at fagfakamulunan, o glong o te, ‘Malunggungi ay fangoni wan’?

⁸ Duan! Am longan glong way o te, ‘Seudi yap ku yafun ay fasinei am lanbung ay bubai am sineud sas fagfangonan, laman au taguna takon ay taginum, ay nu ntabu kro, o man at nanfangon.’

⁹ O guseganan o am fagsuguan aroro kanya nafaning am longan, o duan?

¹⁰ Katanyai yangay ay fakamulun, nu nafakamulun wam at fafakamulun sa ayu. Longi te, ‘Sik ngay fagsuguan way mi, gfakamulun way mi em fakamulun.’ ”

Isus Nafafia Safuluk Tagabangbang

¹¹ Gina Isus glao sas Erusalem, at dalan sas wabilug talun Samarya ay Galilea.

¹² Ay gina kadasug sa sik furuan sirut, safuluk taw tagabangbang nafablang anya. Kafag ngay taw malindug ngayayu sirut,

¹³ ay maksvn nu guro te, “Isus, em Fun, afanyui emi.”

¹⁴ Ay Isus nu nalag, nalong te, “Loi wan ay namalag am ay ngay bilug sa sangay tagfon fanggalangun.” Ay gina kafag ngay tagabangbang glao, anfia wan, ay masine wan.

¹⁵ Ay at sadi nu nalag te, anfia wan, anfoli sas Isus ay maksvn nu gseg Dius.

¹⁶ Ay kanya namalub sas Isus at daga salubangan ay gseg anya. Kafag taw siginans talun Samarya.

¹⁷ Isus nalong te, “O nunda ku nafafia bunwam safulu? Dada wan at siam?

¹⁸ Wain tiba way nfoli ya laman nanseg Dius? O takafoli ro tuy way lang ro fag sadi tagsiginan way tibak talun?”

¹⁹ Ay Isus nalong sanya fag sadi te, “Malindugi ay loi wan. Am fagafanudun nafafia emu.”

Dius at Fagfagtainanan nu Kadasug

²⁰ Ay ngay taw Fariseu nainto te, “Seduge ya ban Dius nu gfasigad gfagtainan?” Ay Isus nabalus te, “Wa ban e fakasafulan te, gfasigad wan.

²¹ Ay wa ban e malong te, ‘Ste wan,’ ay ‘Sanya wan.’ Duan. Aroro Dius gfasigad gfagtainan ayu katsi.”

²² Isus nalong sat ngay tagadal te, “Umdasug ban sik buknga, maksvn ban nu gyalagun am Taw at Baguama dewa way sadik menit, ay ya ban am lumag.

²³ Ay tibak taw nu nalong ban ayu te, ‘Sna wan,’ ay ‘ste wan,’ lag ban am sanya. Lag ban nangalo anya.

²⁴ Aroro kata sik limbad nu gfayamag sas fagdaul banwa siginan sik tigyangan, anggan sat dayu, katanya yangay ban gina au kadasug fag menit, au Taw at Baguama.

²⁵ Ay gina ban nangafasludan takatanya, au Taw at Baguama nandalan kban ngayuk fagidapun. Ay katsi fag talad taw kauri ban angku.

²⁶ “Au, Taw at Baguama, nu kadasug kban, ngay taw at fakamulun kata ebi gina Nui at buknga.

²⁷ Ebi kanya fag ngay taw manabayan way fia gfangon ay gmamaman, ay kadadwa, yakmay Nui nasakbo sas sakayan lino. Ay ginanya lugwak andasug ay nafabul kafag ngay taw.

²⁸ “Ay kata yangay gina Lut at buknga. Ginanya fag ngay menit ngay taw manabayan gfangon ay gmamaman, ay namayad ay gfae bayad, ay gtanum, ay gbale.

²⁹ Ay Lut nu nalao siginans Suduma, arak afuy ay asupri andasug siginans banwa kata nu karak, ay nafabul tagbanwan sanya fag ngay taw.

³⁰ Katanya yangay ban kanya fag menit, au, Taw at Baguama, nu kasure au.

³¹ “Ay ginanya ban fag menit, nusnga sinu tagsis tungud bale, lag kadaga ya laman namul at ramraman sa sad bale. Ay tagsit gamasun, lag guli ya.

³² Lag am kalyam at kindasug sas Lut at mangena.

³³ Aroro nusnga sinu takesug at leleg, umkalyam way ban at leleg. Ay nusnga sinu tagfon tua at leleg aroro gafanud sa angku, kanya ban e leleg tua kabavn.

³⁴ “Glong au ayu te, ginanya ban fag yabi e duak taw gtaladan gtiug. E nabul wan at sadi, ay at usama anfamato way.

³⁵ Ay e sik duena glubuk, ay e nabul wan at sadi, ay at usena anfamato way. [

³⁶ Ay nu e duak mangama gfakamulun sis gamasun, e gbul at sadi, ay at sadi kafamato way sanya.]”

³⁷ Ay at ngay tagadal ginto te, “Em Fun, nu katanya, dada ban nu kafasludan takatanya?” Ay Isus gfaydayuanan te, “Nu inda ngay bilug at mabulan, sanya ugak nu nangaful.”